3
1 Cacuonakawta, uvnu hne sieta zaw,note 3:1 Gk Uvnu zaw niema'a lie hing thlaapa cawsaa tie'a lie i ripa haata ri khu va ang; cuorasala saapa khingna ta a hringpa tie hne Khrih chunglie a haatiy kaliepa tie'a lie ripa haata dyina i ri khu.
2 Sacuopa ta cuo li pata ahnungtiy tana ica caw yi, tahematapakieca niema ca sacuopa a ning khu riypata cuo va ungciy. Ata zaw hing cuo valie ungciy,
3 tahematapakieca thiysaa tana nama hring nguoluo kalie. Nama hraw lieta hietliena hne ahru-a-ina a aw chung bangkhuo ca thiysaa khingna hne chuelyi cawsaa khingna haatana nama hring cuo vama?
4 Tahematapakieca pakha ta, "Kama ca Paul a ziytuv tana i cuo," ta ung cate a hrangpa pakha ta, "Kama ca Apollos a ziytuv tana i cuo," nama ta kieca saapa cawsaa cakhawpa cuo va ung cama?
5 Cacuokie Apollos ca khaapatama a cuo? Paul ca khaapatama a cuo? Iema ca niema nama zang thena riypata Khazing ta cyicuo ta re a pipa rehrietuv tana ama cuo.
6 Kama ta a ciy i tuv. Apollos ta tiy a bya, cuo ra sala a palesathawtuv ca Khazing tana a cuo.
7 Cacuonakawta a ciy a tuvpa hne tiy a byapa ca a biepuv ta cuo vayi cuorasala a pale satuv Khazing dyina a biepuv.
8 A ciy a tuvpa hne tiy a byapa ca aa lupa cuo yite ama cyicuo ta ama hriena muo kha a hmung riypatana ama cuo.
9 Tahematapakieca kiema ca Khazing changtaapa, re a hrie pakhawpa cuo pate, niema hing Khazing lu, Khazing ing ta nama cuo.
10 Khazing ta ina pipa vihnyina thueta ing sa a thesapa haata inghruo kha bang tli ang te, a hrangpa pakha ta a cunglie kha a vya sa. A sapa pakha cyicuo ta tuokhaatama i sa aa tapa kha a raaring yi se.
11 Ahungtahmuo inghruo bang ciepa Zingsuv Khrih ri li pata inghruo hrangpa bang khu vyi.
12 Inghruo bang ciepa lie kha pakhakha ta siyy, ngu, alung muosungpa, thing, ngiediy, sacuo kung tapa tie kha hmuo pata a sa kieca,
13 a satuv cyicuo ama rehriepa khaapama a lu tapa kha paluo sa pata a cuo aa. Tahematapakieca Bierinapa ning thueta pakha cyicuo ta ama hriepa re kha khaapama a lu tapa kha myi ta paluo sa pata a cuo aa.
14 Inghruo bang ciepa lie ama sapa kha aa hmang kieca a satuv ca lawmuo a hmung aa.
15 A rehriepa ca myi ta a kuo kieca a sung'a te, ama ca khuo pata a cuo aa, cadyiseca myi chung taata hya a zangpa haatana a cuo aa.
16 Niema ca Khazing biena-ing cuo ung cate, Khazing Thlaapa nama chunglie a awpa kha pachang va ung cama?
17 Pakhakha ta Khazing biena-ing kha a para kieca, Khazing ta ama cawsaa kha a para aa, tahematapakieca Khazing biena-ing ca pathe te, niema ca capa biena-ing catana nama cuo.
18 Niema hne niema kha a dung kha ung. Niema chunglie ta chuelyi taana ta i sing aa tapa nama aw pata a cuo kieca, a singpa nama cuo riypata a ngaapa nama cuo na a hu.
19 Tahematapakieca hing chuelyi singna hing ca Khazing cuota ngaana tana a cuo. Caapathepa ta,
"Khazing ta mingsing tie kha
ama zyana mamaapa ta a pa-uo yi,
20 cakhutaata,
Abyipa ta mingsing tie ruena ca
muo hnyi lipa a cuopa kha a pachang," a ta.
21 Cacuonakawta ahungtahmuo caw-saa luochiytuv tie kawlie a pale kha se. Tahematapakieca hmangting hing niema huopa tana a cuo.
22 Paul cuose, Apollos cuose, Piter cuose, hing chuelyi cuose, thiyna hne hringna cuose, ata cuo cuose, hmie luo cuo cuose, hmangting bangkhuo hing niema huopa tana a cuo.
23 Cakhutaa, niema hing Khrih huopa cuo ung cate, Khrih hing Khazing huopa ta a cuo.