SAMUELA SHID' LAM:
(2 SAMUEL)
Dao: Phung"
Samuela mug' sug' sao qhid' lam: ein: lam: re xo' lo" ra" Samuela mug" sug' shid' lam: ein: lam: wa kho:kham khyo" Davi wa sao qhid' mae Yuda mung" mug: thao shad' (1.4) Ai: thao Israel mung" mug: am: shad' bobo mung: mung"dan: geim" re Davi eib: ra" khyo mhomyi: ngad: ra". (5.24) Aiwa Davi yao" mung"dan: re ce: mung: yao" aya: tang nae" qhid' mae" yao" byumyu" phaung mae we' taung bug byuqe: qam: so' phaung mae gyevo qe we' khoru: khao" khyad' lo ca" ra" khyo re de: de: za: tung" xam" to" ra". Davi re: lam khug myid tang mung: Mao"So re gyaug phug' yaug we' yao" byumyu" yang yao: re jhaug' zaug gesho' qo" kad' yu: ra" yaug ngad: rure qhu" byid' to" ra". Ngadqere: yao: re dalhang lhang wa nhag' khyag' myid mabo yaug yao: yao" myid o: ru we' kao bau: ra" khyo re kad' yu nae" qhid' mae" qu" gyaug qu" lhaung sho' ra" qobo re shad' lhoe" nug: yaug ngad: ra" khyo rere: qhu" byid' to" ra". Yao: re Asang: lapa Nathan yang yao" qobo jham re qobo li" zhaug' lao"- yao: wa aijham re lhang: yu mung: Mao"So: yang nhao: ke' ra" qobo dae re khae: yu: ra". Davi nho: kao so' gyaung: khyo we' aung myaug: lo: ra" khyo jham wa Israel byu qenho: nhag' lam: mae gyai zaug: jo; ra". Airumung: ce thao: ne, ai: byumyu" qe nhag' lam: ngai: nhag' lam: thao" mung: yao: bam wa kho:kham gatau dayaug re dam: myid ko" ra" ayo, mae lao" re- aiyaug wa Davi we' dau: ra" yao" myid:zo: qemae" dayaug ngad: ra" Davi yao: zo: ngad: qa: we"- ga: sho' myid: ako".
1
Sholu Shid: Ra" Khyo Re Davi Ba: Ru
1 Sholu shid thao- Davi wa Amaleg byu qere aung: pye' yang: dam: tug' lo mung: Ziglag mae shid' ba lothang: na: ra".
2 Thao: ba re Sholu jamu mae" zolau: dayaug joe" li" ra". Yao: kaug' qhui: rure qhu" byid: nae" yao" mai bau: re lao" cad' pye' mung: myid zhai: re yao" au: dao mae gag: sheim" yu: ra". Yao: wa Davi jhao" ye: mung: phug' myao: taung" myid gaung khyo goe; gyo" ra".
3 Davi wa yao: re nao khai: mae" joe" li" i? ga: myid' ra".
Yao: wa ngo wa Israel byu qe: jamu mae" phao: loe; li" ru ngad: ga: tau" ra".
4 Davi wa pe" boe" rure ngore ta" kyo: la,- ga: ta" ra".
Yao: wa ngonhaung" gyetab wa gye poe mae" tao" phao: lo" va"- ngonhaung" byu qe myo: sho' se' pye' qhug' va". Sholu we' yao" yauggai zo: Yonathan re se' pye' qhug' avako" ga: phaug' tau" ra".
5 Davi wa- Sholu we' Yonathan shid va" khyo re nao khoru: ba: i? ga: yao: re myid' ra".
6 Yao: wa Gelboa bam mae ngo bobo mung: Sholu wa yao" gye lhae tad' mae nga: jo, mung: gyekhe' myao: lhin" jham we' myao: jui" ra" gyevo qe yao: jhao" te' lo: na ko" rure ngo myao:-
7 Ailao" yao: wa phaug' lo mung: ngore myao: mung: ngore khai: ra". Ngo wa yao: khai: rure tau: va".
8 Ngo khag' ngad: rure yao: myid' ra". Ngo wa Amaleg byu dayaug ngad: ra" khyo yao: re ngo ta" kyo".
9 Ailao" yao: wa cekhyo li" mung: ngore se' la,- ngo wa dae xo sho' de, va"- ngo shid: lo" na: kyi:- ga: ta" ra".
10 Aimung: ngo wa yao: jhao" ye: mung: yao: re yese' pye' va". Pe"mung:ga"re- yao: gyang: gyo" we' khoru: ngad ngad yao: shid nae" ngad: rure ngo ba yang: ngad:- ai:thao ngo wa yao" au: mae" ba maug: re we' yao" lo, mae" thang: re khyad' yu mung: nao jhao" ngo cili" byid' ra"- ga: ta" ra".
11 Davi wa kaug' mung: yao" mai bau: lao" cad' pye' ra". Yao" byu alhab' re: airu: kad' ako".
12 Yao: bam wa kaug' ngug mung: Sholu- Yonathan we' Asang: amyu" Israel byu qe: qhid' mae" myi" thao joe" sho' zo:ve jao" ako". Pe"mung:ga"re gye poe mae myo: sho' se' pye' qhug' lo: ako".
13 Davi wa lau dao: vin: lo: byid' ra" zolau: pho" re nao khai: mae" ngad: i? ga: myid' ra". Yao: wa- ngo wa Amaleg byu dayaug ngad:.
Ngadqere: ngo wa ni" mung"dan: mae na yaug ngad:- ga: tau" ra".
14 Davi wa yao: re Asang: yang khyin: to" ra" kho:kham pho" re nao khoru: vae" se' pye' i? ga: myid' ra".
15 Ai: thao Davi wa yao" byu dayaug re khai: yu mung: yao: re se' pye' wa,- ga: ta" ra". Ai: yaug wa Amaleg byu re se' khyo" pye' ra".
16 Davi wa kad' ra" mau" ngad:- ceru re nao yao: vin: li" ru ngad: ra". Asang: yang kho:kham kad' nae" khyin: to" ra" yaug re nao se' pye' ga: nao lhang: yu: lao" nao wa nao yao" gaung re dao: phyid' yu: ru ngad: ra"- ga: ta" ra".
Sholu We' Yonathan Mathao Mae Davi Kaug' Ru
17 Davi wa Sholu we' yao" yauggai zo: Yonathan mathao mae ce: ngug ji: re nghaui" ra".
18 Yuda qere mho" byid: nae" qhid' mae" amyin" byid' ra". (Aire Yasha nho: mugsug' paug' mae tung" xam" to" ra".)
19 Israel mung" bug gaung jham mae ngonhaung" nho: au: jhaung qe shid: ako".
Lhe" thao" ra" ngonhaung" gyezo: qe wa gyo" byaug: avako".
20 Aikhyo re Gat mae we' Ashkelon hau" mo" khyo mae dahau: ge,.
Philisti myiqe: qere dabau: nhao ge,.
So alho re caung:pa" ra" mo; myiqe: zo: qere dabau: nhao ge,.
21 Gilboa bug gaung jham mae mug: maqu- nghin makhyo" vashao:-
ai: mug: myid wa khonhae" re: myid gao: boe" jo, vashao:-
pe"mung:ga"re sulhe: qenho: go jham wa aimae nga: yeim taung" jo; jo; ako".
Sholu nho: go wa xau: yang: boe, ru maqhug' lo:ngad: ra".
22 Yonathan nho: lo,la: wa shid pho: ngad: ra".
Sholu nho: shae wa khag' rere: nhag' makhyag' qam: bo mo, re qam" khyo" mung: gyevo qere se' pye' ra".
23 Gyai mug' pho: we' jhid'de; ra" Sholu we' Yonathan wa daga" daui: na: mung: daga" shid: ako".
Zeim baung: tho' mye, mung: khang khyi tho' je: qam: bo: ako".
24 Israel myiqe: qe we"- Sholu mathao mae kaug' ngug ge,.
Yao: wa naonhaung" re mai bau: gai ane re vhe' byid' ra".
Naonhaung" re qhang ngaui laung sin" yang shaung: ava".
25 Lhe" ra" gyezo: qe gyo" byaug: avako".
Yao: bam wa gye poe mae se' pye' qhug' avako".
Yonathan wa bug gaung mae shid: jo; ava".
26 Nga" nhaung: Yonathan we"- ni" mathao mae ngo kaug' ra".
Nao wa ngore gyai jhid'de; lo: ra".
Ni" jhid'de; myid wa khoqhi" mug' pho: ngad: mung: myiqe: qe: jhid'de; myid tho' lhao" re: je: gai: ra".
27 Lhe" ra" gyezo: qe wa gyo" byaug: avako".
Yao: bam: shae lhae jham wa shapye' to: qhug' mung: akyu" mabo lo:ngad: ra" ga: nghaui" ra".