24
Davi Sholu Nho: Kaoso' Re Tang" To" Ru
1 Sholu Philisti byu qere mang: zin" rumae" Sholu dam: tug joe" lo lao"- Engedi nhae din"pyad' yo mae Davi na: ra" khyo yao: re ta" kyo" ako".
2 Sholu wa Israel mung" mae" gai: thao" ra" gyezo: sam taung re jhui: mung: Davi we' yao" byu qere yo: laug byo, ba thug' shad' khyo ye,- qho: ra".
3 Yao: wa khyoyae mae" yao yham jham khyo te' jo; ra" laug aug' khyo joe" lo mung: aimae ngha ye: nae" vao ye" ra". Aiwa nhaung" thao" shad' mae Davi we' yao" byu qe vho' na ko" ra" laug aug' mae yao: boe" ru ngad: ra".
4 Yao: bam wa Davi re- Ce wa ni" qhid' mae" agu gai ngad: ra". Yao: wa ni" gyevo qere ni" qam: so' lo, mae ke' byid: nae" khyo Asang wa nao re ta" to" ava". Nao nug: khyo" yao: re qo" kad' ra" ga: ta" ako". Davi wa lo, du: du" ye: mung: Sholu mabeim: lo: Sholu nho: bau: qhang thao dacug' re ye- lhai" phyid' yu: ra".
5 Ngadqere: thao re- Davi nho: aung khug nhag' lam: wa yao: re qug: khai: boe" nhao mung:-
6 Asang: yang kho:kham khyo" khyin: yu: ra" yaug nga" asang re Asang wa ngore dae mate' nhao vashao:- ngo wa yao: re dajhid' re: dae magai: te'- pe"mung:ga"re yao: wa Asang: yang khyin: to" ra" kho:kham ngad: ra"- ga: ta" ra".
7 Aimung: Davi wa yao: bam Sholu re gye mazin: nae" khyo yao" byu qere ba: gyo: gesho' ta" ra". Sholu wa to" mung: ai: laug aug' mae" yao" gyaung: khyo khyo to" lo" ra".
8 Ai: thao Davi wa yao" thao cao" ye: mung: yao: re- Kho:kham pho" we"- ga: khai: ra". Sholu wa lhang: lo mung:- Davi wa phug' myao" ru we' myid gaung khyo goe; gyo" mung:-
9 Ngo nao re dae te' nae" seim" ra"- ga: ta" ra" mo; dao: re nao pe"mung: tae" gyo" i?
10 Asang wa ana" yao: ce: laug aug' mae nga" qam: so' lo, mae nao re ke' byid' ra" khyo nao daqhae: yao: gai: qo" ba: yu: ra". Nga" byu qe wa nao re se' pye' nae" ngore ta" ako". Ngadqere: ni" qhid' mae" ngo kaug' mung: ngo wa nao re dajhid' re: dae mate' nae" ta" va". Pe"mung:ga"re nao wa kho:kham boe" nae" Asang: yang khyin: yu yaug ngad: ra".
11 Nga" pho" we"- qu" wa,- ngo zaui" ci: ra" ni" bau: qhang cug' re qu" ke' wa,- ngo wa nao re ngo qo" se' pye' ra". Ngadqere: ai: atha"- ngo wa ceru re za: lhai" phyid' yu: va". Ce: lo, mau" wa ngo wa nao re geim lau to" nae" mamyid- nao re dae te' nae" re: mamyid: ra" khyo nao re ba gyo: nhao nug: ra". Ngo nao re pe" daja: re: mashad' sho' ngadqere: nao wa ngore se' nae" kung" ra".
12 Nga" shid' yaug mae" khoyaug lam: shad' rure Asang wa dao: kho' byid: vashao:- nao ngore gye kad' ra" lo, mau" qhid' mae" yao: wa nao re qobo dae byid: vashao:- pe"mung:ga"re ngo nao re dajhid' re: dae mate' nae".
13 Nao wa makhyang" ra" mau" wa makhyang" byu qeyang kad' ako" ga" ra" ganhae" mae" dao: khyo: re nao ba: ra". Aimung: ngo wa nao re dae mate' nae".
14 Israel kho:kham pho" wa pe" re se' nae" seim" na: rure qu" ge,. Yao: pe" re cao" khe' na: rure qu" ge,- lakha: shid laug- khalha: re laug-
15 Asang wa dao: kho' li" nae"- nga" shid' yaug mae khoyaug shad' rure yao: myid: phyid' li" nae". Boe" ra" khyo re yao: qu" mung: ngore gug: gam byid' ra" ni" lo, mae" ngore khyad' yu: ra"- ga: ta" ra".
16 Davi dao: jhau thang lao"- Sholu wa nga" zo: Davi we"- nao Davi gaigai: ngad: i? ga: ta" mung: hug' ngug: li" ra".
17 Ai: thao yao: wa Davi re- nao jo: ra" ngo wa shad' ra". Ngo nao re airu: shad' ru kad' na: au: nao wa ngore gai kad' lo: ra".
18 Ana" ba nao nga" dao mae khoqhi" gai: rure qhu" byid' ava". Pe"mung:ga"re ni" qam: so' lo, mae ngore Asang: yang ke' byid: sho' ngadqere: nao wa ngore mase' pye' ngad: ra".
19 Byu wa yao" gyevo re taung: mung: dae mate' lo: khonhae" lhaung" nhao: ke' i? Ana" ba nao ngore kad' va" ra" mau" mathao mae Asang nao re shaman" byid: vashao: wo"-
20 Nao wa Israel kho:kham boe" nae" ru we' mung"dan: wa nao eib: ra" qao: mae xo' yang: qi" qhang: li" nae" rure dang za: ba va".
21 Ngadqere: nga" mang we' nga" yham khaung mang bin sho' mato" myhid' nae" qhid' mae" nga" myid:zo: qere nao tang" to: nae" khyo Asang: mang mae lao: yang: ngore dao:so: byid: la,- ga: ta" ra".
22 Yao: kad' nae" ga" rure Davi dao:so: byid' ra".
Ai: thao Sholu wa yham phao: lo" mung:- Davi we' yao" byu qe wa yao: bam vho' na: ra" jo, qo khyo tug' lo" ako".