16
Davi Xau Gyad: Ra" Kho:kham Boe" Lo: Ru
1 Asang wa Samuela re- nao Sholu mathao mae khomyhao" joe" sho' kaug' nae" i? Ngo wa yao: re Israel byu qe: kho:kham ngad: rumae" ha: pye' va". Ngadqere: zhanlun xau dajhid' zo: re yu yang: Yese ga: mang: ra" byu dayaug jhao" Betlehem khyo ye: wa,. Pe"mung:ga"re yao" yauggai zo: qemae" dayaug kho:kham kad' nae" ngo khyin: san: to: va"- ga: ta" ra".
2 Samuela wa ngo khoru: aire kad' nae" i? Aikhyo re Sholu the' gyo" re- yao: wa ngore se' li" nae" ga: myid' ra".
Asang wa nung: nau" dadau: re yu: yu mung: Asang re xeim: ngaui" ye ngaui" byid: nae" ngad: ra" khyo re ta" wa,-
3 Ai: xeim: ngaui" ngaui" byid' rumae Yese re khai wa,- nao pe" ru: kad' nae" rure ngo nao re ta" kyo: nae". Ngo ta" ra" yaug re kho:kham khyo" nao xau gyad byid' li" nae"- ga: tau" ra".
4 Samuela wa Asang yao: re ta" rure kad' mung: Betlehem khyo ye" ra". Ai: mae vogaung: mae" au: jhaung qe wa ko, ko, nin" zo" yao: re li" tug: yu mung:- ngaui pyo: yaug yo: ra" khyo" lae" li" i? ga: lham: myid' ako".
5 Yao: wa- ngad:- ngo wa Asang re xeim: ngaui" ngaui" byid: nae" qhid' mae" joe" li" ru ngad:- naonhaung" yao" gaung re kyang" san: pye' mung: ngo we' daga" cao" ge,- ga: tau" ra". Yao: wa Yese we' yao" yauggai zo: qere: yao: bam yao" gaung re kyang" san: pye' genae" qhid' mae" ta" mung: xeim: ngaui" ngaui" byid' ru khyo yao: bam re khai: ra".
6 Yao: bam joe" ye: gelao"- Samuela wa Yese nho: yauggai zo: Eliab re myao mung: yao: yao: re- Asang: qhid' mae ye; jo; ra" byu ceyaug wa dang za: nao khyin: yu va" yaug ngad: ra" i? ga: ta" ra".
7 Ngadqere: Asang wa yao: re- yao: wa khoqhi" qhang qhang- khonho" yaung" yaung" aire daqu" wa,- yao: re ngo ha: pye' va". Pe"mung:ga"re ngo wa byu dao: kho' ruru: dao: kho' yaug mangad:- byu wa adao shad' gaung khyao qu" ako". Ngadqere: ngo wa nhag' lam: re qu" ra"- ga: ta" ra".
8 Ai: thao Yese wa yao" yauggai zo: Abinadab khai: yu mung: yao: re Samuela jhao" jhui" lo: ra". Ngadqere: Samuela wa ceyaug mangad: Asang wa ceyaug rere: makhyin ngad: ra"- ga: ta" ra".
9 Ailao" Shama re jhui" lo: ra". Ceyaug re: mangad:- Asang wa ceyaug rere: makhyin ngad: ra"- ga: ta" ra".
10 Ceru: Yese wa yao" yauggai zo: nhad' yaug re Samuela jhao" jhui" lo: ra". Samuela wa yao: re- ceyaug mangad: Asang aibam mae" dayaug rere: makhyin: ngad: ra"- ga: ta" ra".
11 Ai: thao Samuela wa yao: re nao yauggai zo: gayaug maqo" lo: i? ga: myid' ako". Yese wa ngai: thao" yaug na shi"- ngadqere: yao: wa taung gaung khyo yao zam" na: ra" ga: tau" ra". Samuela cekhyo li" nae" yao: re ta" wa,- yao: majoe" li" li" wa ngonhaung" xeim: ngaui" mangaui" byid: nae"- ga: ta" ra".
12 Aimung: Yese wa yao: re nhao: ke' byid' ra". Yao: wa yaung" ru we' qao" phao" thang" yaug ngad mung: yao" myo, wa qhui qhui mung: ngad: ra". Asang wa Samuela re ceyaug ngad:- yao: re xau gyad byid: se,- ga: ta" ra".
13 Samuela wa zhanlun xau re yu mung: yao" yao: mao: qe: qhid' kheim: mae Davi re xau gyad byid' ra". Aijao" Asang byo wa Davi re jaung" mung:- ai: ba mae" yao: we' daga" na: ra". Ai: thao Samuela wa Rama khyo tug' lo" byaug: ra".
Sholu Kho:kham Kho" Mae Davi
14 Asang: byo wa Sholu mae" thug' lo" mung: Asang: yang nhao: ke' ra" makhyang" ra" byo: yang yao: re yhin" ra".
15 Yao" daui daui yaug wa Sholu re- Asang: yang nhao: ke' ra" byo: yang nao re yhin" na: rure ngonhaung" ba: ra".
16 Aimung: kho:kham pho" we"- ngonhaung" re amyin" byid: la,- tang: nyang" za: ba: be; ra" byu dayaug re ngonhaung" qho nae"- ai: makhyang" ra" byo nao jhao" joe" li" lao"- byu aiyaug wa yao" tang re be, mung: nao dam: gai: li" nae"- ga: ta" ra".
17 Sholu wa tang: nyang" ba: be, yaug re qho mung: yao: re ngojhao" jhui" li" geri:- ga: yao: bam re amyin" byid' ra".
18 Yao: khyi" na: ra" mo, mae" dayaug wa Betlehem mae na: ra" Yese wa tang: be, jhao: ra" yauggai zo: dayaug qo" ra". Yao: wa lhe: mung: yaung" ru we' gyezo: gai dayaug ngad mung: dao: jhau gai yaug dayaug re: ngad: ra". Asang wa yao: we' daga" na: ra" ga: ta" ako".
19 Aimung: Sholu wa Yese jhao" lagyo: qere nhao: ke' mung: yao zam" na yaug ni" zo: Davi re ngojhao" nhao: ke' byid: la,- ga: ta" nhao: ke' ra".
20 Yese wa Davi re Sholu jhao" cad' be, nau" dadau:- loze mae mug we' sabyi byang" sho' bo: ra" shoqid thaung dathaung re seim" ke' mung: nhao: ke' byid' ra".
21 Davi wa Sholu jhao" joe" li" mung: yao" qhid' kheim: khyo vao ye" ra". Sholu wa yao: re gyai o mung: yao" shae lhae vo, byid: yaug khyo" Davi re khyin: yu: ra".
22 Ai: thao Sholu wa Yese re- ngo Davi re o: ra". Ce: nga" qhid' kheim: mae na: jo, vashao:- ga: mungdao: pyang: ke' ra".
23 Ai ba mae" Mao"So: yang nhao: ke' ra" makhyang" ra" byo Sholu dao joe" li" khao: ngo" Davi wa yao" tang: re yu yang: lhaung" be; ra". Ailao"- makhyang" ra" byo wa lhaung" thug' lo" byaug mung: Sholu wa na pyo: mung: dam: lhaung" gai: li" ra".