5
Davi Israel We' Yuda Kho:kham Boe" Lo: Ru
(1 Km 11.1-9; 14.1-7)
1 Ai: thao Israel byu amyu" kaung alhab' Hebron mae Davi jhao" joe" li" mung: yao: re- ngonhaung" wa ni" sa: ni" sho: qe yao: ngad:-
2 Lai lo va" ayo, mae Sholu wa ngonhaung" kho:kham ngad: jo, shi" au: re lhao" re: nao wa Israel byu qere gye poe mae amyu" byu qere au: she: lo: ra". Nao wa yao" amyu" byu qere au: jhui" she: mung: yao: bam zug: kad' nae" ra" khyo Asang wa nao re dao:so: byid' to" ra"- ga: ta" ako".
3 Aimung: Israel byu qe: au: jhaung alhab' mo, wa Hebron mae Davi jhao" joe" li" ako". Yao: wa yao: bam we' gyang" lho" ra" myid vang" ba nam kad' yu mung:- yao: bam wa yao: re xau gyad byid' ako". Amung: yao: wa Israel kho:kham boe" lo: ra".
4 Davi wa yao: kho:kham boe" lo: au: yao" apyad sam xe zin ngad: ava". Yao: wa byid xe zin lam: lam: eib: lo: ra".
5 Yao: wa Hebron mae na mung: Yuda mung" re nhad' zin: dakhyug' eib: ra". Yerusalem mae na mung: Israel mung" geim" we' Yuda mung" re sam xe: sam zin lam: lam: eib: ra".
6 Ayo, joe" lao"- Davi kho:kham we' yao" byu qe wa Yerusalem re mang: zin: nae" to" lo" ako". Aimae na: ra" Yebusi byu qe wa Davi wa vomo" re aung nae" mangad: ga: jho: ako". Aimung: yao: bam wa yao: re nao wa cekhyo khonhae" re: maqo" vao li" nae"- myo, jid we' khyid qeim yaug lhao" re: nao re qo" tam" pye' li" genae"- ga: ta" ako".
7 (Ngadqere: Davi wa yao: bam: gyetab vogaung: Ziun re sang: yu mung: ai wa Davi nho: vomo" khyo" mang qi" lo: ra".)
8 Ai: ba mae Davi wa yao" byu qere cemae na mo, ngo qhi" Yebusi qere khag' nghang: ko" i? Yao: bam re se' ru ga" vako" i? Qid khyo: khyo" vao ye: mung: ai: myo,jid khyid qeim qere ye khe' zin: ge,- ga: ta" ra". (Ce: mathao mae myo jid we' khyid qeim yaug wa Asang: yham khyo magai: vao ye: ga: ta" ru ngad: ra".)
9 Gyetab vogaung: re bin: sang: yu thao- Davi wa aimae na mung: aire Davi vomo" ga: mhang" ra". Yao: wa ai lhang" gam: yang: vomo" re te" ra". Bug gaung: nho: ba thug' shad' myid dam: ke' pyang" ra" jo, qo mae" aire kad' qhid: ra".
10 Yao: wa je: qam: bo: li" ra". Pe"mung:ga"re qam: bo: thao" ra" Asang wa yao: we' daga" na yang: ngad: ra".
11 Ture mae" kho:kham Hiram wa phaga: phung: daphung: re Davi jhao" nhao: ke' ra". Yao: wa kho:kham kho" kad' nae" qhid' mae" qhoje; sag' thaung: jham we' lo, sama kad' mo,- laug kho' mo, re nhao byid: mung: Davi re bao" byid' ra".
12 Aimung: Davi wa Asang wa yao: re Israel kho:kham khyo" kad' byid: mung: yao" amyu" byu qe: mathao mae yao" mung"dan: re jo,nho" qo" nhao: ra" khyo re beim" ra".
13 Hebron mae" Yerusalem khyo bin: qui: thao- Davi wa myingai myo: sho' we' yham sang myhi" myo: sho' re yu mung:- yauggai myiqe: zo: qe je: myo: sho' qo" ra".
14 O mae" zoshao qe wa Yerusalem mae khau: ra" Davi yao: zo: qe ngad: ako". Aibam wa Shammua- Shobab- Nathan- Sholamon-
15 Iba- Elishua- Nepheg- Yaphia-
16 Elishama- Eliada- Elipheled ngad: ako".
Philisti Byu Qere Aung: Pye' Ra" Khyo
(1 Km 14.8-17)
17 Philisti byu qe wa Davi Israel kho:kham kad' va" khyo re the' gyo" ako". Aimung: yao: bam: gyezo: qe wa Davi re taung" yu nae" to" lo" ako". Ai: khyo re Davi the' gyo: lao"- yao: wa gyetab dalam: khyo gyo" ye" lo" ra".
18 Philisti byu qe wa Rephaim lao: khaung: mae joe" ye: mung: aire sang: yu: pye' ako".
19 Davi wa Asang re- Philisti byu qere ngo khe' zin: zai i? Nao ngore aung doe; ru byid: nae" i? ga: myid' ra".
Asang wa gai: ra"- yekhe' zin: wa,- ngo nao re aung doe' ru byid: nae" ga: tau" ra".
20 Airumung: Davi wa Bala Perazim khyo ye: mung: aimae Philisti byu qere ye aung: pye' ra". Yao: wa Asang wa qid gyui we' dakhyo: nga" gyevo qere lai: phyid' pye' ava". Aimung: ai jo, qo re Bala Perazim ga: mhang" ako".
21 Philisti byu qe tao" phao: byaug gelao" yao: bam wa yao: bam: so alho jham re to: co' ako". Davi we' yao" byu qe aire dao: cilo" ako".
22 Ai: thao Philisti byu qe wa Rephaim lao: khaung: khyo tug' ye: yang: aire ye dam: sang: yu: ako".
23 Davi wa Asang we' dalhang byin phyo: dam: zin" ra". Yao: wa cetau mae" ai bam re gye daye: khe' zin: wa,- ngadqere: lhang" ye: mung: gashad' thaung zo gae jham: nhae shad' khyo" yao: bam re yekhe' zin: nae" seim" to: wa,-
24 Sag' gae au: mae su" li" na thoe nao the' gyo: lao"- yekhe' zin: wa,. Pe"mung:ga"re Philisti gyetab re khe' aung: pye' nae" qhid' mae" ngo wa ni" qhid' au: mae su" ye" lo" li" nae" ga: tau" ra".
25 Davi wa Asang amyin" byid' to" rure kad' ra". Geba mae" Geze joe" sho' khyo thao" qang" Philisti byu qere qo" dam: khe' tug' pye' ra".