6
Dao: Thang" Ban" Dam: Tug' Lo: Ra" Khyo
1 Asang: Dao: Thang" Ban" Philisti mung" mae lho" nhad' khye' jo; jo; thao-
2 Mo,byu qe wa khinjaung qe we' ba: vha" mo, re khai: yu mung:- Asang: Dao: Thang" Ban" we' sin: yang: ngonhaung" pe" ru: kad' zai i? Yao" jo, qo khyo ngonhaung" dam tug' dai" ke' re aire pe" yang dai" ke' zai i? ga: myid' ako".
3 Yao: bam wa- Israel byu qe: Mao"So: Dao: Thang" Ban" re naonhaung" dam: tug' dai" ke' ngad: re- naonhaung" qobo qhid' mae" jhaung qhu" byid' ru we' daga" nhao: ke' ca" ako". Dao: Thang" Ban" wa jhaung qhu" mabo lo: magai: tug' lo" ngad: ra". Ceru: kad' yang: naonhaung" gai: shao: lo" li" genae". Yao: naonhaung" re xo' yang: pe"mung: qobo dae byid' rure ba: li" genae" ga: ta" ako".
4 Ngonhaung" yao: re pe" jhaung qhu" vhin: ke' nae" i? ga: mo, byu qe myid' ako".
Yao: bam wa qhang: yang kad' ra" byang alho ngo" lam:- qhang: yang kad' ra" qug alho ngo" lam:- Philisti kho:kham dayaug qhid' mae" dalam: lam: khyo" byid' ke' ge,. Naonhaung" alhab' mo; dao mae we' kho:kham ngo" yaug: dao mae qam" daja: re za: nhao: ke' byid' ra".
5 Naonhaung" wa ai: byang alho re we' naonhaung" mung"dan: re zai" qheim" pye' ra" qug alho re kad' ca" ako". Amung: naonhaung" wa Israel byu qe: Mao"So re nga: yhe' byid: ca" ako". Yao: wa naonhaung" re we' naonhaung" so jham- naonhaung" mung"dan: re qobo dae byid'- na: rure thang: re thang: pye' maba-
6 Egutu kho:kham we' Egutu byu qe we' dakhyo: pe"mung: naonhaung" nhag' lam: qao ang ko" i? Egutu mae" Israel byu qere yao: bam re nhao: ke' yo, joe" sho' Mao"So yao: bam re khoru: adu: adae: kad' nhao: rure dato" myhid' ge,-
7 Aimung: lhin" asag' dalam: we' khonhae" re: kyau: mavhin: qu" shi" ra" nung: myhi" shid' dau: re lhin" mae te' yang: nung: nau" tao re nung: yham mae keim" tug' to: ge,-
8 Asang: Dao: Thang" Ban" re yu mung: aire lhin" dao mae kai: ge,- ai: Ban" yae mae naonhaung" qobo qhid' mae" jhaung qhu" khyo" yao: re naonhaung" vhin: ke' nae" ngad: ra" qhang alho jham re ke' ge, lhin" re yao" khyo khyo nhao: ke' mung: yao: yao: za: ye" lo" nhao ge,.
9 Ai ye" lo" rure lhaug' qu" ge,- airu: Bedsheme vogaung: shad' khyo ye" lo" ngad: re ngonhaung" dao mae qug: khai: kyi" khyag' ru nhao: ke' yaug wa Israel byu qenho: Mao"So ngad: ra" lajheim: ngad: ra". Ngadqere: airu: mangad: re wa- ai: qam" re yao: nhao: ke' ru mangad ru we' yao: za: boe" ru ngad: ra" khyo re ngonhaung" ba: li" nae"- ga: ta" ako".
10 Yao: bam wa ta" ru we' dakhyo: kad' ako". Yao: bam wa nung: myhi" shid' dau: re yu mung: ai: lhin" mae te' ako". Nung: nau" tao re wa nung: yham mae pyid' lhaung" pye' ako".
11 Yao: bam wa ai: Dao: Thang" Ban" re lhin" dao mae ke' mung: qhang qug lho we' qhang byang lho bo: ra" ban" rere: daga" ke' ako".
12 Nung myhi" shid' dau: wa Bedsheme vogaung: shad' khyo su" lo" ako". Amung: khyothaung" mavao: lo: ai: khyo din: za: ye" lo" ako". Yao: tao ye" lo" zo" re myang: ye" lo" ako". Philisti kho:kham ngo" yaug wa Bedsheme mug: kyo: joe" sho' cao" ye" ako".
13 Bedsheme vobyu qe wa lao: khaung: mae jung: gaug: yad: na: ako". Yao: bam nyag din taung" tau: qu" ke' ko" re- Dao: Thang" Ban" re the' myao: ako". Yao: bam wa aire myao yang: ngaui bau" ako".
14 Ai: lhin" wa Bedsheme mae na: ra" Yoshu: ga: mang: ra" yaug: yo khyo joe" lo mung: laug bam mo" zang nhae mae lothang: jo; ra". Mo,byu qe wa ai: sag' lhin" re baug: kho' pye' mung: nung myhi" shid' dau: re se' yang: Asang re phad' ngaui" byid' ra" xeim: khyo" ngaui" byid' ako".
15 Levi byu qe wa ai: Asang: Dao: Thang" Ban" we' aimae bobo: ra" qhang alho jham re daga: vo; yu mung: laug bam qi: dabam dao mae kai" to" ako". Ailao"- Bed Sheme vobyu qe wa phad' ngaui" byid' ra" xeim: we' ngaui" xeim: gatau re Asang re ngaui" byid' ako".
16 Philisti kho:kham ngo" yaug wa ceru: kad' rure lhaug' qu" na: bam: ako". Ai: thao re ai ba mae yao: Ekron khyo tug' phao: lo" ako".
17 Philisti byu qe wa yao: bam: qobo qhid' mae" aphug' jhaung qhu" khyo"- Ashdod- Gaza- Ashkelon- Gat- Ekron vomo" dalam" qhid' mae" dalam: khyo" qhang byang alho ngo" lam: re Asang re vhin: ke' byid' ako".
18 Yao: bam wa qhang qug alho ngo" lam: rere: Philisti kho:kham ngo" yaug: yaug eib: ra" vang kad' to" ra" vomo" we' vang mabo: ra" vogaung: jham re eib: ra" kho:kham dayaug: qhid' mae" dalam: khyo" vhin: ke' ako". Asang: Dao: Thang" Ban" re yao: bam to" ra" Bedsheme mae" Yoshu nho: yo mae jo; ra" laung: mo" baui wa- boe" ra" khyo sagse: khyo" ana" joe" sho' aimae jo; jo; ashi"
19 Asang wa Dao: Thang" Ban" akhug khyo qu" ko" ruyang Bedsheme mae" byu nhad' xe zo: re se' tam" pye' ra". Amyu" byu qe wa yao: bam: phaung mae ai qhi" sho' ra" byu se' ru Asang: yang boe" nhao: ru mathao mae kaug' ngug: ako".
Kiriad Yearim Vogaung: Mae Jo, Ra" Dao: Thang" Ban"
20 Amung: Bedsheme mae" byu qe wa ce: gyang" lho" ra" Mao"So Asang: qhid' kheim: mae khag' qo" jo; i? Yao: re ngonhaung" mae" thug' lo" sho' ngonhaung" yao: re khai: khyo qo" nhao: ke' nae" i? ga: ta" ako".
21 Yao: bam wa Kiriad Yearim vobyu qere lagyo: jham nhao: ke' mung:- Philisti byu qe wa Asang: Dao: Thang" Ban" re lotug' byid' to" avako". Gyo" lo mung: aire li" dao: yu ge,- ga: ta" nhao: ke' ako".