16
Mao"So: Nhag' Yo" Ru Bo: Ra" Keim Jham
1 Ai: thao caung:pa" yham mae" thoe qi: we'- Mao"So nhag' yo" ru bo: ra" keim nhad' lam: re myid gaung khyo vhe' khyo" ke' ge,- ga: mug: lagyo: nhad' yaug re ta" thoe ngo the' gyo".
2 Mug: lagyo: sao qhid' yaug ein: yaug wa yao" keim re myid gaung khyo vhe' khyo" ke' ra". Ailao"- gug'nyhug' lhe: aso: de; ra" mo, we' yao" khyao dau sulho re goe; pa" ko" ra" mo, mae qu" gyaug qu" lhaung sho' no: ra" byang jham to" li" ako".
3 Mug: lagyo: shid' yaug ein: yaug wa yao" keim re panglai: khug khyo vhe' khyo" ke' ra". Ailao"- panglai: qid wa byushid sa: we' dau: lo" byaug: ra". Pang:lai:: khug mae daui: na ko" ra" ja: alhab' wa shid: byaug: ako".
4 Ai: thao mug: lagyo: sam yaug ein: yaug wa yao" keim re qid gyaung: jham we' qid thug' jham khyo vhe' khyo" ke' ra". Ailao"- qid jham wa sa: boe" lo" byaug: ako".
5 Qid re eib: ra" mug: lagyo: wa- ana" pyad lai: lo" ra" pyad mae na: jo; ra" Gyang" Lho" Yaug we"- Nao kad' ra" dao: kho' ru wa din: nyang: ra" wo"-
6 Yao: bam wa Mao"So: byu qe we' lapa qere sa: sheim: gyo" nhao mo, ngad mung:- nao wa yao: bam re sa: byid: jhaug' ava". Man: qi" ru we' dakhyo:- yao: bam qo" kham zo" na: avako"- ga: ta" rure ngo the' gyo: va".
7 Ai: phan mae" thoe dathoe wa Qam: bo: thao" ra" Asang Mao"So we"- Ni" dao: kho' ru jham wa gai gai: yao: dangman" ru we' din: nyang: ra" wo"- ga: ta" rure ngo the' gyo".
8 Ai: thao mug: lagyo: byid yaug ein: yaug wa yao" keim re ba dao khyo vhe' khyo" ke' ra". Ailao"- byu jham re gyai thin: ra" ba lhe' nae" akhang" qo" yu: ra".
9 Yao: bam wa gyai thin: ra" ba lo; yang lhe' mhai: ru qhug' geyang:- ai: qam" jham re boe" nhao nae" kheim: so' qo" ra" Mao"So: mang re nhang: myan" nhang: thoe ta" ako". Ngadqere: yao: bam wa yao: bam: qobo jham mae" madam: phaug' lo ko" ru we' yao" qi" qhang: ra" khyo re macaung:khin" ko" ngad: ra".
10 Ai: thao mug: lagyo: ngo" yaug ein: yaug wa yao" keim re ai: gug'nyhug' lhe" nho: tao" khau" dao mae vhe' khyo" ke' ra". Ailao" ai: gug'nyhug' lhe" nho: mung"dan: wa no, sang: kyid cad' no; lo" mung:- ai: mung"dan: byu qe wa khai" no geyang: yao: bam yao" sho re bin" zag: ci: ako".
11 Amung: yao: bam: khai" no: ru we' byang myaug: ra" dae mathao mae mug:gaung: mung"dan: nho: Mao"So re nhang: myan" nhang: thoe ta" ako". Ngadqere: yao: bam wa yao: bam yao" makhyang" ra" khyo jham mae" madam: phaug' lo ko" ngad: ra".
12 Ai: thao mug: lagyo: khyaug' yaug ein: yaug wa yao" keim re Uphrad qid gyaung: mo" khug khyo vhe' khyo" ke' ra". Ailao" ai: qid gyaung: mo" wa kin" lo" byaug mung: ba thug' shad' mae" joe" li" ra" kho:kham qere khyo phung" byid' ra".
13 Ai: thao pohaung we' dau: ra" masan masin" ra" byo sam dau: re ngo myao:. Yao: bam wa mao jaung:- gug'nyhug' lhe:- lapa apyag' qenho: nhad' jham mae" thug' li" ako".
14 Yao: bam wa mug'pho: ve,lho jham re kad' qhu" ko" ra" min: yui jham: nho: byo jham ngad: ako". Ai: byo sam dau: wa Qam: Bo: Thao" ra" Mao"So: ba na qi: gye khe' poe khyo mug: myid dao mae" kho:kham qe alhab' re zhang: phaung: yu nae" qhid' mae" thug' ye" lo" ako".
15 Tae" gyo: ge,- Ngo wa khug' hab' we' dakhyo: joe" li" nae". Khag' ngadqere: gaung pyad' su" qin" yang: su: qhid' kheim: mae qho' maphau: nae" qhid' mae" gyang" na mung:- yao" mai bau: jham re lhaug' na: ra" yaug wa- ngaui lho" ra" wo".
16 Ai: thao- ai: byo jham wa kho:kham qere Hebre myan" khyo" Amagedon ga: mhang" ra" jo, qo mae zhang: phaung: yu: to" ako".
17 Ai: thao mug: lagyo: nhad' yaug ein: yaug wa yao" keim re la mae vhe' khyo" ke' ra". Ailao"- caung:pa" yham mae jo; ra" tao" khau" mae" thoe qi: dathoe wa Bin va"- ga: ta" ra".
18 Lhe' cad' cad' mung:- mug: dam: dam:- mug: gyug: gyug: mung:- myid lab: qu" gyaug qu" lhaung lab' li" ra". Xao su byu qere phan" ra" ba na mae" khonhae" re: airu: myid lab: malab: qu" ngad: ra". Ce: myid lab: wa alhab' tho' mae thin: thao" ru ngad: ra".
19 Qi" qhang: ra" vomo" wa sam gao go; lo" byaug: ra". Mung"dan: khao: ngo" mae" vomo" jham wa byo; qeim: lo" byaug: ako". Mao"So wa Babelon vogaung: re myid: beim: mung:- yao" nhag' yo" ra" sabyi qang: ngad: ra" yao" keim mae" sabyi qang: yao: re jhaug' ra".
20 Gagyo: kao" jham alhab'- bam jham alhab' byaug: lo" byaug: ako".
21 Dace' re sam joe" dakyin: kyin: ko bo: ra" lag qu mo" jham wa mug:gaung mae" byu jham: dao mae qu: zag byid' ra". Byu qe wa qu" gyaug qu" lhaung sho' ra" lag qu mo" qu: gyo" ra" qam" mathao mae Mao"So re nhang: myan" nhang: thoe ta" ako".