8
Amyu" Byu Qe Kho:kham Mho' Ko" Ra" Khyo
1 Samuela wa yao: mao" lo" lao"- yao" yauggai zo: qere Israel mung" mae tarha" agyi kad' nhao: ra".
2 Zoqhid' yaug: mang wa Yoela ngad mung: angai yaug wa Abiya ngad: ra". Yao: tao wa Bersheba mae tarha" agyi kad' ako".
3 Ngadqere: yao: tao wa yao: shid' tao: yao: pho" ave, gai re macao" ko" ngad: ra". Yao: tao wa ngaui qho nae" rumae za: nhag' lam: ke' mung: khug vag: jham re khae: yu yang: mung mau" jham re din: dangman" man: mata" phyid' byid: ngad: ako".
4 Ailao"- Israel au: jhaung qe alhab' jho" qham mung: Rama mae na: ra" Samuela jhao" ye: yang:-
5 Yao: re- qu" wa,- nao wa mao" lo" na: ru we' ni" yauggai zo: tao re: ni" ave, gai re macao" ngad: ako". Airumung: gaje: mung"dan jham qo" ko" ru we' dakhyo: ngonhaung" wa kho:kham qo" nae" qhid' mae" ngonhaung" re eib nae" kho:kham dayaug jaung byid: la,- ga: ta" ako".
6 Samuela wa yao: bam kho:kham mho' ra" khyo re mangaui ngad: ra". Aimung: yao: wa Asang re akyu" mho' ra".
7 Amung: Asang wa amyu" byu qe nao re ta" ra" gu: ja: khao: ngo" re tae" gyo: byid: wa,- yao: bam ngag: pye' ra" yaug wa nao mangad: ngad: ra". Yao: bam: kho:kham khyo" na rumae" ngo yaug lam: re yao: bam ngag pye' avako".
8 Ngo yao: bam re Egutu mae" jhui" thug' lo: ra" ayo, mae" yao: bam ngo mae" phaug' lo" byaug gemung: gatau: so jham re caung:pa" byid' ako". Yao: bam ngore khonhae" re: kad' lo ko" ra" khyo re ana" nao re kad' na: ako".
9 Aimung: yao: bam re tae" gyo: byid: wa,- ngadqere: yao: bam re gyai thin sho' ta" peim: byid: mung: yao: bam: kho:kham qeyang yao: bam re khoru: kad' li" genae" ra" khyo re sho' kyo: wa,- ga: ta" ra".
10 Samuela wa yao: re kho:kham mho' ko" ra" amyu" byu qere Asang yao: re ta" ra" khyo ja: khao: ngo" ta" kyo: byid' ra".
11 Samuela wa ceru wa naonhaung" kho:kham qeyang naonhaung" re kad' genae" ra" khyo ngad: ra". Yao: wa naonhaung" yauggai zo: qere gyezo: kad' nhao: li" nae". Daqhae: wa yao" gyekhe' myao: lhin" mau" mae zaui: nhao: li" nae". Daqhae: re wa myao: tab mae- amung: daqhae: re wa yao" gyekhe' myao: lhin" qhid' au: mae tao" ra" mau" re kad' nhao: li" nae".
12 Yao: wa aibam mae" daqhae: re byu dataung re eib: ra" zug:- daqhae: re ngo" xe yaug re eib: ra" zug: qe kad' nhao: li" nae". Naonhaung" yauggai zo: qe wa yao" yothaung: jham re phaug' byid:- yao" gaug zo re yad byid:- yao" shae lhae re kad' byid:- yao" gyekhe' myao: lhin" zai jham re kad' byid: ca" li" genae".
13 Naonhaung" myiqe: zo: qe wa yao" qhid' mae" sheim nae pyo: ra" xau kad' byid: mung: yao" vae: yhaung" mo, we' mug kad' mo, khyo" mau" zaui: byid: ca" genae".
14 Yao: wa naonhaung" nho: gai: thao" ra" yothaung: jham- sabyi khyae jham- zhanlun khyae jham yu: pye' byid' li" nae"- amung: aijham re yao: bam: zug: qere byid' pye' li" nae".
15 Yao: wa naonhaung" gaug zo daxe bam mae" dabam re yu pye' byid: mung:- naonhaung" sabyi mae" yao" zug: qe we' gatau zug: qere yu byid' pye' li" nae".
16 Yao: wa naonhaung" daui daui mo, we' naonhaung" gai: thao" ra" nung: jham we' loze jham yu: pye' byid: mung: yao" qhid' mae" mau" zaui: nhao: li" nae".
17 Yao: wa naonhaung" yao kyaung" mae" daxe mae" dadau: re yu: pye' byid: mung: naonhaung" yao" gaung wa yao" jeim qe boe" genae".
18 Ai: ayo, joe" lao" naonhaung" yao: khyin: yu ko" ra" kho:kham pho" mathao mae naonhaung" alokho: sho' nyhung: li" genae". Ngadqere: Asang wa naonhaung" nyhung: ra" khyo jham re matae" gyo: byid: nae"- ga: ta" ra".
19-20 Amyu" byu qe wa Samuela dao: re matae" gyo: byid: ngad: ako". Ngadqere: ngonhaung" kho:kham dayaug o: ra". Airulao"- ngonhaung" wa gatau: amyu" qe we' dau nae"- amung: ngonhaung" yao" kho:kham: yang ngonhaung" re eib ru we' gyekhe' poe mae" jhui" thug' mung: ngonhaung" gye poe re jhui" khe' li" nae" ngad: ra"- ga: ta" ako".
21 Samuela wa yao: bam ta" ra" gu: ja: khao: ngo" re tae"- gyo: byid: mung:- Asang jhao" yeta" kyo" ra".
22 Asang wa- yao: bam o: rure kad' mung: yao: bam re kho:kham byid: wa,- ga: ta" ra". Ai: thao Samuela wa Israel byu alhab' re yham khyo phao: lo" genae" ta" ra".