18
1 Sholu we' Davi wa yao: shid' yaug dao: jho" jhau rure pin" pye' ako". Ai: thao Sholu nho: yauggai zo: Yonathan wa Davi re gyai" qu" jhid'de; mung: yao: yao" gaung re yao: jhid'de; ra" nho" Davi re jhid'de; ra".
2 Sholu wa ai ba mae" Davi re yao: we' daga" jhui" na: ra". Yao: re yham maphao nhao lo ngad: ra".
3 Yonathan wa yao: re gyai jhid'de; myid taui: yang Davi we' apyad ato byin cao: boe" nae" jham tang" ra".
4 Yao: wa yao: ve; ci: ra" bau: qhang re khyad' yu yang: aire Davi re- yao" gyekhin we' daga" byid' ra". Yao" shae- lo, la:- phyid' cui: rere: byid' ra".
5 Davi wa Sholu nhao: ra" gyekhe' poe alhab' mae aung myaug: ra". Aimung: Sholu wa yao: re yao" gyetab mae zug: kad' nhao: ra". Airu re Sholu nho: gyezug: qe we' yao" byu qe ngaui: ako".
Sholu Davi Re Nhung: Li" Ra" Khyo
6 Davi Goliad re se' pye' yang: tug' lo: au:- gyezo: qe yham khyo tug' lo: na ko" au: re Israel mung" vogaung: khao: ngo" mae" myiqe: qe Sholu re tug nae" ga: thug' li" ako". Yao: bam ngaui bau: taung" nghaui" caung:- go" nhan" mung:- lo, be, jhu jao kheim" be, na: ako".
7 Myiqe: qe wa- Sholu wa dataung re se' ava"- ngadqere: Davi wa datug' re se' ava" ga: nghaui" caung" ako".
8 Sholu wa ceru re mangaui ngad: ra". Yao: wa gyai nhag' yo" li" ra". Yao: wa Davi re wa datug yaug ga: ta" mung: ngore dataung yaug ga: za: ta" ako"- ga: ta" ra".
9 Yao: bam wa yao: re kho:kham kad' nhao: li" genae". Airumung: yao: wa ai ba na mae Davi re nhung mung: malam" lo:ngad: ra".
10 Ai: thao: ba Mao"So mae" joe" li" ra" makhyang" ra" byo wa Sholu re nyag din taung" li" jaung: mung: yao" yham mae ago we' dakhyo: atug' akhyug jhau: na: ra". Davi wa ba khao: ngo" yao: lhaung" kad' ru we' dakhyo:- tang: be; na: ra". Sholu wa lhae tad' ci: ra".
11 Sholu wa yao: yao: re- ngo wa yao: re khinqae mae geim: ze; te' to: nae" ga: yao: re yao: ta" mung: yao: wa lhae tad' re shid' lhang Davi re geim: ra". Ngadqere: Davi wa lhang khao: ngo" yho" pye' ra".
12 Asang wa Davi we' daga" na mung: yao: re shapye' pye' va" ruyang Sholu wa Davi re gyaug: ra".
13 Aimung: Sholu wa yao: re va: khyo nhao: ke' mung: byu dataung yaug: dao mae zug: kad' nhao: ra". Davi wa yao" byu qere gye poe mae au: she: ra".
14 Asang yao: we' daga" ngad: ruyang yao: kad' ra" mau" alhab' mae aung myaug: ra".
15 Sholu wa Davi nho: aung myaug: rure qu" xam" to: mung: yao: re je: lhao" gyaug: li" ra".
16 Ngadqere: Israel we' Yuda mung" mae" yaug khao: ngo" wa Davi re jhid'de; ako". Pe"mung:ga"re yao: wa- aung myaug' ra" au: jhaung ngad: ra".
Davi Sholu Nho: Myiqe: Zo: Re Lo, Xo' Xo' Yu: Ra" Khyo
17 Ailao" Sholu wa Davi re- ce wa nga" myiqe: zo: bai: mo" Merab ngad: ra". Nao wa lhe" ru we' kyid: ra" gyezo: khyo" ngore caung da" byid: mung:- Asang: gye poe mae mang: zin" ngad: re ni" yham sang myhi" khyo" ngo yao: re nao re byid: nae" ga" ta" ra". (Cekhyo" yang Philisti byu qe wa Davi re se' pye' li" genae". Yao: yao" yang pe" makad' ca" nae" ga: myid: jho: na: ra".)
18 Davi wa ngo wa- khag' ngad mung: ngo wa kho:kham pho" zamo, boe" nae" ru wa nga" yham khaung wa pe" ru" ru ngad: i? ga: ta" ra".
19 Ngadqere: Merab re Davi re byid: nae" ayo, joe" lao"- Mehola mae" Adrie ga: mang yaug re byid: zho" pye' ra".
20 Ngadqere: Sholu nho: myiqe: zo: Mikha wa Davi we' jho" ngaui: ako". Ce: khyo re Sholu the' gyo: lao"- yao: gyo" ngaui: ra".
21 Sholu wa yao: yao: re- ngo wa Mikha re Davi re byid: zho: nae". Ngo wa yao: re ci: yang: Davi re kung" nae". Yao: wa Philisti byu qeyang se' pye' qhug' li" nae"- ga: ta" ra". Aimung: Sholu wa Davi re shid' lhang ein: lhang nao wa nga" zamo, boe" nae"- ga: ta" ra".
22 Yao: wa yao" zug: qere Davi re sae za: kho:kham pho" nao re ngaui: ra". Yao" zug: alhab' re: nao re ngaui: ako". Ana" ce: ayo, wa yao" myiqe: zo: re lo,xo' yu nae" ayo, gai ngad: ra"- ga: Davi re ta" nae" amyin" byid' ra".
23 Aimung: yao: bam wa ceru re Davi re ta" ako". Yao: wa- myaung sho: yaug we' mang mathug' ra" yaug: qhid' mae" kho:kham pho" nho: zamo, boe" li" ru wa ce wa saung" yao: nga: yhe' ru ngad: ra" wo"- ga: tau" ra".
24 Zug: qe wa Davi ta" ra" dao: re Sholu re ta" kyo" ako".
25 Ailao"- Sholu wa Davi re- myhi" sag' phug' khyo" kho:kham pho" o: ru wa yao" gyevo qere lage, phaug' ra" khyo" Philisti byu dayo yaug: mao mae" au qid dayo lam za: o: ra" khyo re ta" kyo: nae" yao: bam re amyin" byid' ra". (Ceru wa Davi Philisti byu qeyang se' pye' qhug' sho' Sholu khoru: pha,jhi" khyug' ra" khyo ngad: ra".)
26 Sholu nho: zug: qe wa Sholu ta" ra" dao: re Davi re ta" kyo" ako". Davi wa kho:kham pho" nho: zamo, boe" li" na: rure myid yang: bau" na: ra". Lo,xo' poe dang: to" ra" ba na majoe" shire-
27 Davi we' yao" byu qe wa thug' ye" lo" gemung: Philisti byu shid' yaug re yese' pye' ako". Yao: wa ai bam: au: qid jham re kho:kham pho" jhao" cilo mung: yao: Sholu zamo, qo" boe" nae" qhid' kheim: mae aijham re yao: re nghe' byid' ra". Aimung: Sholu wa yao" myiqe: zo: re lo,xo' nae" qhid' mae" Davi re byid: zho: ca" byaug: ra".
28 Sholu wa Asang Davi we' daga" na mung: yao" myiqe: zo: Mikha re: Davi re jhid'de; ra" khyo re de: de: za: ba pye' ra".
29 Airumung: yao: wa Davi re jeyang: lhao" gyaug: li" mung: yao: daui: na: ra" myhao" yao" gyevo boe" ra".
30 Philisti gyezo: qe wa mang: lhaung" li" zin: zin: kad' ako". Ngadqere: gye poe khao: ngo" mae Davi wa Sholu nho: zug: gaje qe tho' je: aung: ra". Ai: mathao mae Davi wa gyai lahau: qi" li" ra".