4
1 Cacuonakawta, adingna luo a ngiena riypa biekuo aa pahaw kalie ningta, niema pakha hmuo a ngie li pata nama aw li riypata a raaring ungsiy.
2 Tahematapakieca thuophaabie ca iema'a luo a chiy pahaata kiema'a luo zaw a chiy ra. Cuorasala ama thyipa bie kha zangna ta amaa paw li nakawta ama cuota thlahne vayi.
3 A zangpa kiema ca Khazing ta a ripa haata adingna luo kha maa ngie. Khazing ta,
"I hi haa te chie i sapa haayita,
I dingna luo kha a ngie'a vayi," a ta.
Chuelyi a sa baataata a re ca a patlung tli raalaa pata hinghaahingta a ri.
4 Tahematapakieca suvkha lieta ningsariynapa kaw hne a patuv pata a raw luo haahingta a ri, "Khazing ca ningsariynapa lie kha a re taata aa ding," a ta.
5 Calie ngiethie cata, "I dingna luo a ngie'a vayi," ata pakhaa.
6 Cacuonakawta a ngie riypa chekha a ngaa kalie yite, thuophaabie zaa thyi taapa tie ca ri amaa ngie li nakawta a ngie khu vayi.
7 Khazing ta ning ning kha kha, "ata ning," tapata thli te Caapathepa lie a ri ciepa haata cuo syipuv khutaa khata David'a lie a ripa ca,
"Ata ning hing, a ueryi nama thyi kieca,
Nama palung le kha se," a ta.
8 Joshua ta adingna hing za pi yi sala, Khazing ta ning hrangpa kaw hing ri'a vyi.
9 Cahaa cata a cuo nakawta sabbath adingna ca Khazing cawsaa zaw cuota a aw kalie.
10 Tahematapakieca Khazing ca a re taata aa ding pahaata, Khazing adingna luo a ngiepa tie zaw ama re taata amaa ding ra aa.
11 Cahaapa iema ri a ngie lina haakhata kiema pakha hmuo Khazing adingna luo a ngie li pata ma aw li riypata a cuo khu chung ta a zue ungsiy.
12 Khazing bie ca hring te a cahra. Kuo hning ta a cahrepa zueziy laata a cahre vie. Pathiypalung hne thlaapa kha cuose, ruv cakhiy hne ruv lathliy kha cuose dawpahaw khu te; pathiypalung ta aa tingpa hne a ruena zaw kha a pachang diy.
13 Sapa hmang khaapahmuo a hmiekunglie a nu khu vyi. Cuorasala ama hmielie ca a luotaalaa diy te ama'a lie kha ma kaw cyicuo ca maa ri kaluo aa.
14 Cacuonakawta kiema ca vuoruo luo a chiy tlipa a lesyipa tluobyilecepa, Zingsuv, Khazing Saacapaapa kha ma hnyi nakawta ma zangna kha a cusa pata patuv'a ungpuv.
15 Tahematapakieca ma tluobyilecepa ca ma thaadyana lie kha kaw malie a pacuo lipa hne ngie malie a chi lipa cuo vyi, cuorasala kiema haata akuo ting taata pasupaliyna a taw rapa cuote, suena ca hnyi vyi.
16 Cacuonakawta a hu cuo ningta nangduena hne vihnyina kha ma hmung the riypata a vihnyina byithude luo ca riephasa pata va pangie ungsiy.