1 Niema hrawlie pakhakha ta nama uvnu cunglie palung tling lina nama hnyi pata a cuo kieca mingpathepa tie'a luo cakuo cuopa ta, tuokhaatama a dang lipa chuelyi bierina zung luo a cakuo nguo? 2 Mingpathepa tie na chuelyi bie a ri'a yi tapa hing pachang va ung cama? Chuelyi hing niema na a bie a ripa'a ungciy tapata a cuo kieca hing bie saalipa hing ripa khu va ung cama? 3 Avuoming bie na ma ripa aa tapa hing pachang va ung cama? Hing chuelyi ma hringna lie maa tawpa bie changchiy hing ca ma ri riypa na a cuo. 4 Cahaapa bie nama hnyi tiyta khaapanakawma Khrihsaabuv ta siysaa ri lipa tie hmie luo nama chiykhyi? 5 Nama nang zaa naase tapatana i ri. Niema zangtuvnote 6:5 Gk Uvnu pakha hne pakha a lala lie bie chi riypata nama hrawlie mingsingpa pakha hmuo aw vyi tapa ca a cuo khu'a ma? 6 Zangtuv hne zangtuvnote 6:6 Gk Uvnu hne uvnu tazaa a cyi ung cate ma zanglituv'a luo ca namaa chiykhyi?

7 Pakha hne pakha tazaa namaa cyipa hing niema cuota asungna tana a cuo pacie tli. Khaapanakawma nama ang hriy thluo va? Khaapanakawma namaa padung sa thluo va? 8 Cuorasala niema tlaku ta nama uvnu cunglie kha hmangsue va tue ung cate nama dung.

9 Hmangpha lipa a tuepa tie ca Khazing pena cu'a vayi tapa kha pachang va ung cama? A dung kha ung; aparuvsuena a tuepa tie, kuvtuezuv abiepa tie, nungvaathingsuena a tuepa tie, capaa hne capaa, canung hne canung suena a tuepa tie, 10 a paruvpa tie, a karuo a awpa tie, sahmaa a pariypa tie, cawsaa thuo a pachipa tie hne a ruvhangpa tie ca Khazing pena cu'a vayi. 11 Niema chekha ca cahaapaapa catana nama za cuo. Cuorasala Abyipa Zingsuv Khrih ming hne ima Khazing Thlaapa chunglie ta pasiypa, pathe sapa hne duopacupa ta nama cuo tli.

12 "I cuota hmangting hing tue anaa vyi," cuorasala i cuota thlahnena naa pipa cuo vyi. "I cuota hmangting hing tue anaa vyi," cuorasala khaapa hmang tahmuo sii ta naa ziy kha se. 13 "Sa ca pavaw cuota cuote, pavaw ca sa cuota a cuo," cuorasala Khazing ta a suohning hingta a para aa. Ma pangpa hing aparuvsuena tuena cuota hmuo riypa cuo vyi, cuorasala ma pangpa ca Abyipa cuota cuote, Abyipa zaw ma pangpa cuota a cuo. 14 Khazing ta Abyipa kha thiyna taata pathu pakhaa te kiema zaw hing a cahrana ta malie a pathu pakhaa aa. 15 Nama pangpa hing Khrih pangpa chebuo a cuopa kha pachang va ung cama? Cacuonakaw Khrih pangpa chebuo kha la pata siyhrawnung pangpa chebuo ta i tue'a ma? Tue buo hluo'a va ang! 16 Siyhrawnung a awhnepa ca ama hne pangkha ama cuopa kha pachang va ung cama? Tahematapakieca Caapathepa ta, "Iema pahning ca pangkha ama cuo aa," a ta. 17 Cuorasala Abyipa hne a pazuepa ca ama hne thlaapa lieta suokha ama cuo aa. 18 Aparuvsuena kha cahriy tie ung. Cawsaa pakha ta a tuepa suena bangkhuo ca pangpa le luota cuote, aparuvsuena a tuepa taca ama pangpa cunglie hrahring khana suena a tue. 19 Nama pangpa hing Khazing'a taata hmung ung cate nama chunglie a awpa Thlaapa Pathe biena-ingnote 6:19 Or Hmangpathepa a cuopa pachang va ung cama? Niema ca niema huopa cuo va ungciy; 20 muo pipa ta calyipa tana nama cuo. Cacuonakawta nama pangpa kha Khazing rungnaana ta hmuo tie ung.