RUTHA
(RUTH)
Dao: Phung"
Rutha nho: yaug yo: ra" mhomyi: wa Tarha" agyi jham: paug' mae" aqan alan: ra" ayo, gyo: mae tung" to" ru ngad: ra". Moba myiqe: Rutha wa Israel byu dayaug we' lo,xo' yu: ru qhug' ra". Ai: yaug shid thao Rutha wa yao" Israel yao: vao yao: na re gakai: lai khyo" jhaug' zaug sho' phug' myao" rure qhu" byid: mung: Israel nho: Mao"So re akao" vao" sho' lam khug: ra". Lo" thao" mae yao: wa sao qhid' mae" yham sang pho" nho: ba nam sang tin: qe: phaung mae" yauggai dayaug jhao" yham dam: qo" lo" ra". Amung: yao: wa ce: yham qo" ra" khyo" yang Israel qenho: qi" qhang: thao" ra" Davi nho: phyid' kai: boe" lo: ra".
Tarha" agyi jham: paug' nho: mhomyi: jham wa Mao"So: byu qe yao: mae" lhang: phaug' lo" ko" au: re qhug' ra" kyi" khyag' khyo re qhu" byid' ra". Rutha mugsug' wa taung bug byu dayaug Israel nho: Mao"So jhao" phaug' lo mung: yao: re jhaug' zaug: ra" byumyu" mae bobo: lo: ra" mathao mae qo" khae: yu: ra" shaman" jeju khyo re qhu" byid' ra".
1
Moba khyo Zaug Byaung" Ye: Ru
1-2 Dalhang mae- Israel byu qe kho:kham maqo" shi: gere ai: mung" mae bao" khug' khug' ra". Aimung: Yuda mung" mae" Betlehem mae na: ra" Ephrad vobyu Elimeleg ga: mang yaug wa yao" yham sang myhi" Naomi we' yao" yauggai zo: tao ngad: ra" Malon we' Khilion we' daga" Moba mung" mae dazhab lhau" yena nae" qhid' mae" ye" lo" ra".
3-4 Yao: bam aimae na ko" au: Elimeleg shid: byaug: ra". Naomi wa Moba myiqe: nau" Orpa we' Rutha re lo, xo' yu ko" ra" yao" yauggai zo: tao we' za: na: jo, lo" ra".
5 Daxe zin ko kyo thao re Malon we' Khilion re: shid: byaug: ako". Naomi wa yham sang pho" we' yauggai zo: tao alhab' yang shid: cug' to: co' ako".
Naomi We' Rutha Betlehem Khyo Tug' lo Ko" Ru
6 Dajhid' myao" thao re- Asang wa yao: bam re gaug zo maui: lam: qo" nhao: ra" khyo" yang yao" byumyu" re shaman" byid' ra" khyo re the' gyo" ra". Airumung: yao: wa yao" dau mo" tao we' daga" Moba mung" mae" to" lo" nae" seim" jin" ra".
7 Yao: bam wa Yuda mung" khyo daga" tug' phao: lo" nae" to" lo" ako".
8 Ngadqere: yao: wa khyole; mae- yham khyo phao: lo" mung: ni" shid' tao: yao: myhi" bam we' lo" na ge,. Ngo re we' shid: byaug va" tao re ni" shid' tao gai kad' ko" ru we' dakhyo: Asang wa ni" shid' tao re gai kad' byid: vashao: wo".
9 Asang wa ni" shid' tao geim" re yham dam: qo" nhao mung: ug' khug' dinkhu: boe" nhao vashao: wo"- ga: yao: shid' tao re ta" ra".
Aimung: Naomi wa yao: shid' tao re bobaug baug yang: au" ke' ra". Ngadqere: yao: shid' tao wa-
10 Malo" nae" nga" shid' tao wa ni" byumyu" qejhao" nao we' daga" cao" nae"- ga: ngug yang: yao: re ta" ako".
11 Naomi wa nga" dau mo" tao we"- ni" shid' tao to" lo" ca" ako". Ni" shid' tao ngo we' pe"mung: cao nug ko" i? Ni" shid' tao we' lo, xo' yu nae" qhid' mae" ngo yauggai zo: qe dam: qo" khau nae" ein: ni" shid' tao jho ko" i?
12 Yham khyo lo" ge,- pe"mung:ga"re ngo wa lo, dam: xo' nae" saung" mao: va". Ngo wa myid: lao" khyo jo, shi" ein: myid yang: ana" myi lo, xo' mung:
13 Yauggai zo: qe khau sho' ngadqere: yao: bam qi: sho' ni" shid' tao qo" lao" genae" i? Ceru yang ni" shid' tao gaje we' lo, xo' xo' nae" rure tam" pye' nae" i? Mangad: nga" dau mo" tao we"- airu: magai: boe" rure ni" shid' tao ba: ako". Asang wa ngore jeim: nhao: ava"- aimung: ni" shid' tao: qhid' mae" ngo gyai myid: kaug' ra"- ga: ta" ra".
14 Yao: shid' tao wa dam: ngug: ako". Ai: thao Orpa wa yao: na re bobaug baug au" co' yang: yham khyo dam: phao: lo" ra". Ngadqere: Rutha wa yao: re zaui" ci: ra".
15 Airumung: Naomi wa yao: re Rutha we"- ni" bai: wa yao" byumyu" yao" so jhao" tug' phao: lo" byaug: ava". Yao: we' daga" yham phao: lo" wa,- ga: ta" ra".
16 Ngadqere: Rutha wa ngore phao: lo" nae" data" la, nao we' daga" cao nhao la, nao khai: lo" re lo" ngo cao nae". Nao khai: mae na na ngo cao: na: nae". Ni" byumyu" qe wa nga" byumyu" qe ngad: li" nae". Ni" Mao"So wa nga" Mao"So ngad: li" nae".
17 Nao shid: ra" jo, qo mae ngo shid nae" aimae ngo nyhab' pye' ru qhug' li" nae". Shid yang: za: mangad: lo: daja: ja: khyo" ngo nao we' gao: nhao: ngad: re Asang: xo: thao" ra" qobo dae nga" au: dao mae joe" nhao vashao: wo"- ga: ta" ra".
18 Rutha wa yao: we' daga" cao" nae" myid: phyid' to: va" ra" khyo re Naomi myao lao"- yao: re pe" mapaug' ta" lo:ngad: ra".
19 Yao: shid' na dau wa Betlehem khyo joe" sho' ye" lo" ako". Yao: shid' na dau joe" ye: gelao"- Vogaung: geim" gyai bau: gemung: aimae" myiqe: qe wa,. Ceyaug dang za: Naomi ngad: i? ga: myid' ako".
20 Yao: wa ngore Naomi ein: damhang" lo: gela,. Ngo re Mara ein: mhang" gela,. Pe"mung:ga"re qam: bo:thao" ra" Mao"So wa nga" kao so' gyaung: khyo re kho: nhao: ava".
21 Ngo cemae" to" lo" au:. Ngo wa magan: mago" qo" yaug ngad: Ngadqere: Asang wa ngore gaung keim dam: tug' jhui" lo: ra". Qam: bo: thao" ra" Asang: yang ngore dao: phyid' mung: qug: khai: qhug' nhao: au: Naomi ein: ngore pe"mung: mhang" nae" i? ga: tau" ra".
22 Ceru wa Naomi wa yao" dau mo" Moba myiqe: nau" Rutha we' daga" Moba mung" mae" Naomi dam: tug' lo: ra" khyo ngad: ra". Yao: shid' na dau Betlehem khyo dam: joe" lo ko" au: bale gaug yad: qhid yo, ngad: ra".