SAMUELA DALAM:
(1 SAMUEL)
Dao: Phung"
Samuela tung" paug' dalam: ein: lam" paug' wa Israel byu qe tarha" agyi qe: pyad mae" kho:kham pyad khyo tha" vao lo" ko" ra" khyo re tung" xam" to" ra" jham: paug' ngad: ra". Ce: Israel byu qenho: tha" lo: ra" khyo mae- ajhaung boe" mung: byu sam yaug: gyo: mae lhang: yang: tha" lo: ra". Aibam wa tarha" agyi qi: qemae" lo" thao" yaug ngad: ra" Samuela- Israel byumyu" nho: kho:kham sao qhid' yaug Sholu we' Davi bam ngad: ako". Kheim: so' maqo" yu shire shidgyan nogyan lhe" lo: ra" Davi nho: khyo we' Samuela- Sholu bam: khyo jham wa yao: cao: jho" qo; ci: ako".
Ce: jham: phaug' nho: dao: au: kaung dai wa Dao: Thang" Axug' paug' mae mhomyi: we' sin: yang: tung" to" ra" gatau jham: paug' mae" we' dakhyo: mho dao: matae" gyo" ruwa qug: khai: kyi khyag' rure boe" nhao mung:- Mao"So re jhaug' zaug: ru wa aung myhaug: ra" shaman" jeju boe" nhao: ra" ga" ru ngad: ra". Ceru re 2.30 mae ngore nga: yhe' mo, re ngo nga: yhe' nae". Amung: ngore maphug' makhyad' kad' mo, re wa ngo maphug' makhyad' kad' nae"- ga: khinjaung Eli re ta" ra" Asang: mungdao: mae de: de: za: ta" to" ra".
Jham: paug' wa kho:kham eib li zao: to' lo" ra" khyo we' sin: yang: nhag' kyo: nhag' gyae kham zo" ra" khyo re tung" xam" to" ra". Asang yao: yao: wa Israel byu qenho: kho:kham agyang" khyo" jho: to" ru qhug' ngadqere: amyu" byu qenho: mho' yao: rure tau: byid' ra" khyo" Asang wa yao: bam: qhid' mae" kho:kham dayaug khyin byid' ra". Akhyag: ra" khyo wa kho:kham we' Israel byu qe geim" Mao"So: eib: ru we' dao: kho' ra" qao: mae na: jo; ru ngad: ra" (2.7-10) jo,nho" qo" mo, myaung sho: mo, daqi" za: amyu" byu alhab' mo; nho: akho: akhang" wa Mao"So: tarha" jham: qao: mae zam" to: qhug' ako".
1
Elkana We' Shilo Mae" Yao" Yham Khaung
1 Ephrim amyu" kaung mae" Elkana ga: mang: ra" byu dayaug na: ra". Yao: wa Ephrim bam mug: mae" Rama vogaung: mae na: ra". Yao: wa Yeroham nho: yauggai zo:- Elihu nho: yao: myid: ngad: ra". Yao: wa Zupha nho: kaung mae bobo mung: Tohu nho: yham khaung mae bobo yaug ngad: ra".
2 Elkana wa yham sang myhi" shid' yaug qo" ra". Hanna we' Peninna tao ngad: ako". Peninna wa zo: dau khau mung: Hanna wa makhau ngad: ra".
3 Elkana wa qam bo: thao" ra" Asang re caung:pa" nae" we' xeim: ngaui" byid: nae" qhid' mae" Shilo vogaung: khyo zin khao: ngo" ye" ra". Aimae khinjaung Eli nho: yauggai zo: Hepni we' Phineha tao wa Asang: khinjaung qe ngad: ako".
4 Elkana wa lhang khao: ngo" yao" xeim: ngaui" jham re Peninna qhid' mae" sho: gae bam dalam: yao: zo: qe: qhid' mae" gae bam dalam: lam: khyo" yang: ngaui" byid' ra".
5 Hana re yao: gyai jhid'de; sho' ngadqere: yao" qhid' mae" wa gae bam dalam: za: byid' ra". Pe"mung:ga"re Asang: wa Hana re zo: dau makhau nae" tam" to" ra".
6 Yao: re Asang: yang zo: dau mamyhung nae" qhid' mae" tam" to: yang: yao" mai qhi" cao: Peninna wa yao: re gug: kad' mung: maphug' makhyad' kad' ra".
7 Ceru zin khao: ngo" xo' boe" na: ra". Yao: bam Asang: yham khyo ye: khao: ngo" Peninna wa Hana re maphug' makhyad' gug: ce kad' na: ruyang yao: wa gyi: ngug: ru we' zo:ve mazo: lo: ha: pye' ra".
8 Yao" yham sang pho" Elkana wa yao: re Hana we"- nao pe"mung: ngug: na: i? Nao pe"mung: zo mazo: i? Nao pe"mung: khonhae" re ai qhi" gyang" taung" kaug' i? Ngo wa yauggai zo: daxe yaug tho' ni" qhid' mae" je: gai: mangad: i? ga: myid' ra".
Hana We' Eli
9-10 Daba mae Shilo mae" Asang: yham mae yao: bam zo bin: zo: gethao re Hana to" lo" ra". Yao: wa gyai nhag' lam: gyug: qam: shan: ru we' Asang re akyu" mho' zo" re alokho: sho' ngug: ra". Ai: au: khinjaung Eli wa yao" jo, qo kham: dung: nhae mae" yao" zaung tao" mae zaung: jo; ra".
11 Hana wa- Qam: bo: thao" ra" Asang we" ni" jeim myhi" ngore qu" la,- nga" qug: khai: re myao byid: mung: nao ngore myid: beim: la,- ngore dato" myhid' la, wo"- nao ngore yauggai zo: byid' ngad: re ngo wa yao: re yao" kao so' gyaung: khyo alhab' geim" nao re ngo qhaug' byid: mung: yao: khonhae" re: xae mako' pye' nae" ein: ngo nao re dao:so: byid' ra" ga: dao:so: to" ra".
12 Hana wa Asang re xo' yang: myao" sho' akyu" mho' ra". Eli wa yao" nhad' qid re lhaug' qu" na: ra".
13 Yao: wa sae sae za: akyu" mho' na: ra". Yao" nhad' qid wa lab: na ngadqere: thoe mathug' ngad: ra". Airumung: Eli wa yao: re yhid yid jho: ra".
14 Aimung: yao: wa yao: re yhid yid: qhu" na: rure thang: pye' wa,- nao yhid shaug' ru thang: pye' mung: gyang" li" wa,- ga: ta" ra".
15 Mangad:- lau:de, pho" we"- ngo yhid mayid- ngo khonhae" re: yhid mashaug' qu" ngo wa nhag' lam: thao" na:- ngo wa ngoyao" qug: khai: jham re Asang re ta" kyo: yang: akyu" mho' na: ru ngad:-
16 Pe" phug' made; ra" myiqe: dayaug khyo" ngore dajho la,- ngo nhag' lam: saung" myo: yang: ceru: akyu" mho' na: ru ngad: ga: tau" ra".
17 Eli wa- ngaui pyo: yaug yo za: lo" wa,- Israel nho: Mao"So wa nao akyu" mho' ra" ja: re byid: vashao: wo"- ga: ta" ra".
18 Ailao" Hana wa- ni" qhid' kheim: mae khonhae" re: ngo wa myo,nho qo" vashao: wo"- ga: phaug' tau" ra". Ai: thao yao: wa to" lo" mung: zo:ve zo" ra". Aimae" nhag' makaug' lo:ngad: ra".
Samuela Khau: Ru We' Qhaug' Byid' Ru
19 Thao: ba ne, kao Elkana we' yao" yham byu qe wa no' mae" to" mung: Asang re bin: caung:pa" thao Rama mae" yham khyo yao: bam to" phao: lo" ako". Elkana wa yao" yham sang myhi" Hana we' gaung sho: jho" zam" mung: Asang wa Hana nho: akyu" mho' dao: re tau: byid' ra".
20 Airumung: yao: wa gaung la" li" mung: yauggai zo: dayaug re khau: ra". Hana wa yao: re Samuela ga: mhang" byid' ra". Lajheim: wa yao: re Asang mae" ngo mho' yu: ru- ga" ru ngad: ra".
21 Elkana we' yao" yham byu qe zin khao: ngo" xeim: ngaui: byid: nae" we' yao: dao:so: byid' to" ra" gakai: lai xeim: re ngaui" byid: nae" qhid' mae" Shilo khyo ye: nae" ayo, joe" lo: ra".
22 Ngadqere: celhang Hana macao: ye: ngad: ra". Yao: wa yao" yham sang pho" re zoshao nug' kao: we' ngo wa yao: re Asang: yham khyo jhui" ye: nae". Yao: wa yao" pyad geim" aimae na: jo; li" nae"- ga: ta" ra".
23 Elkana wa- gai va"- nao myid: rure gai: thao" sho' kad' wa,- yao: re nug' kao" pye' sho' yham mae na wa,- Asang wa ni" dao:so: re jab byang" li" nhao vashao: wo"- ga: tau" ra". Airumung: Hana wa yham mae na mung: zoshao re nug' jhaug' gun caung yang: na: ra".
24 Hana wa yao: re nug' bin: kao: thao yao: wa Samuela re- Shilo khyo- sam zin bo: ra" nung: jaung lo: dadau: she cin man" phaui: dabye:- sabyi qang: shoqid thaung dathaung vin yang: Samuela re jhui" ye" lo" ra". Hana wa Samuela ngai shi" au: Shilo mae" Asang: yham khyo jhui" ye" lo" ra".
25 Yao: bam ai: nung: jaung lo: re bin: se' gethao- yao: bam wa ai: zoshao re Eli jhao" jhui" ye" ako".
26 Hana wa yao: re- Lau: de, pho" we"- ngore dazab dao: jhau nhao la,- nao ngore xam" i? Ngo wa cetau mae ye; jo, mung: Asang re akyu" mho' na: rure nao myao: lai: lo: ra" myiqe: ngad:-
27 Ngo wa yao: re ce: zoshao mho' mung: yao: wa ngo mho' rure byid' ava".
28 Airumung: ngo wa yao: re Asang re qhaug' byid' na: ru ngad:- yao: kao so' daui: na: myhao"- yao: wa Asang: qhid' mae" ngad: li" nae"- ga: ta" ra". Ai: thao yao: bam wa aimae Asang re caung:pa" byid' ako".