8
1 Uvnu hne sieta zaw,note 8:1 Gk Uvnu zaw Masidonia khrihsaabuv tie'a lie pipa Khazing vihnyina kaw kha maca pachang sa khing yi.
2 Iema ca riethyi vuosuo laalaw pata ama aw raalaa pata ama palung tluotuvna hne khuopuv ta ama siypasana khata pahyasa pata pina luo aa chiy yi.
3 Tahematapakieca, iema ca ama cuo khu thiy tana palung thusa pata ama pi tapa kha i ri nguo, ama cuo khuna khungthing te tana ama pi.
4 Hing mingpathepa tie cuota rehriena lie hing amaa bya ra riypata kiema kha khuopuv ta paa malie ama kie.
5 Hingpa hing kiema ta ma za mangkhuona te dyi yi cuo li pata; iema'a na iema kha Abyipa'a luo a pi yite, Abyipa khingna haata kiema'a luo zaw kha malie amaa pi.
6 Cacuonakawta, hing re zaa pathutuv Titas kha hing duena re hing niema hrawlie kha a patlung pathla riypata ma chang.
7 Niema ca, zangna, bierina, pachangna, palungthuna, kiema malie nama duena kawlie hne hmangting kawlieta a phace pata nama tue tli pahaata, hingpa duena re kawlie zaw hing a phace pata nama patlung riypata maacaa khingkhyi yi.
8 Hingpa hing naw ica pipa yi ta cuo vyi, cuorasala nama duena hing a hmisipa a cuona zya kha i pachang khing nakawta malie tie palungthuna kha i vya paluo sapa tana a cuo.
9 Tahematapakieca, nama Byipaapa Zingsuv Khrih pahyana zya kha nama pachang, a hnyirungsa raalaa pata, niema cuota siypasapa ta aa li, capaca ama siypasana thueta niema kha a hnyirungpa nama cuona riypatana a cuo.
10 Capa kawlie cata ruena ica pi khingpa yi ca, huokung ningta nama za pathapa, a hrie zaw nama za hrie khingsapa re kha nama cuota a phapa tana a cuo,
11 ata hingta patlung tie ung. Nama hrie khingsapa haakhata niemata tah nama palang kiena a puvthe aa.
12 Pikhingna pathiypalung nama hnyi kieca nama hnyi lipa hmang kha mang li pata nama hnyipa hmang kha mang pata cupa pata nama cuo aa.
13 Malie a bya riypata niema cunglie hmangriy khang riypa kha i ri khingpa cuo vyi, cuorasala nama phuvhning ta namaa khing namaa nguo the riypata,
14 atalie nama hnyirungsa ning hing aa hubupa tie kha a bya ungla, niema zaw a hubu pata nama aw ningta iema ta a caa bya'a yi.
15 Caapathepa ta,
A hluvsa a pacungpa ta a hluv tuv hnyi li pata,
a cawta a pacungpa ta a phahla hlyi vyi, a ta.
16 Kama ta niema a bya khingna pathiypalung i hnyipa haata Titas zaw a pahnyi sa ratuv Khazing ca a law ungsiy.
17 Tahematapakieca kiema ta paa ma kie pakha malie a cuhluopa dyi cuo li pata, niema kha a caa bya khing tuv nakaw yi ta ama palungthu ta tah niema'a luo kha aa vaw aa.
18 Thuophaabie a phuna kawlieta Khrihsaabuv lie a ming pathuopa ma uvnupa kha ama hneta niema'a luo ma vya pathlie.
19 Cadyi cuo li pata, Khazing rungnaana hne kiema maacaa khingkhyina yi kha paluo sa riypata kiema ma hrie nguoluopa duena re kawlie zaw hing kiema hne tlawhne riypata khrihsaabuv ta re ama pipa tana a cuo.
20 Hingpa pahyasa pata pipa lasaw kaw rehriena lie hing suephawna maa taw li riypata maa cadang sa.
21 Khazing hmiekunglie dyi cuo li pata cawsaa hmiekunglie zaw a phapa hmang tue kha maa tingpa a cuo.
22 Cakhutaata, iema hne hingta ma uvnupa pakha vya pathlie pate, ama ca cuo hluvpuv ma hiehriypasie ciepa cuote a bya khingna pathiypalung a hnyipa a cuopa kha ma hmung, ata changchiy hingca niema kha aca zang tuv nakaw yi ta acaa bya khing hryly yi.
23 Titas hing niema a byana kawlieta i viesaa hne i rehriehne cuote, ma uvnu zaw hing ca khrihsaabuv biephyatuvnote 8:23 Gk Lucuotuv tie, Khrih rungnaana zaw ta ama cuo.
24 Cacuonakawta kiema ta maacaa palesakhyina kaw yi hne nama duena kha khrihsaabuv hmiekunglie kha aa luohuosa pata paluo sa tie ung.