8
Dazid Nhad' Lam: Ein: Lam:
1 Yao Nau" wa ai: dazid nhad' lam: re phung" ke' lao"- mug:gaung dao mae yo,qug agaung: daqi" ko cae: tae" lo" byaug: ra".
2 Ai: thao Mao"So: qhid' kheim: mae ye; jo, ko" ra" mug: lagyo: nhad' yaug re ngo myao:. Yao: bam re labo" nhad' lam: byid' to" ra".
3 Sheim nae pyo" ra" ja: phad' ngha" ra" qhang khug' ci: ra" mug: lagyo: gatau dayaug phan nhae mae li" ye; jo; ra". Tao" khau" qhid' kheim: mae ye; jo; ra" qhang phan dao mae Mao"So: byu qe alhab' mo; akyu" mho' thoe we' daga" ngaui" byid: nae" sheim nae pyo" ra" ja:- myo: sho' yao: re byid' to" ra".
4 Mao"So: qhid' kheim: mae ye; jo; ra" mug: lagyo" nho: lo, mae" ai: sheim nae pyo" ra" ja: nga" ra" myikhug' wa Mao"So: byu qe: akyu" mho' thoe we' daga" do, lo" ra".
5 Ai: thao re mug: lagyo: wa ai: sheim nae pyo" ra" ja: ngha" ra" khug' re yu: yu mung:- aire phan dao mae" myi: ke' pyang" yang: myid gaung khyo pye' khyo" ke' ra". Ailao" mug: dam: dam: thoe- mug: gyug: gyug: thoe we' daga" lhe' cad' cad' mung: myid lab: lab' li" ra".
Labo" Jham
6 Ai: thao re mug: lagyo: nhad' yaug wa labo" nhad' lam: re ci yang: mad nae" seim" na: ako".
7 Mug: lagyo: sao qhid' yaug wa yao" labo" re mad: ke' ra". Ailao"- sa: we' lhag' to" ra" myi: we' lag qu jham myid gaung khyo qu: gyo" lo" ako". Myid gaung sam bam mae" dabam- sag' gae sam bam mae" dabam we' mhin: nyug alhab' nga" lo" byaug: ra".
8 Ai: thao mug: lagyo: shid' yaug ein: yaug wa yao" labo" re mad: ke' ra". Ailao" myi: nga" na: ra" bam qi: zang we' dau: ru daja: panglai: khyo gyo" lo" ra". Pang:lai: qid sam bam mae" dabam wa sa: boe" lo" mung:-
9 panglai: mae daui: na: ra" ja: cao jab sam bam mae" dabam shid: lo" ru we' qid sang pho sam bam mae" dabam wa byo; qeim: lo" byaug: ako".
10 Ai: thao mug: lagyo: sam yaug ein: yaug wa yao" labo" re mad: ke' ra". Ailao" myidam we' dakhyo:- myishae de; ra" kyi qi: dace' wa mug:gaung mae" byid: gyo" lo" mung:- qid gyaung: sam bam mae" dabam mae we' qid thug' jham mae gyo" lo" ra".
11 (Ai: kyi mang wa akho: ga" ru ngad: ra") Qid sam bam mae" dabam wa kho" lo" byaug mung: ai: qid kho: shaug' ra"- mo,byu myo: sho' shid: lo" ako".
12 Ai: thao mug: lagyo: byid yaug ein: yaug wa yao" labo" re mad: ke' ra". Ailao" ba sam bam mae" dabam- lho" sam bam mae" dabam- kyi sam bam mae" dabam wa byo; qeim: lo" mung:- yao: bam bao: ra" bo" bao sam bam mae" dabam sham: lo" yang: na" sam bam mae" dabam we' myi" sam bam mae" dabam gyo: mae bo" bao majo, ngad: ra".
13 Ai: thao ngo qu" ke' re zeim baung: dadau: wa gyai myhao: ra" mug: le; phyo: mae dao" qin" mung:- thoe qi: we' ai: mug: lagyo: gatau sam yaug mad genae" ra" labo" jham: thoe thug' li" lao"- Byuxa: vaqoe,- Byuxa: vaqoe,- myid gaung dao mae na: ra" mo; qhid' mae" byuxa: vaqoe, ngad: li" nae" wo"- ga" ra" thoe qi: re ngo the' gyo".