THESALON
Thesalon Khrisaabuv'a Luo Paul Caapaphya Suohningna
Khrih a vaw pakhaana ama mangkhuona kawlie khata Thesalonika khy lie kha hnaahnawna a aw ngiethie kalie. A suohningna Paul caapaphya hing Abyipa a vaw pakhaana ning ca a tlung tli tapata a zangpa tie bie a palienapa tana a cuo. Capa zangna aa dang lipa ca Paul ta a pare. Khrih aa vaw pakhaa hluo ta pha lina ca a dawpaa te pha'a te, ca pha lina a chiykhyituv ca, "Cawsaa pha lipa," Khrih a dutuv khata a cuo aa, a ta.
Paul ta khuo vie ta a ri khingpa ca, ruvnaana hne te-angna khuopuv ta a tlung zaw ta nama zangna lie kha a cusa pata a daa ungla, nama khysatungbangna lie kha kama hne i viesaa zaw kha malie a mangpuo tie ung. Kiema re ma hriepa haahingta re hrie ra tie ung, a ta yi.
1
1 Paul, Silas hne Timote ta,
ma Paa Khazing hne ma Byipaapa Zingsuv Khrih chunglie a awpa Thesalonika khrihsaabuv kha caa maca paphya yi.
2 Ma Paa Khazing hne Abyipa Zingsuv Khrih ta vihnyina hne diena kha ca pi mangyisue.
3 Uvnu hne sieta zaw,note 1:3 Gk Uvnu zaw kiema ca niema kawlie hing Khazing kha maa law pari riypatana a cuo. Tahematapakieca nama zangna kha lethaw te cawsaa bangkhuo ta pakha hne pakha namaa duena zaw a lethaw nguoluo nakawta cahaa cata Khazing maa lawpa ca aa hmuopa tana a cuo.
4 Cacuonakawta hrisaathieruena chunglie nama angpa riethyina cangta zangna chunglie a cusa pata namaa daa nakawta Khazing khrihsaabuv tie hrawlie kha kiema hrahring ta maacaa palesakhyi yi.
5 Hingpa hing na aa dangpa Khazing biechina paluosana ta a cuo. Niema zaw Khazing pena cuota riethyina a ang rapa nama cuo nakawta capa Khazing pena hne aphuv-asiypa pacuo sa riypata tingpa nama cuo.
6 Tahematapakieca Khazing ta niema riethyi caa pipa tie kha riethyina pi ra'a yite,
7 riethyina a angpa niema kha a pahyna ca pi'a yite kiema zaw malie a pi ra aa. Abyipa Zingsuv kha a lesyipa aa vuoming hne myipalyi chunglie amaa zaa luo tiyta,
8 Khazing a pachang lipa hne ma Byipaapa Zingsuv thuophaabie a ziy lipa tie kha vieriy thung'a yite riethyi a pi'a yi.
9 Iema ca chuozaa ranapa duotena kha ama ang aa. Abyipa hmiekung taakhata a cade'a yite, a rungnaapa a cahrana kha hmung'a vayi.
10 Abyipa ca a mingpathepa tie ta parungnaa sa riypata hne zangtuv tie bangkhuo pathuo sa riypata aa vaw thueta capa ning lie ca niema zaw a pathuosapa tie hrawlie ca nama aw ra aa, tahematapakieca niema ca maca changpa yi thuophaabie nama zang nakawta a cuo.
11 Cacuonakawta, Khazing ta aca una yi hne aa phuvpa ta ca chi yi sala, nama biechina hne zangna ta nama hriepa re bangkhuo lie kha a cahrana ta tluotlingna aca pi riypa yita thla maca chuopa pari yi.
12 Cahaa cata, ima Byipaapa Zingsuv ming ca niema hrawlie kha rungnaana hmung'a te, ma Khazing hne Abyipa Zingsuv Khrih vihnyina thueta niema zaw ama'a taata rungnaana kha nama hmung ra aa.