5
Dao" Lhau: Ra" Mugsug' Dang: Qhu" Lho
1 Ngo dam: qu" ke' re ce: lhang wa la mae dao" lhau: ra" mugsug' dang: dadang: re the' myao:-
2 Mug: lagyo: wa ngore pe" the' myao: i? ga: myid' ra". Ngo wa- la mae mugsug' dang: dadang: dao" lhau: rure the' myao:- aiwa gug daung" qhang mung: daxe daung" lu: ra" ein: tau" va".
3 Ailao" yao: wa- ngore Ai: dao mae wa damug: myid geim" mae zao" lo nae" nhang: kheim: re tung" te' to"- aimung: dashad' mae wa jham tang: mung: mhug' ta" ra" yaug khao: ngo" rere: yu: pye' nae"- ga: tung" te' to" ra".
4 Qam: so' bo: thao" ra" Asang wa yao: yao" yang ce: nhang: kheim: re nhao: ke' li" nae". Aimung: aiwa khug' hab' yaug khao: ngo" nho: yham we' jham tang: yang: mhug' ta" ra" yaug khao: ngo" yham mae vao lo" li" nae". Ai: ru wa yao: bam: yham mae jo; jo, mung: yao: bam re byo; qeim jao: mae to: co' li" nae"- ga: ta" ra".
Gyan Khug Mae" Myiqe: Dayaug Qhu" Lho
5 Mug: lagyo: dam: na: thug' li" mung:- Qu" qu" shi: wa,- gatau daja: dam: joe" li" na: ra"- ga: ta" ra".
6 Ngo wa ai pe" ngad: ra" i? ein: myid' va"
Yao: wa Ai wa ban" ngad mung: damug: myid geim" mae" qobo re ta" nug: ru ngad: ra"- ga: tau" ra".
7 Ai: ban" mae xa: yang kad' ra" apyid' de; ra". Ngo qu" na: au: re ban" pyid' bung" li" mung: ai: ban" khug mae myiqe: dayaug zaung: jo; ra".
8 Mug: lagyo: wa- Ce: myiqe: wa makhyang: mashab: ra" lo, mau" re ta" nug: ru ngad: ra"- ga: ta" ra". Aimung: yao: ai: myiqe: re ban" khug khyo deim" ke' mung: ban" pyid' re dam: deim" nghoe' pye' ra".
9 Ngo tau: qu" ke' re myiqe: shid' yaug wa qid ngho' langqhang: nho: daung we' dakhyo: qam: bo: ra" daung: yang ngo jhao" dao" lo: rure the' myao:- Yao: shid' zo: wa ai: ban" re gaug: yu mung: cidao" phao: lo" ako".
10 Ngo wa mug: lagyo: re yao: shid' zo: aire khai: khyo cilo" genae" laug i? ein: myid'.
11 Yao: wa Babelon khyo cilo" mung: yao: shid' zo: wa ai: qhid' mae" caung:pa" yham lo" zhaug' li" genae". caung:pa" yham bin: zhaug' au: re ai jo, qo mae ai: ban" re caung:pa" nae" qhid' mae" to" to" li" genae"- ga: ta" ra".