11
Sagse: Shid' Yaug
1 Ai: thao- qu" re ka" rumae ci: ra" gyang: yao: we' dau: ra" gyang: yao: dayao: ngo re byid: mung: caung:pa" yham we' phan re yeka" wa,- amung: caung:pa" yham mae caung:pa" ra" mo, re yenghe' wa,-
2 Ngadqere: ai: Caung:pa" Yham taung gaung shad' vang" mae wa daka" wa,- Pe"mung:ga"re ai re wa Mao"So re malam ko" ra" mo, re byid: to: va" ru ngad mung:- yao: bam wa gyang" lho" vomo" re lho" mo" byid xe: shid' khye' lam: lam: zab: nhae" pye' li" genae".
3 Jid: mo" bau: ve; ra" nga" sagse: shid' yaug ngo nhao: ke' nae". Yao: shid' zo: wa ba na 1,260 gyo: mae Mao"So: mung dao: re ta" hau" kyo" li" genae"- ga: ngo re ta" ra".
4 Ai: sagse: shid' yaug wa myid gaung: nho: Asang: qhid' kheim: mae ye; jo, ko" ra" zhanlun shid' gae we' myikaug' shid' lam: ngad: ako".
5 Yao: shid' zo: re dae te' nae" qam: ke' yaug khag' ngad qere: yao: shid' zo" nhad' mae" myishae thug' li" mung:- yao: shid' zo" gyevo qere ngha" pye' li" genae". Yao: shid' zo: re dae te' nae" qam: ke' ra" yaug khag' ngad qere: ce: khyo" se' pye' ru qhug' li" genae".
6 Yao: shid' zo: Mao"So: mungdao: ta" hau" kyo" ra" yo, khyin: gyo: mae mug: maqu nae" qhid' mae" mug:gaung re pyid' pye' nae" kheim: so' yao: shid' yaug qo" ako". Yao: shid' yaug wa qid thug' qid jham re sa: boe" lo" nhao: ra" kheim: so' rere:- yao: shid' yaug nug: ra" au: myidgaung re qam" aja: ja: gyo" nhao nae" kheim: so' re:- yao: shid' yaug qo" ako".
7 Yao: shid' yaug: nho: mungdao: ta" hau" kyo" ra" mau" bin gelao"- ai: dung: khung: no, mae" thug' li" ra" gug'nyhug' lhe: wa yao: shid' yaug re gye kad' li" nae". Ai: gug'nyhug' lhe: wa yao: shid' yaug re aung: pye' ru we' yao: shid' yaug re se' pye' mung:-
8 yao: shid' yaug: mao gaung wa yao: shid' yaug: nho: Asang re pyao: zang dao mae jin" se' pye' ra" vomo" mae" hau" mo" khyodang mae lang" jo; li" genae". Ave, aso: khyo" ai: vomo" mang wa Sodom mangad: lao"- Egutu ngad: ra".
9 Mung"dan: khao: ngo" mae" myan" cao jab jhau: ra" byumyu" alhab' wa yao: shid' yaug: mao gaung re sam ba: dakhyug' li" qu" li" genae". Amung: yao: shid' yaug: mao gaung re nyhab' shaung: pye' nae" akhang" mabyid' li" genae".
10 Myid gaung byu qe wa ai shid' yaug shid: ruyang ngaui bau" li" genae". Yao: bam wa poe kad' yang: yao: bam yao: cao: jhaung qhu" jho" byid' li" genae". Pe"mung:ga"re ai: lapa shid' yaug wa xao su byu qere qug: khai: qug: khai: myo: sho' boe" nhao geyang: ngad: ra".
11 Sam ba: dakhyug' thao re Mao"So mae" kao so' wa yao: shid' yaug: khug khyo joe" vao li" mung:- to" ye; li" ako". Yao: shid' yaug re myao: ra" mo, alhab' wa gyaug: din: pye' ako".
12 Ai: thao- ai: lapa shid' yaug wa cekhyo do, lo geri:- ga: mug:gaung mae" thoe qi: we' yao: shid' yaug re ta" rure the' gyo" ako". Yao: shid' yaug: nho: gyevo qe lhaug' qu" na shiko" au: yao:- yao: shid' yaug wa jham thaui: khug mae mug:gaung khyo do, lo" ako".
13 Ai: au: reyao: gyai thin sho' myid lab: lab' li" ra". Vomo" nho: daxe bam mae" dabam wa byo; qeim: lo" gemung:- byu nhad' taung se' pye' qhug' ako". Dang: ra" mo, wa gyaug: din: pye' geyang: mug:gaung mae" Mao"So: qi" qhang: rure caung:khin" byid' ako".
14 Byuxa: vaqoe, shid' lam: ein: lam: wa thao" lo" byaug va". Ngadqere: byuxa: voqoe, sam lam: ein: lam wa mamyao" re joe" li" li" nae" ngad: ra".
Labo" Nhad' Lam: Ein: Lam:
15 Ai: thao re mug: lagyo: nhad' yaug ein: yaug wa yao" labo" re mad: ke' ra". Mug:gaung dao mae thoe qi: we' Ana"- mug:myid re eib nae" phung qam: so' wa naonhaung" we' yao" Meshia nho: lo, khug mae ngad mung: yao: wa apyad ato khonhae" re: eib: na: li" nae"- ga: ta" ra".
16 Ai: thao Mao"So: qhid' kheim: mae yao: bam yao" tao" khau" mae zaung: jo, ko" ra" lau: de, shid' xe: byid yaug wa goe; gyo" mung: Mao"So re goe; pa" zo" re"-
17 Ana" pyad-
lai: lo: ra" pyad mae na: jo; ra" qam: bo: thao" ra" Asang Mao"So we"-
Nao wa qi" qhang: ra" phung qam: so' re ci yang:- eib: na va" ruyang ngonhaung" wa
Mao"So re jeju caung:khin" ra".
18 Mao"So re malam: ra" mo, wa nhag' yo" ako".
Pe"mung:ga"re ni" nhag' yo" ra" yo, khyin: joe" li" mung:-
shid: ra" mo, re dao: kho' ra" yo,khyin: joe" li" ru we' ni" daui daui mo, ngad: ra" lapa qe- ni" byu qe alhab' we' nao re caung:pa" ra" mo,
aqi: angai alhab' mo, re aphug' jhaung qhu" byid: nae" yo,khyin: joe" li" ava".
Myid gaung re phyo' pye' ra" mo, re phyo' pye' nae" yo,khyin: joe" li"ava" wo"- ga: ta" ako".
19 Mug:gaung dao mae" caung:pa" yham wa bung" jo, mung:- ai: khug mae" dao: thang" ban" re the' myao: ra". Ai: thao lhe' cad' cad' mung:- mug: gyug: thoe we' daga" myid lab: lab' li" yang: lag qu myo: sho' gyo" li" ra".