2
1 Cacuonakawta luopie ziy pata ma vie li riypata ma thyipa biehmisipa kha a phata tah rue ungsiy.
2 Tahematapakieca, avuoming ta ama pathyisapa thuohlaa hing aa hmuopa cuo sala, suena bangkhuo hne ri a ngie lina bangkhuo cuota duotena ang riypa a cuo kieca,
3 kiema ta hing tluv ta a lesyipa khuona hing siysaa ri li pata ma aw kieca sue duotena taata tuokhaatama ma law khu aa? Hing khuona thuophaa hing Khazing ama hrahring ta phu taa te, cakhutaata a thyipa tie ta aa hmuopa a cuopa kha kiema'a lie ama phu pachaa.
4 Khazing ta ama kaw tehte ama khuopa kha aa hmuo tapata pahmungsana zaw, kharuehaa hmang zaw, Thlaapa Pathe lasaw zaw kha a khingna haata a re chiy yi.
5 Khazing ta kiema ima ri nguoluopa, a vaw riypa chuelyi hing avuoming kuv raw luo pi vayi.
6 Cuorasala cawsaa pakha ta Caapathepa suvkha lie,
"Cawsaa hing khaapata cuote ma
se na hie pari?
A thiy thepa hing khaapata cuote ma
kaw na pacuo?
7 Iema kha cuokhata chung avuoming laata
a cawta aa ne vie ta na tue yi;
rungnaana hne pa-uvsathyina
byilakhuv pakhuv yi cate,
8 hmangting bangkhuo kha
ama phyipazaa rawlie na chi," a ta.
Hmangting bangkhuo kha iema kuv raw luo na a chi diy ma ta tiyta, Khazing ta iema uvna le luota a chipa suokha hmuo aw vyi. Cuorasala ata hing ca hmangting bangkhuo iema kuv rawlie a awpa kha hmung valie puv.
9 Cadyiseca, Khazing vihnyina thueta cawsaa bangkhuo cuota thiyna ang riypata cuokhata chung avuoming laata a ne vie ta chipa Zingsuv ca thiyna ruvnaana a angna thue khata rungnaana hne pa-uvsathyina byilakhuv ca pakhuv pata a cuo.
10 Hmangting bangkhuo a tuetuv hne a pa-aw satuv Khazing ta cawsaa hluvpuv kha rungnaana pahmung sa riypata ama zangna hruothuna byi a cuopa kha te-angna taata a tling pata a tuepa ca aa tlapa hmang hrahring tana a cuo.
11 Duo a pacu satuv hne duopacu sapa tie paa ca pakha tana a cuo. Cacuonakawna iema kha, uvnu hne sieta zaw tapata ku riypata Zingsuv a nang a zaa li pakha a cuo.
12 Caapathepa ta,
"Na ming ca i uvnu hne
sieta zaw'anote 2:12 Gk Uvnu zaw luo ukhyi'a ang te,
cawsaazaapuv hrawlie kha
ica pathuo sa aa," a ta.
13 Cakhutaata,
"Nama na ica zang aa," a ta.
Cakhutaata,
Khazing ta ina pipa i saata zaw hrawlie,
hinglie hingna i aw," a ta pakhaa.
14 Saata zaw ta thiy hne saa cuona suokha kha amaa hraw nakawta Zingsuv zaw capa thiy hne saa cuona ca aa hraw ra. Cahaa cata aa tuepa ca thiyna a angna thue khata thiyna uvtuv Setaa kha para pata,
15 thiyna ciyna pata ama hringzung ta sii ta aa ziypa tie kha lawna pi riypata a cuo.
16 Avuoming a bya riypata a zuvpa cuo li pata Abraham ciypathla zaw a bya riypatana aa zuv tapa ca a siesa.
17 Cacuonakawta hmangting lie kha a uvnu hne sieta zaw haakhata a cuo a hu te, cata a cuona ca cawsaa ta sue a ngiethena ama cu riypata Khazing re a hriena lie kha nangduena hne zangtluo aa tlapa tluobyilecepa a cuona riypatana a cuo.
18 Tahematapakieca ama hrahring ta ruvnaana hne pasupaliyna kha a ang tli nakawta pasupaliyna a angpa tie kha a bya khutuv ta a cuo.