3
Yerusalem Nho: Qobo We' Khyad' Yu: Ra" Khyo
1 Yao: yao" byumyu" re zag zo: mung: akyang qeim tau: lhan" ra" vogaung: Yerusalem wa jeim" ava".
2 Ai: vogaung: wa Asang: mho dao: re magyo: Asang to" ra" tarha" re makhae: yu ngad: ra". Ai: vogaung: wa Asang re malam khug mung: bao" thaug' yu nae" re: mamho' ngad: ra".
3 Ai: vogaung: mae" zug: qe wa kyid' myang: qin" ra" khang khyi jham we' dau: ako". Tarha" agyi zug: qe wa- vae: saung" moe; geyang: shoqug: dakhai" re thao ba: ne, kao joe" sho' maqo" tang" to: losho' zo: so' kho' ko" ra" zag ne jham we' dau: ako".
4 Lapa qe wa yao: bam vin vo; qo: ra" qo re mayu lo: mhug' zo: mhug' shaug' na: ako". Khin jaung qe wa gyang" lho" ra" ja: re maca' majhad' kad' pye' mung: Mao"So: ra" jham: tarha" re yao: bam yao" akyu" qhid' mae" nai: sham" pye' ako".
5 Ngadqere: Asang wa ai: vogaung: mo" khug mae na: jo; ashi"- yao: wa jo: rure kad' mung: khonhae" re: shad' ru makad'- yao: wa ne, seim khao: ngo" yao" byu qejhao" din: man" ra" khyo re cili" byid' ra". Ngadqere: madin: man" ra" byu qe wa maba: qho' lo: za: shad' nghung" ra" khyo re xo' kad' na: ako".
6 Asang wa mung"dan: alhab' re ngoyang jhad' sad' paui" pye' byid: va". Yao: bam: vogaung: mo" jham re ngo phyo' qeim" pye' mung: yao: bam: vang jham we' gye byu zaung jham re phyo' sin" to: va"- ga: ta" ra". Vogaung: mo" jham re phao: lhaui: co' avako". Hau" mo" khyo jham wa byu khag' mana lomung: akeim jo; bam: ako".
7 Airu: lao" nga" byumyu" wa ngo re gyaug phug' lo mung: ngo byid' ra" tarha" re phug' cao" li" genae". Yao: bam re ngo mho" byid' ra" khyo rere: khonhae" mato" myhid' lo: ko" maba ein: lhaung" myid:- ngadqere: yao: bam wa ga-au: mae" we' dakhyo: za: magai: ra" byuna khyo" na: ako"- ga: ta" ra".
8 Asang wa lao" shige,. Ngo to" mung: mung"dan: jham re qobo zhaug' nae" ra" ba joe" sho' lao" na: qu" shige,. Ngo wa byumyu" re we' mung"dan: jham re khai: zhang mung: nga" nhag' jam: yo: dae re leim zo: nhao nae" ngo myid: phyid' to: va". Myid gye, geim" wa nga" nhag' jam: yo" ra" myi" yang phyo' qheim" pye' ru qhug' li" nae".
9 Ai: thao ngo wa mung"dan: jham mae" byumyu" qere tha" pye' mung:- yao: bam wa gatau so re mamho' lo: ngo re za: akyu" mho' li" genae". Yao: bam alhab' wa ngo re phug' cao" li" genae".
10 Mug: va: Ethiopia mang: mae byo: sin" na ko" ra" nga" byumyu" qe lhao" re: ngo jhao" xeim: cili" byid' li" genae".
11 Ai: yo, mae nga" byumyu" naonhaung" wa ngo re tau: lhan" ra" khyo we' sin: yang: mamyid: qho' ca" lo: genae". Ngad beim: mung: nhag' lam: myhao mo, yaug khao: ngo" re ngo: yang yu: pye' mung:- naonhaung" wa nga" gyang" lho" bam mae khonhae" re: dam: tau: lhan: lo: genae" mangad:-
12 Ngo wa ai: jo, qo mae nhag' lam: khyo" myid bo mung: ngo jhao" bao" thaug' yu nae" mho' yao: ra" byu qere nha: to: nae".
13 Mashid na: dang: ra" Israel byumyu" qe wa khag' rere: shad' nghung" ru makad' mamhug' ta" lo:- mapyag' vhan" lo: genae". Yao: bam wa na: dai mung: gug: gam za: qo" na genae"- khag' rere: magyaug ca" lo: genae".
Ngaui Bau" Ra" nghaui" caung:
14 Israel byumyu" qe we"- nghaui"caung: mung: bau: yang: hug' ge,-
Yerusalem we"- ni" nhag' lam: alhab' yang
ngaui bau" na wa,-
15 Asang wa ni" qobo dae re thao" nhao: pye' ava".
Ni" gyevo alhab' re yu: pye' byid: va".
Israel nho: kho:kham Asang wa
nao we' daga" na: ra"- ana" nao gyaug ci" nae" khyo pe" majo, lo:-
16 Yerusalem re Ziun vogaung: mo" we"-
dagyaug ni" lo, zhab' dapheim- lo,pau" dakhyo" wa,-
17 Ni" Mao"So Asang wa nao we' daga" na: ra".
yao" nho: kheim: so' wa nao re aung doe; nhao: ra" Asang wa ni" mathao mae
ngaui bau: mung: yao" jhid'de; nhag' lam" yang nao re kao so' asag' byid' li' nae".
Yao: wa ni" dao mae ngaui bau: ngaui lho" nghaui"caung: li" nae".
18 Yao: ngaui bau" ru wa poe leim: ra" mo, ngaui bau" ru we' dau: ra" ga: yao: bam ta" genae" ra" ayo, joe" lo: na: ra".
Asang wa
byuxa: vaqoe; yang kyaug' rure ngo thao" nhao: pye' mung:
ni" nga: yeim: rure ngo yu: pye' byid: va".
19 Nao re zag zo: mo, re ngo qobo dae byid: mung:
khyid gyug: mo, alhab' re khyad' yu ru we' taung bug: mang: khyo zaug byaung" lo" ra" mo, re
yham mug: khyo ngo: yang dam: jhui" yu nae" ra" ayo, wa joe" li" na: va".
Yao: bam: aqho' axag' re ngo: yang nga: yhe, khyo boe" nhao: pye' nae".
Amung: mug: myid: byu alhab' yang yao: bam re khin" li" genae".
20 Ai: byo: sin" lo" ra" ni" byumyu" qere ngoyang yham mug: khyo dam: jhui" yu mung:-
mug: myid: gam: sho' nao re mang qi nhao: ru we' dalhang dam: na: dai nhao nae" ra" ayo, joe" li" na: ava".
Asang ta" to: va".