4
1 I ri khingpa ca hinghaahingtana a cuo: rucutuv riypa kha kung tlingpa a cuo hluo taca hmangting bangkhuo kha a hnyituv cuorasala sii hne aahlyi-aalena aw vyi.
2 A paa ta a tingpa pa cuo a tling hluo li bangkhuo ca mangchiytuv kuv cunglie khana a aw.
3 Cacuonakawta, kiema zaw kung tling lipa ma cuo chung ca chuelyi hmang a uvtuv thlaapa sii tana ma cuo.
4 Cuorasala cuo a vya tling tiyta ca Khazing ta a Saacapaa a za pathlie. Canung chung taata phungbie rawlie a puv.
5 Phungbie rawlie a awpa tie a thla riypa hne kiema kha Khazing saata ta ma cuo thena riypata a cuo.
6 A saata ma cuo nakawta, Khazing ta Thlaapa kha manote 4:6 Hluo vie caa-uv lieca nama* a ta. pathiypalung chung luo za pathlie te, capa Thlaapa cata, "Abba!note 4:6 Aramaic ryi ta Paa* tanata a cuo. I Paa!" tapata a u.
7 Cacuonakawta niema ca sii ta cuo va tli ungciy, cuorasala saata tana nama cuo. Khazing saata nama cuo tli nakawta rucutuv zaw nama cuo.
Paul Ta Galati Ming A Chuo Yi
8 Hluoning, Khazing nama za pachang hluo ca, Khazing a cuo lipa tie sii ta nama za cuo.
9 Cadyiseca, ata hing ca Khazing kha pachang tli ung cate, Khazing zaw ta aca pachang tli yi. Tuokhaatama a thaazuo dyapa, thlahnena a hnyi lipa thlaapa tie'a luo ca namaa pali aa? Tuokhaatama iema sii ca nama cuo pakhaa khing?
10 Niema ta ning pa-ipa, thla pa-ipa, khycuo pa-ipa hne kung pa-ipa hnyi ung cate nama uv.
11 Nama cuota i hriepa re hing paviepavuv lie ungciy tapa na i thlaa a zangsa.
12 Viesaa zaw,note 4:12 Gk Uvnu zaw kama haahingta cuo ra ung tapata paa ica kie yi, tahematapakieca kama zaw niema haatana i cuo tli. Kama'a lie nama paanapa aw vyi.
13 A yikhanapa niema'a lie thuophaabie i za phupa ca pangpasaa lie i tluo li nakawtana a cuo tapa kha nama pachang.
14 I tluo lipa ca niema cuota hmangriy a cuo raalaa pata, na za ese lipa ung cata na za mangbung va ungciy, cuorasala Khazing avuoming haata hne Khrih Zingsuv haata ina za cuhluo ungciy.
15 Nama za hnyipa palungtluona kha tuokhaatama aa tue tli? Cuo the sala nama ming hmuo cakhyi pata ina pi khing ungciy tapa kha kama pangpa ta i ri nguo.
16 Biehmisipa ica chang nakaw yi ta nama carie ta a li kanaa ang?
17 Cawsaa chekha ta a caa khingkhyi laalaw yi, cuorasala amaa tingpa ca pha vyi. Niema kha kiema'a taata che pata iema'a luo kuo dyi a daa riypata aca khing yi.
18 Cahaa cata a khingkhyina ca a tingna phapa hne a cuo kieca niema'a lie i aw ning dyi cuo li pata cipari ta a pha.
19 I duepa i saata zaw, Khrih kha nama chunglie a aw hluo li chung bangkhuo ca nu pazipa haa khatana pasana ca i ang pari aa.
20 Ata hing niema'a lie aw ang sala i ryikaa zaw hing thle khu angse tapa i khing sa; nama cuota na i palung rie a thyi hringhruo.
21 Phungbie rawlie a aw khingpa tie zaw, na chang tie ung, phungbie ca ziy'a va ung cama?
22 Caapathepa ta, Abraham ca saacapaa pahning hnyi te, pakha ca siizaanung hneta a hnyipa cuote pakha ca hyazang pata a aw nung hneta a hnyipa a cuo.
23 Siizaanung saacapaa ca saapa ta sapa cuote hyazang pata a aw nung saata ca biekuona thueta sapa a cuo.
24 Hingpa hing pakhingpuona ta a cuo: Hingpa canung pahning hing biekuona suohning ta ama cuo. Biekuona suokha ca Sinai Tluo taata pipa cuote, a saa zaw ca sii cuo riypata a sa yi. Caca Hagar ta a cuo.
25 Hagar ca Arabia ruo lie a awpa Sinai Tluo tanata cuote atalie ta a saa zaw hneta sii a cuo nguoluopa Jerusalem hing a ri khingnapa tana a cuo.
26 Cuorasala canung hrangpanung ca cungluo a awpa Jerusalem kha a ri khingpa ta cuote; ama ca hya a zangpa kiema ma nung tana a cuo.
27 Tahematapakieca Caapathepa ta,
"Nama a cing nung,
saa a sa buo li nung, a law tie,
Nupazi pasana a ang buo li nung,
hlaa sa la u tie;
Tahematapakieca thawpa nung ta
a sapa saata zaw khana a vaapa hne
a aw nung saata zaw laata a hluv vie'a yi," a ta.
28 Uvnu zaw, niema ca biekuopa saata, Isak haatana nama cuo.
29 Cuorasala saapa ta sapa saata ta Thlaapa ta sapa saata kha a hrisaathieruepa haata ata zaw hing a cuo.
30 Cuorasala Caapathepa ta tuokhaatama a ri? "Siizaanung hne a saacapaa kha a cade tie ung; siizaanung saata taca hyazang pata a aw nung saata hneta ru cu hnepakhaw khu'a vyi," a ta.
31 Cacuonakawta, uvnu zaw, kiema ca siizaanung saata ta cuo va puv, hyazang pata a aw nung saata tana ma cuo.