13
Amnon We' Tama
1 Davi nho: yauggai zo: Absalom wa yham maqo" shi" ra" yaung" ra" nhae: mo" Tama ga: ru dayaug qo" ra". Davi nho: yauggai zo: qe mae" Amnon wa Tama re jhid'de; ra".
2 Yao: wa Tama re saung" jhid'de; yang: no boe" li" ra". Pe"mung:ga"re yao: wa Tama re magai: the' yu nhohab mung: ra". Tama wa zomyi: gyang" ngad: ruyang yauggai qe we' majho" qhug' sho' na: ra".
3 Ngadqere: Amnon wa Davi nho: yao: mao: Shama nho: yauggai zo: Yonadab ga: mang mung: gyai qag: ra" byin cao: dayaug qo" ra".
4 Yonadab wa Amnon re- nao wa kho:kham pho" nho: yauggai zo: dayaug ngad: ra". Ngadqere: ba khao: ngo" nao kaug' na: rure ngo myao: ra". Pe"mung: i? ga: myid' ra". Yao: wa- ngo wa nga" nhaung: Absalom nho: nhae: mo" Tama re jhid'de; ra" ga: tau" ra".
5 Yonadab wa yao: re nao no mhug' mhug' yang: yab qo khyo lo" na wa,- nao re li" qu" nae" ni" pho" joe" li" lao"- yao: re jeju khyo" nga" nhae" mo" Tama re ngojhao" li" mung: zo:ve li" zho: nae" ta" byid: la,- ngo yao: re myao: ra" jo, qo cemae yao" yang zo:ve nyhang" byid: nae" rure ngo o: ra". Ai: thao ai: zo:ve re yao" yang: yao: ngore zho: nhao nug: ra" ein: ta" wa,- ga: ta" ra".
6 Aimung: Amnon wa no mhug' mhug' yang: yab qo khyo lo" na: ra". Kho:kham Davi yao: re kam: nae" li" ra". Ailao" Amnon wa yao: re- jeju khyo" Tama re li" nhao mung: ngo the' myao: ra" ce: jo, qo cemae mug cug dajhid' li" kad' yang: aire yao" yang yao: ngore zho: nhao la,- ga: ta" ra".
7 Aimung: Davi wa kho:kham kho" mae na: ra" Tama re- Amnon nho: yham khyo ye: mung: yao" qhid' mae" zo:ve dajhid' ye nyhang" wa,- ga: ta" nhao: ke' ra".
8 Tama wa ye" lo" mung: yao: re yab qo mae ye myao: ra". Tama wa cin man" phaui: dajhid' re yu mung: Amnon the' myao: ra" jo, qo mae mug cug dajhid' kad' ra". Ai: thao yao: wa ai: mug re kao mung:-
9 Ug' the" mae" vhe' yu yang: yao: re zho" ra". Ngadqere: Amnon wa mazo: ngad: ra". Yao: wa- yaug khao ngo" re nhao: ke' wa,- ga: ta" mung: yao: bam alhab' thug' lo" byaug: ako".
10 Ai: thao yao: wa Tama re- ai mug cug re nga" yab qo khyo cili ri:- amung: nao yao: lozho: la,- ga: ta" ra". Tama wa mug cug re ci yang: yao: jhao" te' ye" lo" ra".
11 Yao: re Tama mug byid' ke' au: yao: wa Tama re zaui" yu mung:- ngo we' yab lang:- ga: ta" ra".
12 Tama wa- mangad:- ceru" ra" phoe nae" lo,mau" re ngore dadeim" zag: kad' nhao la,- ai wa qu" ca' qu" gyaug taung" mau" ngad: ra".
13 Mo, phaung mae nga" myo, nho khoru: qo" dam: tau nae" i? Nao re: Israel qe: phaung mae bin sho' nga: yeim: byaug nae"- kho:kham pho" re ta" wa,- yao: wa ngore nao re byid: zho: nae" rure ngo ba:- ga: ta" ra".
14 Ngadqere: yao: wa Tama re matae" gyo: ngad: ra". Yao: wa Tama tho' qam: je: bo: ruyang yao: wa Tama re cad' aung: pye' mung: deim" zag yab: pye' ra".
15 Ai: thao re Amnon wa Tama re xo' sho' nghang" byaug: ra". Ana" yao: wa qhid' phyao: Tama re jhid'de; ra" tho' lhao" re: yao: wa Tama re je: nghang" byaug: ra". Yao: wa Tama re- thug' lo" wa,- ga: ta" ra".
16 Tama wa ngo mathug' lo" nae" ceru: ngore nhao: ke' ru wa ana" shi" nao kad' lo: ra" yug: mau" tho' je: qi" ra"- ga: ta" ra".
Amnon wa Tama re manug: tae" gyo: ngad: ra".
17 Yao: wa yao" daui daui yaug re khai: yu mung: ce: myiqe: re nga" qhid' kheim: mae" she: thug' pye' wa,. Taung gaung khyo deim" geim: thug' pye' mung: kham: kyao" pye' wa,- ga: ta" ra".
18 Ai: daui daui yaug wa Tama re taung gaung khyo ye deim" geim: thug' pye' mung: kham: kyao" kyao" pye' ra". Tama wa ai: pyad mae yham maqo" shi" ra" kho:kham myiqe: nau" qe lhaung" ve, ko" ra" bau: lo, qhang de; ra" bau: qhang re ve; ci: ra".
19 Tama wa yao" au: dao mae myiqe, gag: sin:- yao" bau: qhang re lao" cad'- yao" myo, khung: re yao" lo; yang nghoe' ci mung: ngug: phao: lo" ra".
20 Yao: mao: Absalom myao lao"- Amnon nao re mangad mangung: kad' va" i? Nga" nhae: mo" we" nhag' dataung" kaug' wa,- yao: wa ni" maung ngad: ra". Aimung: ai: khyo re khag' rere: data" kyo: wa,- ga: ta" ra". Airumung: Tama wa Absalom nho: yham mae yao: za: nhag' kaug' nhag' ngai yang: na: ra".
21 Boe" ra" khyo re kho:kham Davi the' gyo: lao" yao: wa nhag' jam: yo" ra".
22 Absalom wa- yao" nhae: mo" Tama re deim" zag: yab: pye' ru mathao mae Amnon re gyai nghang" ra". Amung: yao: re dao: lhao" re: majhau lo:ngad: ra".
Absalom Lage, Phaug' Ra" Khyo
23 Shid' zin kyo thao re Absalom wa Ephrim vogaung: nhae mae" Bala Hazora jo, qo mae yao" yao jham re yao mug' qaug: ra". Kho:kham pho" yauggai zo: qe alhab' re li" genae" lhaung: ra".
24 Yao: wa kho:kham Davi jhao" ye: mung: kho:kham pho" we"- ngo wa nga" yao jham: yao mug' re qaug: na:- aimae nao we' ni" zug: qe mali" qo" bobo genae" i? ga: ta" ra".
25 Kho:kham wa- nga" zo: we"- mali" qo" bobo nae"- ngonhaung" alhab' ai: khyo ye" re wa ni" qhid' mae" gyai aqug: akhai: ngad nae" ga: tau" ra". Absalom wa maqad maqui" ta" ra". Ngadqere: kho:kham pho" wa maqad ngad: ra". Yao: wa Absalom re thug' lo" nae" ta" ra".
26 Ngadqere: Absalom wa- gai va"- airulao" wa nga" mao: Amnon re khalhao" nao mali" nhao nae" i? ga: ta" ra".
Kho:kham pho" wa- yao pe"mung: li" nae" i? ga: tau" ra".
27 Ngadqere: Absalom wa lo" thao" mae Davi yang Amnon re nhao: ke' sho'- maqad maqui" ta" mung: yao" yauggai zo: gatau qe alhab' Absalom we' daga" cao" ye" lo" ako".
Absalom wa kho:kham dayaug re da" ruru: zo: shaug' poe dalam: nyhang" jaung: to" ra".
28 Amung: yao" daui daui mo, re- Amnon xo sho' bin: shaug' lao"- ba: qu" ge,. Ai: thao ngo amyin" byid' ke' au: yao: re se' pye' ge,- dagyaug ge,- aire ngoyao: qo yu nae". Vae" myid bo ge,- dayam" na ge, ga: mho" to" ra".
29 Ailao" daui daui mo, wa Absalom nho: mho" dao: re cao" gemung: Amnon re se' pye' ako". Davi nho: yauggai zo: qe dang: ra" mo, alhab' wa yao: bam: myao: dao do; zaung mung: phao: lo" ako".
30 Yao: bam yham khyo lo: na ko" au:- Absalom yang ni" yauggai zo: alhab' re se' pye' mung: ai bam mae" dayaug re: madang lo: ga" ga: Davi re ta" shid' ako".
31 Kho:kham pho" wa to" ye, mung: kaug' ru we' yao" mai bau: jham re lao" cad' pye' yang: myid gaung khyo lang" be; lo" ra". Aimae yao: we' daga" na: jo, ko" ra" daui daui mo, re: yao: bam: mai bau: jham re lao" cad' pye' ako".
32 Ngadqere: Davi nho: yao: mao: Shamma nho: yauggai zo: Yonadab wa Asang kho:kham we"- yao: bam ni" yauggai zo: qe alhab' re mase' pye' ngad: ako". Amnon za: ashid: ra". Yao: wa yao" nhae: mo" Tama re Amnon yang deim" zag: yab: pye' ra" ayo, mae" ceru: kad' nae" yao" myid mae myid: phyid' to: gau ngad: ra" khyo re Absalom re qu" yang: nao qo" ta" ra".
33 Amung: ni" yauggai zo: alhab' shid va" ga" ra" lau dao: re dalam" wa, Amnon dayaug za: se' pye' qhug' ra"- ga: ta" ra".
34 Ai: ayo, mae Absalom phao: lo" byaug: ra". Ai: ayo, mae zaung" na: ra" gyezo: pho" wa Horonaim shad' mae" khyo khyo" bug gaung mae byu phung: mo" zang gyo" lo: na ko" rure myao: ra". Yao: wa yao: the' myao: va" rure kho:kham pho" re lau yeta" kyo" ra".
35 Yonadab wa Davi re- azhao za: ngo ta" ru we' dakhyo:- aibam wa ni" zo: qe lo: na ko" ru ngad: ra"- ga: ta" ra".
36 Yao: cedao: bin: ta" we' Davi nho: yauggai zo: qe joe" vao lo: ako". Yao: bam ngug thug' li" gemung: Davi we' yao" zug: qere: alokho: sho' ngug: ako".
37-38 Absalom wa phao: lo" mung: Geshu kho:kham Amihu nho: yauggai zo: Talmai jhao" ye: yang: aimae sam zin yena: ra". Davi wa yao" yauggai zo: Amnon mathao mae ayo, myao" sho' kaug' ra".
39 Ngadqere: Amnon shid: rure yao: bin: kaug' lao"- yao: wa yao" yauggai zo: Absalom re gyai myid: ra".