4
1 Khazing ta, hingpa re hing a nangduena thueta malie a pahrie sapa a cuo nakawta ma palung chuo buo vyi.
2 A paruv ta tuepa nangzaa aa chiypa hmang bangkhuo kha thaw diy pate; zyate pata hmang tue kha khing lipa pata, Khazing bie zaw kha a cuo li pata ri va puv. Cuorasala biehmisipa kha a siesa pata paluo sa pate, cawsaa ta ama chiephathleduona lie pathuo sa tluo aa tla pata malie ama hmungthena riypata Khazing hmielie kha ma hring.
3 Ma phupa thuophaabie hing aa buvkhung kie zaw ma, a vie nguoluopa tie cuotana aa buvkhung aa.
4 Iema kawlie hingta ca, hing chuelyi khazing ta a zang lipa tie pathiypalung kha pazing te, Khazing hmingsuo ta a cuopa Khrih rungnaana thuophaabie khena kha ama hmung khu li riypata a tue yi.
5 Tahematapakieca kiema kaw kha ma phupa cuo li pata Zingsuv Khrih ca Abyipa a cuona kaw hne kiema zaw Zingsuv kawlieta niema sii ma cuona kaw kha ma phupa ta a cuo.
6 "Khena ca zingna chunglie kha khe se," a tapa Khazing ta Zingsuv Khrih hmielie Khazing rungnaana ta a cuopa pachangna kha ma pathiypalung chunglie malie a pakhepa.
7 Cuorasala hingpa kharuehaa aa chiypa cahrana hing kiema'a taata cuo li pata Khazing huopa a cuona zya kha a siena riypata a alyibi hne aa lupa kiema ta capa thlaapa rusue ca ma chaw.
8 A kuo bangkhuo taata malie ama carie puo raalaa pata kepatlaa va puv; palung luolue pata ma aw, cuorasala ma palung chuo buo vyi;
9 malie ama hrisaathierue, cuorasala thawpa ta cuo va puv; malie ama chipatyi, cuorasala rakyi va puv;
10 ma pangpa lieta Zingsuv hringna kha aa luo the riypata Zingsuv thiyna kha ma pangpa ta ma phyale pari.
11 A thiykhupa ma pangpa lie hing Zingsuv hringna aa luo khu riypata Zingsuv cuota thiy tyalya'a nang pata khy ma sa.
12 Cacuonakawta kiema chunglie ca thiyna ta re hrie te niema chunglie ca hringna ta re a hrie.
13 Caapathepa chunglie, "I zang nakawta i ri," a tapa haata, kiema zaw capa zangna thlaapa ca ma hnyi nakawta zang pate ma ri.
14 Tahematapakieca Abyipa Zingsuv a pathu pakhaapapaa khata kiema zaw hing Zingsuv hne khata malie pathu'a te, niema hne a hmiekung luo kha malie aa chiy aa tapa kha ma pachang.
15 A cuo, hingpa bangkhuo hing niema cuota cuote, Khazing vihnyina ca cawsaa hluv vie'a luo kha a pha hryly pahaata, Khazing rungnaana cunglie alawna hne pathuosana ca a le hryly aa.
16 Cacuonakawta ma palung chuo buo vyi. Ma saapa cuona ca ning kha hnang ning kha ta zuebung viele ra sala, ma thlaapa cuona ca ning kha hnang ning kha ta a thaa viele.
17 Cuokhata dyi ma angpa ruvnaana hingta pakhingpuo sa a pha lipa chuozaa rungnaana kha malie a parepa.
18 Tahematapakieca, kiema ta maa mangpuopa ca hmung khupa cuo li pata, hmung khu lipa tana a cuo; hmung khupa ca cuo pachangta cuo dyi cuote, cuorasala hmung khu lipa ca chuozaa cuota a cuo.