GALATI
Khrisaabuv'a Luo Paul Caapaphya
Zingsuv Khrih thuophaabie kha Judah ming a cuo lipa tie'a luo a pha tiyta, Khrihsaa hmisipa cuo riypa hingta Moses phungbie hing ziy a hu ma a hu vama, tapa biehiehriyna a puv. Paul taca, a hu vyi, Khrih chunglie ma hringna lie hing zangna dyi hing a hupa ta cuote, capa zangna cata Khazing hne kiema a lala lie kha adawna a pa-aw sa, a ta. Cuorasala Galati pe chung khrihsaabuv chekha luo kha Paul a dutuv chekha a vaw yite, Khazing hne a daw riypa taca Moses phungbie ziypuo na a hu tapata ama ri. Galati pe hing Rom acuzaa ta a uvpa Asia Minor ruo chunglie a awpa tana a cuo.
Paul ta Galati caapaphya a capepa hing pacuvna pha lipa ta zangsuena luo aa chiypa tie kha aa hmuopa zangna luo a chiy pakhaa riypa a tingna hneta a capepa tana a cuo. Paul ta Khrih lucuotuv phapa a cuona kha khuopuv ta a daakhyi te, capa lucuotuv a cuona ca cawsaa nawhnyina ta changpa a cuo nakaw cuo li pata Khazing changpa a cuona kaw hne a rehriena zaw Judah ming a cuo lipa tie'a luo a cuopa kha a ri. Khazing hne cawsaa adawna riypa hing zangna thue dyi ta a cuopa kha a biepuvce ta a ripa ta a cuo. Cakhutaata, Khrihsaa hringzya tapa hing Khrih ma zangna taata a vya pyapa, duena thyipaa tana a cuo tapa kha a chuona luota a ri.
1
Bie-achangna
1 Cawsaa ta ina chang nakaw yi hne cawsaa nawhnyina ta cuo li pata, Zingsuv Khrih hne ama kha thiyna taata a pathu pakhaapa ma Paa Khazing ta changpa lucuotuv kama Paul hne
2 kama hne a awpa Khazing chungkhue uvnu zaw ta Galati khrihsaabuv tie kha caa maca paphya yi.
3 Abyipa Zingsuv Khrih hne ma Paa Khazing'a taata vihnyina hne diena ca nama cunglie aw mangsue.
4 Ata chuo, chuochiepa chung taahingta kiema kha hya pazang sa riypata, ma Paa Khazing khingna haata, Khrih ca ma suena cuo khata aa pi.
5 Rungnaana ca ama'a lie chuozaa ta aw mangsue. Amen.
6 Khrih vihnyina chung luo caa kupa yi kha a catlisa pata thuse ung cate thuophaabie hrangpa luo namaa palipa ca i nang na ina pa uo ungciy.
7 Thuophaabie hrangpa a aw nakawta i ripa cuo li pata, nama palung caa paluoluetuv hne Khrih thuophaabie kha thle a nangpa chekha ama aw nakawta ica tapa yi ta a cuo.
8 Cuorasala, kiema ma cuozaw, vuoruo taata a zuvpa avuoming ama cuo zaw tahmuo, kiema ma phupa thuophaabie hne aa lu lipa thuophaabie kha niema'a lie ama phu kieca, chiesa pata cuo mangyisue!
9 Ma ri ciepa haakhata, ata hing i ripakhaa, nama cuhluo ciepa thuophaabie hne aa lu lipa thuophaabie a phutuv pakhakha a aw kieca, chiesa pata cuo mangsue!
10 Kama hing cawsaa hmiephaa hmung riypa ma i zue, Khazing hmiephaa ma? A cuo li kie cawsaa palung patluo riypa a zue kanaa ang? Ata tepa hingtana cawsaa palung patluo kha i zue tapa kieca, Khrih sii ca cuo khu'a va ang.
11 Uvnu hne sieta zaw,note 1:11 Gk Uvnu zaw kama i phupa thuophaabie hing cawsaa'a taata cuo vyi tapa kha ica pachang sa khing yi.
12 Tahematapakieca, hingpa thuophaabie hing cawsaa'a taata i hmungpa cuo li pata cawsaa ta ina changpa yi zaw cuo vyi. Cuorasala Zingsuv Khrih ta a phupa bie thueta i hmungpa tana a cuo.
13 Judah phung chunglie i za hringzya kha ina pachangpasie ungciy. Khazing khrihsaabuv kha khuopuv ta za hrisaathierue ang te para riypata i zaa zue.
14 I phangbuo khuvhyi hrawlie ta Judah phung luo zaa pi vie ang te, ma mingchingmingvuo tie phungluo kha karuo awsa pata i zaa daakhyi.
15 Cuorasala i puv hluo baataata naa tlaw te a vihnyina ta naa upa Khazing ta,
16 a Saacapaa thuophaapa kha Jentail ming'a luo i phu riypata, a Saacapaa kha kama'a luo palung tluosa pata a za paluo sa tiyta, ahunghmuo ruena ca hie vayi ang.
17 Kama hluo ta lucuotuv zaa cuo tlipa tie a taw riypa zaw ta Jerusalem luo khaw va ang. Cuorasala Arabia ruo luo kha a catli pata si ang te, cakhutaa cata Damaskas luo i za kaa.
18 Kung thung khu taata Piter parie riypata Jerusalem luo khaw ang te ama'a lie ning hraa hlyipangaa i aw.
19 Abyipa nuta Jeim ri li pata lucuotuv hrangpa ahunghmuo a taw vayi ang.
20 Hinghaahingta i vya capepa hing Khazing hmielie hang va ang.
21 Cakhutaacata, Siria hne Silisia pe luo kha si ang te,
22 capa tepa cata Judea pe lie a awpa khrihsaabuv tie ta na pachang valie yi.
23 "Kiema malie zaa hrisaathierue tuvpa khana para a zaa zuepa zangna kaw kha a phu nguoluo," tapa dyi kha za thyi yite,
24 kama kawlie kha Khazing ama pathuosa.