3
Rutha Yham Sang Pho" Qo" Ra" Khyo
1 Dayo, zo: myao" thao re Naomi wa Rutha re nao- naoyao" yham qao: qo" nae" qhid' mae" ni" qhid' mae" ngo yham sang pho" qho byid: nae".
2 Nao we' daga" mau" zaui" lo ko" ra" mo; asang Bua ceyaug wa ngonhaung" nho: amyu" ba nam ngad: rure myid: beim: wa, ana" tae" gyo: wa,- ana" myi" thao yao: wa bale gaug nao" na: li" nae".
3 Airumung: nao gaung cid' shaung: pye' yang: nae pyo: ja: gyad mung: gai: thao" ra" ni" mai bau: jham seim" ve, wa, aimung: yao: gaug nao" na: ra" jo, qo khyo ye: wa, ngadqere: yao: bin: zo: bin: shaug' sho' nao aimae na: ra" khyo yao: re daba nhao wa,.
4 Yao: lang" jo; ra" jo, qo re nyang" za: qu" xam" to: mung: yao: yab: myhid' lo" thao re ye: yang: mai pho' tau yang: yao" khyid thao mae yelang" jo, wa,- nao pe" kad' nae" khyo re yao: wa nao re ta" kyo" li" nae"- ga: ta" ra".
5 Rutha wa nao ta" ra" gu: ja: khao: ngo" ngo kad' nae"- ga: tau" ra".
6 Airumung: Rutha wa gaug nao: jao: khyo ye: mung: yao: na: yang yao: re ta" ra" gu: re kad' ra".
7 Bua wa bin: zo: bin: shaug' lao" nhag' lam: pyo" ra". Yao: wa bale gaug bam khyo ye: yang: yeyab; jo; ra". Rutha wa sae za: gug' ye: mung: mai pho' re yetau yang: yao" khyid thao mae yelang" jo; ra".
8 Yao: wa myi" re nyag din taung" so" li" mung: gaung phaug' phaug' ke' re yao" khyid thao mae myiqe: dayaug lang" jo; rure myao yang: mug' pye' ra".
9 Yao: wa nao khag' ngad: i? ga: myid' ra".
Yao: wa nhag' bo: pho" we"- Rutha ngad: pe"mung:ga"re nao we' sa: jhao" ra" amyu" ba nam ngad: ruyang nao wa ngore gun caung nae" qo qo" yaug ngad: ra". Airumung: jeju khyo" ngore lo, xo' yu la, ga: tau" ra".
10 Yao: wa Asang wa nao re shaman" byid: vashao:- nao wa ni" na re khau: lo: ra" mau" tho' re ana" nao ug' khug' dinkhu: re jhaug' zaug: lo, mau" qhu" byid' na: ru wa je lhao" qi" ra". Nao wa zolau: qere gai: qho: yu: ra" jo,nho" qo" yaug dayaug yaug re gai: qho: yu: ra" ngadqere: nao maqho ngad: ra".
11 Ana" Rutha we"- dagaung yug wa, nao mho' ru ja: khao: ngo" re ngo kad' byid: nae". Nao wa myiqe: gai dayaug ngad: rure vogaung: mae na mo, yaug khao: ngo" ba: ako".
12 Ngo wa sa: jhao" ra" amyu" ba nam ngad: ra" khyo we' nao re qo yu ang: ra" yaug wa ngo ngad: ra" khyo wa dang: ra". Ngadqere: ngo tho' je: yang: sa: jhao" ra" byu dayaug na: ra".
13 Mug: bo" sho' cemae na: jo, wa, ne, kao mug: bo" lao" yao: wa nao re qo" mayu nae" laug- qo yu: li" nae" laug- ein: rure nga" shid' yaug yemyid: lang: yao: qo yu: re wa gai nae". Yao: qo mayu re wa ngo qo yu nae" ngad: ra" khyo daui: na: ra" Asang: mang khyo" ngo jham tang" ra". Ana" wa lang" jo, mung: mug: bo" sho' cemae na: jo, wa,.
14 Airumung: Rutha wa yao" khyid thao mae lang" jo; ra". Ngadqere: yao" myo, khung: re maba: qu" se" shire to" phao: lo" ra". Pe"mung:ga"re Rutha aimae na: ra" khyo re khag' rere: Bua manug: ba nhao ngad: ra".
15 Bua wa yao: re ni" bau: qhang khyad' mung: cemae myhung" ke' wa,- ga: ta" ra". Rutha wa airu: kad' ra". Bua wa bale gaug dajig je gag: zaui byid: mung: yao" lo, sin mae bao" vo; kai: byid' ra". Ailao" Rutha wa aire vo, yang: vogaung: khyo tug' phao: lo" ra".
16 Yao: yham khyo joe" lo" lao" yao: na wa yao: re dau mo" we" khoru: ngad: ra" i? ga: myid' ra".
Rutha wa Bua yao: re khoru: kad' ra" khyo ja: khao: ngo" yao: re ta" kyo" ra".
17 Yao: wa nao jhao" lo, cin ngo magai: lo" nae" ga: ngore ta" ra". Airumung: yao: wa ce: bale gaug ngore byid' ke' ra"- ga: bota" ra".
18 Naomi wa yao: re ana" Rutha we"- ceru khoru: boe" li" rure myao sho' nhag' lam: qhang yang: lao" wa,- Bua wa ce: mau" mabin: sho' sho' wa ana" ba mathang nae"- ga: ta" ra".