13
1 Antiok khrihsaabuv lie kha profet hne pacuvtuv chekha ama aw. Iema ca, Barnabas, Nikar tapata ama kupa Simeon, Sairin khypa Lusias, Herod bierina zung lie abyi a cuopa Minian hne Saul ta ama cuo.
2 Sa ning a uv yite Khazing ama biena lie kha Thlaapa Pathe ta, "Barnabas hne Saul hing i changpa yi re kha ama hrie the riypata na sangpa pathlyi ung," a ta.
3 Cakhutaata sa ning a uvna hne thlaachuona ta ama luv cunglie kha ama kuv khang yite ama pathlie.
4 Barnabas hne Saul ca Thlaapa Pathe pathliepa ama cuopa haata Seleusia khy luo kha si yite capa taacata Saipras luo kha tiypalaw ta ama si.
5 Salamis luo kha chiy yite Judah ming apungna-ing chunglie kha Khazing bie ama phu. Iema a byatuv riypata Johan kha amaa chiy.
6 Parala ruochung bangkhuo kha si yite Pafos khy luo te ama chiy ca pacuo a thepa, Judah profetpakhipa, a ming Bar-Zingsuv ama tapa kha amaa taw.
7 Ama ca ruo-uvtuv Sergius Paulus ama tapa, cawsaa sing ciemuopa, Khazing bie a thyi khing nakawta Barnabas hne Saul a kutuvpapaa a viesaa ta a cuo.
8 Pacuo a thepa Elimas (Grik ming) ta ruo-uv byipa kha Khazing a zang the li riypata Barnabas hne Paul kha a daakhuo yi.
9 Cuorasala Paul ama tapa Saul ca Thlaapa Pathe ta bi te, ama kha taapuo pata mang te,
10 "Setaa saacapaa, hmangpha bangkhuo cariepa, hanghiena hne phalina ta a bipa, aa dangpa Abyipa bie kha hanghie pata tue riypa hing taw buo'a va cama?
11 Naathlie tie, Abyipa kuv ta nama kha caa du'a te, cuokha chung na ming cue'a te ningkhepa kha hmung khu'a vaciy," a ta. Sungkha ta myiching hne zingna ta pahlaw te a kuv ta a ca-yale riypa cawsaa kha pathuole te a huv.
12 Ruo-uv byipa ta hmang a cuopa kha a hmung tiyta Khazing kha a zang, tahematapakieca Abyipa kaw ama pacuvpa khata a kharue a pahaa sa.
13 Cakhutaata Paul hne a viesaa tie ca Pafos taakhata Pamfilia ruo Perga khy luo kha tiypalaw ta ama si. Cadyiseca Johan ca iema kha thuse yite Jerusalem luo a kaa.
14 Cuorasala iema ca Perga taakhata Pisidia ruo Antiok luo kha ama pha. Sabbath ning kha apungna-ing luo vaa yite amaa tu.
15 Phungbie caa-uv hne profet caa-uv ama ri khu taata apungna-ing uvtuv byipa ta iema kha, "Uvnu zaw pasuna bie nama ri khingpa a aw kieca ri tie ung," a ta yi.
16 Cacuonakawta Paul ca a daa te a kuv a pazuu khu taata bie ri hruo aa thu:
Israel mingnote 13:16 Gk Cawsaa zaw, Israel ming hne Khazing abiepa Jentail ming zaw i bie hing naathlie tie ung.
17 Hingpa Israel ming Khazing hingta ma mingchingmingvuo tie kha a tlaw yite Izipt ruo lie khy ama sa ning kha mingphang lepa ta a tue yi. A cahrapa a kuv ta capa ruo taacata a pyakhyi yi.
18 Kung sawliy chung ruochung lie kha a mangsang yi.
19 Kanaan ruo chunglie mingphang phang sariy kha a para khu taayita kung zapaliy sawngaa chung capa ruo ca ru ta a pi yi.
20 Cakhutaata bieripatuv kha profet Samuel chuo te ta a pi yi.
21 Cakhutaata siepahruo kha a hie yite Khazing ta Benjamin mingphang Kish saacapaapa Saul kha pi yite kung sawliy chung siepahruo a cuo.
22 Ama kha phie te David kha siepahruo a pacuo sa. Ama kawlieta Khazing ta a ripa ca: 'Kama palung naa hmungpa Jesse saacapaa David kha i hmung tli; tue se tapata i khingpa bangkhuo kha ama hingna a tue aa,' a ta.
23 Hingpapaa ciypathla chung taahingta Khazing ta bie a za kuo tlipa haa yi khata Israel ming ca khuotuv Zingsuv kha a pi yi.
24 Zingsuv aa vaw hluo khata, Johan ta Israel ming'a lie kha sue a ngiepachiyna hne aa patuvpa tiy a nawna kaw kha a u khyilu tli.
25 Johan ca a re a tlung'a nang caw khata, "Kama hing ahung tapata ma ina rue ungciy? Kama ca nama huo nguoluopapaa khata cuo va ang; cuorasala ama ca kama hnang luo taata a vaw'a te kama ca a phyipakaw riy pathluo riypata hmuota a tla va ang,' a ta yi.
26 "I uv i nu zaw, Abraham chung-khue ciypathla zaw'a nata, a hrangpa Khazing a ciyzaapa zaw, khuona thuophaa ca kiema'anote 13:26 Hluo vie caa-uv lieca niema'a luo* a ta. luo pi pata ma cuo tli.
27 Tahematapakieca Jerusalem lie a awpa tie hne ama uvthyi tie ta ama kha za pachang lipa yi ta sabbath ning kyry ta ama ripa profet tie bie zaw kha a siyluo thyi khu the vayi. Cadyiseca ama ama thiena thue khata profet bie kha ama patling sa.
28 Thie tluo aa tlapa suena a cunglie ama hmung li thluo pata thie riypata Pilat kha ama hie.
29 Ama kaw Caapathepa lie aa capepa bangkhuo ama tue diy khu taata, vieluo cung taakhata pachung yite thluo lie ama paby.
30 Cuorasala Khazing ta thiyna taata pathu te,
31 ama hneta Galilee taata Jerusalem te khy a tlawhne tawpa tie'a lie kha ning hluvpuv aa luo. Iema ca cawsaa zaw'a lie kha a pachangkhyituv ta ama cuo.
32 Khazing ta ma mingchingmingvuo tie'a lieta bie a za kuopa yi thuophaabie khana ma ca vya phya yi.
33 Zingsuv kha pathu te kiema a samingsahlaa zaw cunglie hing a patling sa mangtli. Salm hlahningna lieta:
Nama ca i saacapaa tana na cuo;
Ata ning hing na paa tana i cuo," tapata a cape.
34 Thiyna taata pathu sa tli te, thuvna luo khatiy tahmuo a kaa li tli riypa kaw kha Khazing ta a ripa ca,
'David'a lieta a pathepa biekuona
i za tuepa kha nama ica pi aa,' a ta.
35 Cacuonakawta Salm caa-uv hmang hrang lieta a capepa ca,
'A pathepa na cawsaapa ca
thuvna a taw riypata pahya'a vaciy,' a ta.
36 Tahematapakieca David ca ama chuo chunglie Khazing re kha a za hrie ra. A thiy tiytanote 13:36 Gk Aa hmung tiyta a mingching-mingvuo tie'a lie kha paby yite a pangpa ca thluo chunglie kha a thuv.
37 Cuorasala Khazing ta thiyna taata a pathupa ca thuvna kha a taw va tli.
38 Cacuonakawta, uvnu zaw, Zingsuv thue hing tana sue a ngiethena thuophaapa ca niema'a luo phu pata a cuo, tapa kha pachang tie ung.
39 Capa Zingsuv thue catana a zangpa bangkhuo ca Moses phungbie ta hya aca pazang sa khu lipa yi suena taakhata hya nama zang.
40 Cacuonakawta profet tie ta ama ripa bie kha nama cunglie a tlung li riypata a raaring tie ung:
41 'Mang tie ung, niema cawsaa pahnyisue a hmuopa tie,
Nama kharue haa sala ra tie ung,
Tahematapakieca niema chuo lieta
i hriepa re hing,
malie ta aca chang pachaapa yi tahmuo,
nama zang buo hluo li riypatana a cuo,'
tapatana profet tie ta ama ri, a ta.
42 Paul hne Barnabas ca ama pyapuole pa khata hmiezaa sabbath ning thueta ama kaw kha ripakhaa riypata ama hry.
43 Apungna-ing lie apung ama pachuo taata Judah ming hne Judah biena luo a ngiepa Jentail ming hluvpuv khata Paul hne Barnabas kha ama ziy. Lucuotuv tie ta iema kha bie chang yite Khazing vihnyina chunglie ama aw pari riypata ama pasu.
44 Hmiezaa sabbath ningpa ca Abyipanote 13:44 Hluo vie caa-uv lieca Khazing* a ta. bie naathlie riypata a khypuv yalya chaa ta amaa hmya.
45 Cuorasala Judah ming ta cawsaazaapuv amaa hmyapa kha ama hmung tiyta ihnyi yite Paul ta a ripa kha esena cangta khuosa ta ama i.
46 Cakhutaata Paul hne Barnabas ca riephasa pata ri yite, "Niema'a lieta Khazing bie ri taa riypa hing a hu hringhruo. Cuorasala niema ta khing lipa ung cata chuozaa hringna hne aa phuv pata namaa rue li nakawta, ata hing ca kiema ca Jentail ming'a luo na maa pali'a tli.
47 Tahematapakieca Khazing ta bie malie a pipa ca:
'Niema ca Jentail ming cuota
khena cuo riypatana ica pachi tli yi,
Cacuonakawta khuona kha chuelyi dena te ta
phya tie ung,'" tapatana a cuo.
48 Capa bie ca Jentail ming ta ama thyi tiyta ama palung tluosa te Abyipa bie kha ama pathuosa. Chuozaa hringna hmung riypata lieriyoupoupa a hluvpuv kha zangtuv ta ama vya cuo.
49 Khazing bie ca capa ruo bangkhuo cata aa ze.
50 Cuorasala Judah ming ta Khazing abiepa hne pa-uvsathyi tluo aa tlapa Jentail canung tie hne khychung uvthyi tie kha pasu yite Paul hne Barnabas kha hrisaa yite ama ruo taata ama papya.
51 Cacuonakawta iema cunglie ama palung tling lina paluosana ta ama phyipazaa lie buvcing kha a cakhawsue siy yite Ikonium luo kha ama si.
52 Ziytuv tie ca palungtluona hne Thlaapa Pathe ta ama bi.