28
1 Dayo, zo: kyo lao" Philisti byu qe wa yao: bam: gyetab we' daga" Israel byu qere gyekhe' nae" zang" ham: ako". Akhisha wa Davi re nao we' ni" byu qe wa nga" shad' mae bo yang: gyekhe' zai ngad: rure nao ba gau ngad naeva"- ga: ta" ra".
2 Davi wa ngad va" gai: gai yao: ngad naeva". Ngo wa ni" daui daui yaug ngad: ngoyao: pe" qo" kad' rure nao myao: li" nae"- ga: tau" ra".
Akhisha wa gai va"- ngo wa nao re khonhae" re qhid' mae" nga" kao lhaug' yaug kad' nhao nae"- ga: ta" ra".
Sholu Yui: Lapa Myhi" We' Byin Phyo: Jho" Zin" Ra" Khyo
3 Ana" Samuela shid: lo" byaug mung: Israel byu qe alhab' yao" mathao mae kaug' ngug: ako". Aimung:yao" vogaung: Roma mae yao: re nyhab' pye' ako". Sholu wa lo, kyo' qu" mo, alhab' we' yui: lapa myhi" qe alhab' re Israel mung" mae" khe' thug' pye' ra".
4 Philisti gyetab jham wa zang" ham mung: Shunem vogaung: nhae mae jamu li" kad' na: ako". Sholu wa Israel byu qe khai: zhang" yu mung: Giboa bam mae jamu kad' na: ra".
5 Sholu bam Philisti gyetab re myao lao"- qu" gyaug: ra".
6 Aimung: yao: wa pe" ru: kad' nae" rure Asang re myid' ra". Ngadqere: Asang wa pe" matau: byid: ngad: ra". Yab mo, khyo" re:- Urim: we' Thummim khyo" yang re:- Lapa qekhyo" yang re: matau: ngad: ra".
7 Ailao" Sholu wa yao" zug: qere- ngore yui: lapa myhi" dayaug qho byid: gela,- ngo wa aiyaug we' byin phyo: yezin: nae"- ga: ta" ra".
Yao: bam wa- Endo mae dayaug na: ga: tau" ako".
8 Alao" Sholu wa- yao: yao" gaung khyao re lhai" pye' mung: mai bau: gaja: gaug ve; ra". Mug: cad' thao ai: myiqe: re qhug' nae" qhid' mae" yao" byu shid' yaug we' daga" ye" lo" ra". Sholu wa yao: re- nga" qhid' mae" byo we' byin phyo: zin: mung: pe" boe" li" nae" khyo ngore ta" kyo: la,- ngo mang ta" ra" yaug: subyo re khai: ke' wa,- ga: ta" ra".
9 Ai: myiqe wa kho:kham Sholu pe" kad' lai: lo: rure nao ba: ra". Yao: wa lo, kyo' qu" mo, re we' yui: lapa myhi" qere Israel mung" mae" Khoru: khe' thug' pye' rure nao ba: ra". Aire- nao ngore myhi" yu yang: se' pye' nae" pe"mung: seim" na: i? ga: ta" ra".
10 Ailao" Sholu wa gyang" lho" thao: ce' to" ra" nao ceru: kad' yang: nao qobo dae byid' ru maqhug' nae" khyo daui: na: ra" Asang: mang re lao: yang dao:so: to" ra" ga: yao: re ta" ra".
11 Myiqe: myhi" wa,- ni" qhid' mae" ngo khoyaug re khai byid: zai i? ga: myid' ra". Sholu wa- Samuela re khai: byid: la,- ga: ta" ra".
12 Ai: myiqe: wa Samuela re myao lao"- gyi: hug' mung: Sholu re- nao wa ngore pe"mung: mhug' pyag' i? Nao wa kho:kham Sholu ngad: ra" lhe"- ga: ta" ra".
13 Kho:kham pho" wa yao: re dagyaug wa,- nao pe" re myao: i? ga: myid' ra". Yao: wa myid gaung mae" subyo dadau: thug' li" rure ngo myao:- ga: ta" ra".
14 Sholu wa pe" ru" ru ngad: ra" i? ga: myid' ra". Yao: wa phug' mao: dayaug thug' li" ra"- yao: wa bau: qhang ve; ci: ra"- ga: tau" ra". Ailao"- Sholu wa ai wa Samuela ngad: rure ba mung: phug' myao: ru we' myid gaung khyo goe; gyo" ra".
15 Samuela wa Sholu re- nao ngore pe"mung: cekaung: kag' i? Ngo dam: tug' lo sho' nao pe"mung: kad' i? ga: myid' ra". Sholu wa ngo wa qug: khai: mo" qhug' na: wo"- Philisti byu qe wa ngore gye kad' ako". Mao"So wa ngore shapye' pye' ava". Yao: wa ngore dao: phyid mabyid: lo:ngad: ra". Lapa qekhyo" re:- yab mo, jham khyo" re: mabyid: lo:ngad: ra". Aimung: ngo pe" kad' ca" rure ngore ta" kyo: nae" qhid' mae" ngo nao re khai: ru ngad: ga: tau" ra".
16 Samuela wa Asang wa nao re shapye' mung: ni" gyevo boe" lao"- nao ngore pe"mung: khai: i?
17 Asang nga" nhad' khyo" ta" to" ra" gu: re kad' ava". Yao: wa mung"dan: re ni" lo, mae" yu: pye' mung: Davi re byid' pye' ava".
18 Nao wa Asang: amyin" dao: re maphug' cao" ngad: ra". Amaleg byu qere we' yao: bam qo" gu: alhab' re bin sho' mase' tam" pye' ngad: ra". Ce: mathao mae ana" Asang wa nao re kad' na: ru ngad: ra".
19 Yao: wa nao re we' Israel byu qere Philisti byu qe: lo, khyo byid' pye' li" nae". Ne, mo" ba nao we' ni" yauggai zo: qe ngo we' daga" li" bona: li" genae". Asang wa Israel gyetab rere: Philisti byu qe: lo, mae byid' pye' li" nae"- ga: ta" ra".
20 Aijao" Sholu wa gyang: lang" lo" mung: myid gaung mae lhang" lhe' lhau yang: Samuela ta" ra" dao" yang gyaug: nin" na: ra". Yao: wa qam: nang" ra". Pe"mung:ga"re damyi khyeim daba gyam daja: re: mazo: ngad: ra".
21 Ai: myiqe: wa yao: jhao" ye: mung: yao: gyai gyaug na: rure ye myao: ra". Aimung: yao: wa Sholu re- kho:kham pho" we"- nao mho' rure ngo kad' yang: nga" kao so' re dan: pye' va".
22 Ana" ngo ta" rure jeju khyo" kad' wa,- ni" qhid' mae" zo:ve dajhid' nyhang" byid: li"- nao gyaung: qo" su" lo" sho' qam qo" nae" qhid' mae" nao zo: ca" ra"- ga: ta" ra".
23 Sholu wa ha: pye' mung: yao: pe" re: manug: zo:- ga: ta" ra". Ngadqere: yao" zug: pho" re: yao: re zo: nae" jhan" ra". Yao: wa lo" thao" mae nhag' lam: khyo" pye' mung: myid gaung mae" to" li" yang: yab jaung: dao mae zaung: ra".
24 Ai: myiqe: myhi" wa yao: xau sho' myhaug' to" ra" nung: nau" re lhau" se' ra". Ai: thao cin man" phaui: dajhid' re yu mung: aire lhang" mung: man" make' ra" mug re kad' ra".
25 Yao: wa zo:ve re Sholu we' yao" zug: shid' yaug: qhid' kheim: mae jaung byid' ra". Aire yao: bam zo" ako". Ai: myi re yao:- yao: bam to" lo" ako".