1 Kuvtuezuv'a luo hriykhung a rina sa hne aa patuv pata, ma bangkhuo ta "pachangna ma hnyi diy kaluo," tapa kha ma pachang. Pachangna hingta cawsaa kha ahruo patle sa te duena ta ca cawsaa kha a sathaw. 2 Cawsaa pakhakha ta i pachang tapata aa rue kieca a pachang riypa zaa ta pachang valie. 3 Cuorasala Khazing kha a duepa ca Khazing ta a pachang.

4 Kuvtuezuv'a luo hriykhung a rinapa sa ningna kawlieta ma ri kieca, "kuvtuezuv ca a hringpa a cuo li pakha," pachang pate, Khazing pakha ri li pata khazing hrangpa aw vyi tapa kha ma pachang. 5 Vuoruo lie cuose alyi lie cuose khazing ama tapa zaw ama aw ri aa. Cahaa cata khazing a hluvpuv hne byi a hluvpuv ama aw zaw ta 6 kiema cuota ca Paa, Khazing pakha dyi na a aw. Hmangting bangkhuo hing ama'a taata tuepa cuote, kiema zaw hing ama cuota a hringpa tana ma cuo. Cakhutaata Abyi pakha, Zingsuv Khrih kha aw te hmangting bangkhuo hing ama'a taata cuote, kiema zaw hing ama cuota a hringpa tana ma cuo. 7 Cadyiseca cawsaa bangkhuo ta capa pachangna ca hnyi vayi. Cawsaa chekha ca kuvtuezuv biena hne khata a zisa tli yite ata ning tepa hingta kuvtuezuv lie hriykhung amaa rinapa sa kha ama ning tiyta ca sa ca kuvtuezuv huopa khatana a cuo tapata ama zang. Ama ruena a caw nakawta capa sa ca malie a papyapalyi tapata ama rue. 8 Sa hingta kiema kha Khazing minghmiepha malie pahmung sa'a vyi. Ma ning li zaw ta maa sung vie riypa aw vyi, ma ning kie zaw ma maa mie vie riypa aw vyi. 9 Cuorasala nama hyazangna kha a thaadyapa tie a pachiyna ta pacuo sa kha ung. 10 Nangvuona a hnyipa niema zaw kuvtuezuv bienatluophie lie a tu ung cate sa nama ningpa kha pachangna thaa a dyapa tie ta ca hmung biephung yi sala kuvtuezuv lie hriykhung a rina sa kha ning riypata a thaa patlung sapa cuo'a vama? 11 Cahaa cata Zingsuv ta a thiykuopa, a thaa a dyapa na uvnu ca nama nangvuona nakawta a ra aa. 12 Cahaa cata nama uvnu cunglie kha sue ung cate, a thaadyapa ama chiephathleduona kha hmaa nama paphya nakawta Khrih'a lie nama sue. 13 Cacuonakawta, i ningpa sa hingna i uvnu a liena ta a cuo tapata a cuo kieca, i uvnu a lie li riypata khatiy tahmuo saa ce'a va tli ang.