8
Gye We' Sin" Yang: Davi Aung Doe; Ru Jham
(1 Km 18.1-17)
1 Dayo, kyo thao re Davi wa Philisti byu qere mang yekhe' zin: mung: yao: bam re aung: pye' yang: mung"dan: dao mae yao: bam zaui" ci: ra" khyo re pin" pye' ra".
2 Ai: thao yao: wa Moba byu qere aung: pye' ra". Yao: wa kyam: byu qere myid gaung mae lhang" to: mung:- sam yaug mae" shid' yaug yaug re se' pye' ra". Aimung: Moba byu qe wa yao" qao: mae na mung: yao: re khang: ke' mo, boe" lo: ako".
3 Ai: thao yao: wa Suri mung" nho: Zoba kho:kham Rehob nho: yauggai zo: Hadadeza- re aung: pye' ra". Yao: eib: ra" Uphrad gyaung: mo" tho' dau mug: myid re dam: qo" yu nae" qhid' mae" Hadadeza ye" lo" au: Davi aung: pye' ru ngad: ra".
4 Davi wa aiyaug: nho: myao: jui: mo, dataung: nhad' yo re we' yao" gyezo: shid' tug re taung" yu: ra". Davi wa gyekhe' myao: lhin" dayo qhid' mae" za: myao: jham re tang" to: mung: dang: ra" gu: alhab' re wa qhao" kao: gyi: zhe' pye' ra".
5 Damasku vomo" mae" Suri byu qe wa kho:kham Hadadeza re bao" byid: nae" gyetab dalam: re nhao: ke' ako". Davi wa aire khe' zin: mung: shid' tug: shid' taung re se' pye' byid' ra".
6 Ai: thao yao: wa ai bam: mug: myid mae gyetab jamu kad' na: ra". Aibam wa yao" qao: mae na mung: khang: byid: mo, boe" lo: ako". Asang wa Davi re khyi" khao: ngo" mae aung doe; nhao: ra".
7 Davi wa Hadadeza nho: zug: qe ci ko" ra" qhang go jham rere: sham" yu yang:- Yerusalem khyo cilo" ra".
8 Yao: wa Hadadeza yang eib: ra" Beta we' Berothai vomo" shid' lam: mae" gyid: bo"- myo: sho' rere: cilo" ra".
9 Hadadeza nho: gyetab alhab' re Davi aung: pye' ra" khyo re Hamad kho:kham Toi the' gyo" ra".
10 Airumung: yao: wa kho:kham Davi re au" nae" we' Hadadeza re aung: pye' ru qhid' mae" yao: re ye khin" byid: nae" qhid' mae" yao" yauggai zo: Yoram re nhao: ke' ra". Toi wa aiyaug re myo: sho' lhang mang: zin" qu" ra". Yoram wa Davi re qhang ngaui: we' gyid: bo" yang kad' ra" jhaung qhu" myo: sho' ciye: byid' ra".
11 Kho:kham Davi wa aijham re yao" yang aung: yu: ra".
12 Edom- Moba- Amon- Philisti- Amaleg amyu" qemae" yao: yu: to" ra" qhang- ngaui we' Hadadeza mae" yao: lhad' yu: ra" lanyab mae" qhang- ngaui jham we' daga" caung:pa" rumae ci nae" qhaug' to" ra".
13 Yao: wa Xo: lao: khaung: mae Edom byu datug: she' taung re se' rumae" tug: lo: lao" Davi wa je: yang: lahau: qi" li" ra".
14 Yao: wa Edom mung" khyi" khao: ngo" mae gyetab jamu kad' mung: aimae na mo, wa yao" qao: mae" mo, boe" lo: ako". Asang wa khyi" khao: ngo" mae Davi re aung doe; nhao: ra".
15 Davi wa Israel mung" geim" re eib mung: yao" byu qere khonhae" re: tarha" din: vang" ru we' nyang nyang za: eib: rure ba nhao: ra".
16 Yoab wa gyezug: mo" ngad: mung: yao: myhi" wa Zeruia ngad: ra". Ahilu nho: yauggai zo: Yehoshaphad wa tung" xam: au: jhaung-
17 Ahitub nho: yauggai zo: Zadog we' Abiatha nho: yauggai zo: Ahimeleg shid' yaug wa khinjaung qe ngad: ako". Seraia wa kho:kham kho" mau" sang ngad: ra".
18 Yehoiada nho: yauggai zo: Benaia wa Davi nho: kao lhaug' mo; au: jhaung Davi nho: yauggai zo: qe wa khinjaung qe kad' ako".