26
1 Agrippa ta Paul kha, "Na kaw kha nama ta vya ri tie," a ta. Paul ta a kuv kha vya pazuu te a sue lina kaw kha hinghaahingta a ri:
2 Siepahruo Agrippa, ata ning nama hmiekunglieta Judah ming ta sue ina phawpa yi palie hriy pata i sue lina kaw ri the riypa cuo i hmung nakawta i vuo a pha ciemuo tapata i rue.
3 Tahematapakieca Judah ming phungluo bangkhuo hne bie amaa ipa bangkhuo a pachang diytuv na cuo nakawta i bie ripa hing palung pasiysa pata naa na thliepa thi tie tapata icaa nue.
4 Judah ming bangkhuo hingta i cawta baataata tuokhaatama i hring tapa kha ina pachang diy yi. A hruothu baataata kama ca i cawsaa zaw hrawlie hne Jerusalem lie a awpa i cuopa kha ina pachang yi.
5 Ama ri khing pata a cuo kieca, ma biena lieta a pakangpahaacepa Farasi tie ta i cuopa kha ama pachang.
6 Ata zaw hing Khazing ta ma mingchingmingvuo tie'a lieta a za pipa biekuona i nguopuona kawlieta bierituv phuv hmielie i daapa a cuo.
7 Ca a nguopuona ca Israel ming phanghraahlyihning ta chung hne zuo hne Khazing zaa bie yite ma hmung aa tapata amaa zaa nguopuopa biekuona khatana a cuo. Capa a nguopuona kawlie cana, Abyipa,note 26:7 Gk Vya siepahruopa Judah ming ta sue ina phawpa yi hingta a cuo.
8 Khaapanakawma Khazing na a thiypa a pathu pakhaa tapa hing a cuo the li pata nama rue?
9 "Nazarethpa Zingsuv kaw hing i du khu thiyta i du aa tapata kama hrahring zaw i za rue buopa a cuo.
10 Capacana Jerusalem lie i za tuepa ta a cuo. Tluobyilepa tie'a taata nawpina za la ang te mingpathepa tie kha thaw chunglie i za pathlapa yi dyi cuo li pata iema ama thiena kawlie zaw a palung zaa tlingkhyipapaa ta i cuo.
11 Apungna-ing bangkhuo ta iema kha duo za tele yi ang te, Khazing ming ama ri pachie riypa kha i zaa zue. Iema cunglie i hi a za haa hringhruo nakawta iema hrisaathierue riypa khata ruohrang khypuv te ta i sihnuele yi.
12 Capa ruena hne cata, tluobyilepa tie nawpina hne pathliena ta Damaskas khy luo kha i si.
13 Ningchung hraw ta, Vya siepahruopa, luopuv lie i cakuole nguoluo pata ning laata a khe viepa avuo taata khena kha hmung ang te, kama hne i viesaa zaw cahriy lie kha a za khe.
14 Ma bangkhuo ta alyi lie maa lie ning kha, Hebru ryi ta, 'Saul, Saul, khaapanakawma kama kha ina hrisaathierue ciy? Asung cahrepa phyi ta chipa ca nama cuota muo pasana a cuo ta,' a tapa kha i thyi.
15 Kama ta, 'Abyipa, ahung tama na cuo?' i ta. Abyipa ta, 'Kama ca na hrisaathierue nguoluopa Zingsuv tana i cuo,' ina ta.
16 Cuorasala thu la na phyi ta a daa tie. Nama kha i changtaapa cuo riypa hne ata ning kama kaw na hmungpa hing hne ica pahmung sa kalie riypa kaw kha tehtekhuo riypatana icaa tlaw.
17 Nama kha ica pathlienapa na cawsaa zaw hraw taa hne Jentail ming'a taata ica khuo aa.
18 Ama ming kha pavuo sa'a yi cate iema ca zingna taata khena luo, Setaa cahrana taata Khazing'a luo kha amaa vya pali aa. Cakhutaa ama suena taata a ngiethena kha hmung'a yite kama zangna chunglie ta pathesapa tie hrawlie kha ama aw ra aa,' ina ta.
19 Cakhutaacata, Siepahruo Agrippa, kama ta capa vuoruo taata muocuo ca pa-uvsathyi li pata aw khu va ang.
20 A hmietaace ta Damaskas lie a awpa tie, cakhutaa Jerusalem hne Judea ruochung bangkhuo hne Jentail ming'a luo te khata ama suena kha a ngiepachiy yite Khazing'a luo amaa vya pali riypa hne ama sue a ngiepachiyna kha tuena ta ama paluo sa riypata phung kha i chang yi.
21 Capa kawlie catana Judah ming ta biena-ing chunglie kha na patuv yite thie inaa nang yi.
22 Ata ning tepa hingta Khazing ta na due te, hinglie hing a daapa ta, a le a caw hmiekunglieta tehte i khuo pata a cuo. I ripa ca a hrangpa cuo li pata, Moses hne profet tie ta ama za ripa kha vya tling'a te,
23 Judah ming hne Jentail ming'a lie khuona khena kha pathyi sa riypata Messiahnote 26:23 Or Khrih ca ruvnaana kha te-ang'a te thiyna taata pathu pakhaapa a pakhana ta a cuo aa, tapa hing tana a cuo," a ta.
24 Paul ta a sue lina kaw a ri nguoluopa khata, Festas ta vya khisue te, "Paul, na palung a hmuo va tli! A hluv tuv caw cate na naa ngaakhyi tli!" a ta.
25 Cuorasala Paul ta, "I palung aa hmuo lipa cuo vyi, Abyipa Festas, cuorasala lungsingpya tana biedangpa ica chang.
26 Hmisi ta kieca, siepahruo ta hingpa hmang kaw hing a pachang diy, cacuonakawtana ama'a lie hing hyazangsa pata bie i ri. Tahematapakieca hingpa hmang hing nu pata, a cakiy lie tuepa a cuo li nakawta pachang li pata aw vaciy tapata i zang.
27 Siepahruo Agrippa, profet tie na zang yi ma? Na zang tapa kha ica pachang," a ta.
28 Agrippa ta Paul kha, "Hing cuo pachangta chunglie hingma Khrihsaa pacuo sa inaa ting ciy?" a ta.
29 Paul ta, "A catli zaw a haa zaw nama dyi hmuo cuo li pata ata ning i bie naa a thliepa bangkhuo hingta kama haata nama cuo riypata thlaa i chuo, i thaabuoliriy hing ri li pata," tapata a palie.
30 Cakhutaata siepahruo ca a daa te, muokiybyipa hne Bernis hne iema hne a tupa tie zaw kha amaa daa ra.
31 Ama pyapuole pata, pakha hne pakha kha, "Hingpapaa hingta thawtla aa phuvpa hne thiy aa phuvpa suena a tuepa aw vyi," amaa ta.
32 Agrippa ta Festas kha, "Hingpapaa hing Rom siepahruo'a luo na paduo aa hu va tapa kieca pathlie riypa na a cuo raalaa aa," a ta.