12
Samuela Amyu" Byu Qere Mungdao: Ta" Ru
1 Ai: thao Samuela wa Israel byu qere- ngo wa naonhaung" mho' rure bin: kad' byid: va". Naonhaung" re eib nae" kho:kham dayaug ngo naonhaung" re byid: va".
2 Amung ana" naonhaung" re au: she nae" yao: re the' yu: avako". Ngo kam" wa mao: mung: au: phyu va"- nga" yauggai zo: bam wa naonhaung" we' daga" ngad: ako". Ngo wa nga" zolau pyad mae" ana" ba joe" sho' naonhaung" au: jhaung kad' lo va".
3 Ngo cemae na:- ngo daja: ja: kad' shad' re wa ana" ce: Asang: qhid' kheim: mae we' yao: khyin: to" ra" kho:kham pho" qhid' kheim: mae ngore qobo zhaug' gela,- dayaug yaug: nung:- mangad: lao"- loze re ngo yu va" i? Dayaug yaug re mhug' pyag' zo: mangad: lao"- zag zo: va" i? Dayaug yaug mae" khug vag: re ngo khae: yu va" i? Ce: jham mae" daja: ja: ngo kad' va" ngad: re wa ngo yu: yu va" ja: re ngo dam: tug' byid: nae"- ga: ta" ra".
4 Amyu" byu qe wa nao wa- ngonhaung" re mamhug' pyag' zo:- zag re: mazag zo: ngad: ra". Nao wa ngonhaung" khag' dayaug mae" re: pe" mayu: qu" ngad: ra" ga: tau" ako".
5 Ailao" Samuela wa ngo qobo pe" maqo" rure ana" ba naonhaung" ba: yu vako" ra" sagse wa Asang we' yao: khyin: yu: ra" Kho:kham shid' yaug ngad: ako"- ga: ta" ra".
Ngad va"- ngonhaung" sagse: wa Asang ngad va"- ga: yao: bam phaug' tau" ako".
6 Samuela wa xo' mung: Asang wa Moshe we' Arun tao re khyin: yu: ra" yaug- naonhaung" phug' pho" qere: Egutu mae" jhui" thug' lo: ra" yaug ngad: ra".
7 Ana" naonhaung" cemae ye; jo; ako". Naonhaung" we' naonhaung" phug' pho" qere khyad' yu nae" qhid' mae" Asang kad' lo: ra" qam: so' bo: ra" lo,mau" alhab' re naonhaung" re ta" peim: byid' ra" khyo" Asang: qhid' kheim: mae ngo naonhaung" re qobo zhaug' nae".
8 Yaku we' yao" yham byu qe Egutu mung" khyo ye: ko" au:- Egutu byu qe wa yao: bam re zag zo" ako". Naonhaung" phug' pho" qe wa bao" thaug' yu nae" qhid' mae" Asang re mho' yao gemung: yao: wa Moshe we' Arun tao re nhao: ke' byid' ra". Ai shid' tao wa yao: bam re Egutu mung" mae" jhui" thug' lo mung: yao: bam re ce: mug: myid mae na nhao: to" ako".
9 Ngadqere: amyu" byu qe wa yao: bam Mao"So re to" myhid' pye' gemung: yao: wa Philisti- Moba kho:kham- Hazora vogaung: mae" gyezug: pho" Sisera bam re naonhaung" phug' pho" qere gye kad' mung: aung: pye' nhao: ra".
10 Ailao" yao: bam wa bao" thaug' yu nae" qhid' mae" Asang re mho' yao: mung: ngonhaung" qobo shad' lhoe" bam va". Pe"mung:ga"re Asang we"- ngonhaung" wa nao mae" phaug' lo" mung: Bala we' Astared so alho jham re caung:pa" lo va". Gyevo qe: lo, mae" ngonhaung" re khyad' yu la, ngonhaung" nao re caung:pa" nae" wo"- ga: ta" ako".
11 Aimung: Asang wa Gidon- Barag- Yebtha lo" thao" mae ngore nhao: ke' ra". Ngonhaung" yaug khao: ngo" wa naonhaung" re naonhaung" gyevo qe: lo, mae" khyad' yu mung: naonhaung" gug: gam taung" qo" na: lo: ako".
12 Ngadqere: Amon kho:kham Naha naonhaung" re gye zin: nae" seim" ra" khyo re naonhaung" myao ko" au:- Asang wa naonhaung" kho:kham ngad: rure naonhaung" ha: pye' mung: ngore- ngonhaung" re eib nae" kho:kham dayaug ngonhaung" o: ga: ta" ako".
13 Ana"- naonhaung" khyin: to" ra" kho:kham cemae na: ra". Naonhaung" yao: re mho' ako". Ana"- Asang wa yao: re naonhaung" re byid' ava".
14 Naonhaung" Mao"So Asang re nga: yhe' byid: yao: re caung da" byid:- yao: re mho dao: gyo: byid:- yao" amyin" dao: jham re phug' cao" byid: mung: naonhaung" we' naonhaung" kho:kham wa yao" thao cao" yang: ngad ko" re alhab' gai: genae".
15 Ngadqere: naonhaung" wa Asang re mho dao: magyo:- yao" amyin" dao: jham re maphug' cao" yang: ngad: re wa- yao: wa naonhaung" re we' naonhaung" kho:kham pho" re gye kad' li" nae".
16 Airumung: naonhaung" yao" jo, qo mae ye; jo, mung: Asang kad' nae" ngad: ra" qi" qhang: ra" lo, mau" re myao: li" genae".
17 Ceyo, wa xaung: gaung ngad: ra" mangad: i? Ngadqere: ngo akyu" mho' nae"- Asang wa mug: dam: we' mug: re nhao: ke' li" nae". Ceru: boe" lao"- naonhaung" yao: re kho:kham mho' ko" ru wa gyai qi" ra" qobo re naonhaung" shad' lhoe" vako" ra" khyo ngad: rure naonhaung" myid: beim" li" genae"- ga: ta" ra".
18 Ailao" Samuela wa akyu" mho' ra". Ai: ba mae yao: Asang: wa- mug: dam: we' mug: re qu nhao: ke' ra". Airumung: amyu" byu qe alhab' mo, wa Asang we' Samuela re gyaug: li" ako".
19 Amung: yao: bam wa Samuela re nhag' bo pho" we"- jeju khyo" ngonhaung" mashid nae" ngonhaung" qhid' mae" ni" Mao"So Asang re akyu" mho' byid: la,- ngonhaung" wa ana"- ngonhaung" nho: qobo gatau alhab' kho:kham mho' ra" khyo" yang ngonhaung" wa qobo shad' lhoe" va"- aitho' mago" ngonhaung" nho: qobo gatau alhab' rere: myid: beim: va"- ga: ta" ako".
20 Samuela wa dagyaug ge,- naonhaung" airu" ra" makhyang" ra" khyo re kad' gesho' ngadqere: Asang mae" daphaug' lo" ge,- naonhaung" aung khug nhag' lam: alhab' we' yao: re caung da" byid: ge,.
21 So apyag' jham: thao dacao" ge,- yao: bam wa naonhaung" re maqo" bao" thaug' maqo" khyad' yu ngad: ako". Pe"mung:ga"re yao: bam wa agyang" mangad: ngad: ako".
22 Asang wa jhaug' zaug: ra" dao:so: to: mung: yao: wa naonhaung" re mashapye' nae". Pe"mung:ga"re naonhaung" re yao" byumyu" kad' nae" qhid' mae" yao: myid: phyid' to" ava".
23 Ngo kam" wa- naonhaung" qhid' mae" akyu" mamho' loyang: yao: re qobo shad' ru boe" nae" rumae" Asang tam" pye' vashao:- ai: atha"- ngo wa naonhaung" re gai: ru we' jo: ru pe" ja: ngad: rure naonhaung" re mho" byid: nae".
24 Asang re phug' cao" mung: naonhaung" aung khug nhag' lam: alhab' we' jhaug' zaug za: yao: re caung da" byid: ge,- naonhaung" qhid' mae" yao: kad' va" ra" qi" qhang: ra" lo, mau" jham re myid: beim: ge,.
25 Ngadqere: xo' yang: naonhaung" qobo kad' ko" ngad re wa naonhaung" we' naonhaung" kho:kham re se' tam" pye' li" nae"- ga: ta" ra".