7
Madin Man" Ra" Khyo" Zo: Vae Jao" Rure Asang Dao: Phyid' Ru
1 Dari kho:kham boe" ru byid zin ein: zin: lho" gug khye' lho" xin: byid ba: ba (Kesle lho") re- Asang: yang ngore mungdao: dalam: byid' ra".
2 Bethela mae" vobyu qe wa- Asang mae" shaman" jeju mho' yu nae" qhid' mae" Shareze we' Regemeleg re yao: shid' zo" nho: byu qe we' daga" qam: so' bo: thao" ra" Asang: Caung:pa" Yham khyo ye" ako".
3 Khinjaung qe we' lapa qere ceru: ga: dao: myid: nae" qhid' mae" nhao: ke' ako". Ngonhaung" wa zin lam: myo: sho' kad' lai: lo: ru we' dakhyo: lho" ngo" khye' mae zo:ve jao" mung: Caung:pa" Yham phyo' qheim" ru qhug' va" mathao mae kaug' qhui: na ca" shi: genae" i? ga: myid: nhao: ako".
4 Ceru wa ngo jhao" joe" li" ra" Asang: mungdao: ngad: ra".
5 Yao: wa- ce: zin: lam: nhad' xe geim" mae ai: mug: mae" byu qe we' khinjaung jham lho" ngo" khye' we' nhad' khye' gu: mae zo:ve jao" yang: kaug' ngug: ru wa ngore nga: yhe' ko" ru mangad: ein: yao: bam re ta" kyo: wa,.
6 Yao: bam zo: shaug' ko" ru wa yao: yao" vae: gyi: nae" qhid' mae" angad: ako" ein: yao: bam re ta" kyo: wa,- ga: ta" ra".
7 Yerusalem wa na: dai: ru we' vobyu byang" mung: vogaung: avai: ayae mae" vo jham mae za: mangad: vogaung" mug: thao shad' khaung: we' ba vao shad' bam khyid khaung: mae vobyu myo: sho' na ko" au: ceru wa qhid' phyao: mae" lapa qe: nhad' khyo" Asang ta" ra" dao: angad: ra".
Mho Dao: Magyo: Yang: Taung Bug: Mang: Khyo Pyaung" Nha: Pye' Qhug' Ra" Khyo
8 Asang wa Zekharia re ce: mungdao: byid' ra".
9 Ngo wa ganhae" gaco' nga" byumyu" qere ce: amyin" dao: byid: va". Naonhaung" wa tarha" din: nyang: ru boe" sho' kad' ca". Aimung: naonhaung" wa yao: cao: yao: gai: ru we' nhag' khyag' ru jho" qhu" byid: ca".
10 Naonhaung" nho: phaung gaung: mae na: ra" cug' mo" qe- cug' zo: nau" qe we' taungbug: byu qe- mangad: lao" myaung sho: yaug khag' re ngad ngad dazag zo: ge,. Aimung: yao: cao: yao: dae jho" te' nae" mau" dakyae ge, ein: ru ngad:-
11 Ngadqere: nga" byumyu" qe wa nhag' lam: qao mung: ngo mho: ru matae" gyo: ngad: ako". Yao: bam wa yao: bam: nhag' lam: re pyid' ci: ako".
12 Yao: bam: nhag' lam: rere: laug zang we' dakhyo: qao: nhao: to" ako". Nga" mho" shid' dao: re ganhae" gaco' yao: bam: phaung gaung: mae na: lai: lo" ko" ra" lapa qekhyo" yang ngo pyang: ke' rure yao: bam matae" gyo: geyang: ngo gyai: nhag' yo" li" va".
13 Yao: bam wa ngo jhau: ra" au: re matae" gyo: geyang: yao: bam akyu" mho' ko" ra" au: rere: ngo matau: byid:-
14 Yao: bam re taung bug: mang: mae yena: qin" ganae" qhid' mae" ngo: yang la qam" yang sham" pye' ru we' dakhyo: sham" pye' va". Ce: mug:myid gai wa khag' dayaug re: mana lo: sho' cae: jhug tag shapye' to: co' va"- ga" ru ngad: ra".