1 Nama hmiekunglie i aw ningta a pane ang te luohlaa luo i aw tiyta riephasa pata bie a ri thepa kama Paul ta Khrih nangnena hne duena ta paa ica kie yi. 2 Niema hne i aw ning hing chuelyi phungnote 10:2 Gk Saapa phung tana ma aw tapata a ruepa tie kha a nguona hne riephasa pata a du a hu li riypata paa ica kie yi. 3 Cawsaapa haatanote 10:3 Gk Saapa ta ma aw hmisi, cuorasala ma cawsaa cuona tanote 10:3 Gk Saapa cuona ta rie a du va puv. 4 Tahematapakieca kiema ma rie a duna cehre ca cawsaapanote 10:4 Gk Saapa cehre ta cuo vyi, a cusapa carie adaakhuona piehu zaw a para khupa Khazing cehre khata na ama cuo. 5 Khazing pachangna kha a pakhuopa bie a ina hne a palena kha para pate, Khrih ri a ngie riypata cawsaa ruena bangkhuo kha sii ta ma tue yi. 6 Nama ri-angiena tluo a tling khu taata ri a ngie lipa bangkhuo kha duote riypata a ting pacie pata ma aw.

7 Niema ca hmang kha a cungphang dyi ta na nama mang. Khrih huopa tana ma cuo namaa ta nguo kieca, niema haakhata kiema zaw Khrih huopa ma cuo rapa kha a thyi tie ung. 8 Abyipa ta niema kha para riypata cuo li pata sathaw riypata malie a pipa nawhnyina kha i palesakhyi tuv kiezaw ma a zaakhyi va ang. 9 I caapaphya ta caa pachiypa yi i lu riypa hing khing va ang. 10 Tahematapakieca, iema ta, "A caa ca kacu te a cahra, cuorasala a pangpa ta a aw puo kieca khaapapuv ta cuo tlung vyi, a bie zaw naathlie tluo'apa aw vyi,' ama ta. 11 Cahaapa cawsaa zaw cata, ma aw li pata caa lie ma ripa hing, ma aw thue zaw ta ma tue aa tapa hing pachang yi se.

12 Iema hne iema a pathuosa patie hne khata ca a pakhing pata a ripuo nguo'a vayi puv. Cuorasala iema hne iema kha malie hneta amaa pakhing tiyta ama ngaanapa khana ama paluo sa. 13 Cadyiseca, kiema hing a hlyikhung ta a pale'a va puv, Khazing ta malie a pipa re, luriy chunglie khana ri'a pate ma aw aa. Capa chunglie ca niema'a lie ma hriepa re zaw hing a te ra. 14 Niema'a luo ma vya chiy ning kha ma ruoriy law pata ma vya chiypa cuo vyi; kiema ca Khrih thuophaabie hneta niema'a luo a vya chiy taapa tana ma cuo. 15 Kiema ca a luriy law pata malie hrie ciepa re lieta a palepa cuo va puv; cuorasala kiema maa ruechuopa ca, nama zangna kha le viele'a te, niema hrawlie ma rehriena ruo zaw kha a ku viele riypa khana a cuo. 16 Cahaa cata niema nama awna ruo kha law pata, malie tie hrie ciepa re lie kha a pale li pata, thuophaabie kha ma ri khu aa. 17 "A palepa ca Abyipa'a lie dyi kha a pale se." 18 Tahematapakieca Khazing ta a khingpa ca ama hne ama a pathuosapa cuo li pata Abyipa ta a pathuosapa khana a cuo.