12
Mao"So: Mau" Mae Kaoso' Daui: Ru
1 Airumung: nga" mao:nhaung: qe we"- Mao"So: nhag' myan" ra" jeju yang ngo naonhaung" re mho' ke' ra". Naonhaung" gaung khyao re Mao"So: mau" zo" mae qhaug' byid: mung: Mao"So o ngaui: ra"- daui: na: ra" xeim: khyo" Mao"So re qhaug' byid: ge,- ceru wa naonhaung" caung da" ang: ra" jo: ra" khyo ngad: ra".
2 Amung: naonhaung" ave, re ce: myid gaung dao mae" ave, azhao" we' dau datau" yu ge,- naonhaung" myid alhab' geim" tha" pye' yang: Mao"So re naonhaung" nhag' lam: asag' lhai" pye' byid: nhao ge,- ailao"- gai shab: ru- yao: o ngaui: ru- jab byang" ru ga" ra" Mao"So myid o: ru pe" ja: ngad: rure naonhaung" ba: li" genae".
3 Mao"So: yang ngore byid' ra" jeju jhaung qhu" re ngha yang: naonhaung" yaug khao: ngo" re ngo ceru: ta" ra". Naonhaung" yao" gaung re ang: ra" tho' mae je yang: damyid: qi" yu ge,- ai: atha"- naonhaung" myid: ra" khyo mae nau" nhae" ave, de, ge,- naonhaung" gaung re Mao"So: yang byid' ra" lam khug: ra" khyo re cao" yang: dao: kho' yu ge,-
4 Ngonhaung" gaung khyao dalam: mae gaung dau jham myo: sho' de, mung: ai: gaung dau jham alhab' wa yao: yao" mau" qo" ako".
5 Ai we' dakhyo:- ngonhaung" wa myo: sho' ngadqere:- Khristu mae dagaung dasho: za: boe" mung: gaung khyao dalam: mae za: de; jo, mo, ngad: ra". Ngonhaung" wa gaung khyao dalam: mae yao: cao: jho" xo' ra" gaung dau jham ngad: ra".
6 Airumung:- Mao"So: yang ngonhaung" re byid' to" ra" nhag' myan" ra" jeju jhaung qhu" re cao" yang:- majho" dau: ra" ngonhaung" nho: jeju jhaung qhu" jham re ci yhung: qo: ra". Ngonhaung" nho: jeju jhaung qhu" wa- Mao"So: mungdao: re kho" kyo: nae" ru ngad: re wa ngonhaung" qo" ra" lam khug: myid re cao" yang: ai: mau" re kad' qo: ra".
7 Caung da" byid: nae" jhaung qhu" ngad: re wa ngonhaung" caung da" byid: qo: ra". Mho" shid' byid: nae" jhaung qhu" ngad: re wa ngonhaung" mho" shid' byid: qo: ra".
8 Amung: su gaje qere qam: byid: nae" jhaung qhu" ngad: re wa- ngonhaung" airu: qam: byid: qo: ra". Su gaje qere gae byid: nae" yaug khag' ngadqere: magan: mago" gae byid: qo: ra". Au: she nae" kheim: so' qo qo" yaug wa- qam: ke' yang: au: she- eib khang" qo: ra". Nhag' khyag' myid qhu" byid: ba: ra" yaug wa- ngaui bau: ngaui yao qhu" byid: qo: ra".
9 Jhid' de; myid mae jab byang" sho' gyang" shao qo: ra"- makhyang" rure nghang" pye' mung: gai shab: rure zaui" zag: ci ge,.
10 Dayaug we' dayaug Khristu mae jho" jhid'de; ge,- dayaug we' dayaug jho" phug' jho" myao: nae" kao bau ge,.
11 Mau" zaui" rumae qam: ke' ge,- danoe" dashoe ge,- ai: Asang re aung khug nhag' lam: alhab' we' kao bau yang: caung da" byid: ge,.
12 Naonhaung" wa ngaui bau: taung" myid: lao" na ge,- Qug: khai: qhug' rumae zang: qhao" ge,- Ayo, khao: ngo" akyu" mho' na ge,.
13 Naonhaung" jo,nho" jham re qo ca" ko" ra" naonhaung" Khristan: mao:nhaung: qere gae byid: ge,- naonhaung" maba mase" ra" bang" vo qere naonhaung" yham mae bang" da" byid: ge,.
14 Naonhaung" re yhin" ra" mo, re shaman" byid: nae" Mao"So re mho' ge,- ngad va"- Nhang: byid: nae" qhid' mae" mangad:- Shaman" byid" nae" qhid' mae" yao: re mho' ge,.
15 Ngaui bau" ra" mo, we' daga"- ngaui bau: ge,- ngug: ra" mo, we' daga" ngug ge,-
16 Yaug khao: ngo" re dakhyo: za: myid: sang: kho: byid: ge,- dangad beim: ge,- nyham: ra" mau" zo" re zaui: ge,- naonhaung" yao" gaung re pha,jhi" ba: ra" yaug khyo" damyid: jho ge,.
17 Naonhaung" re dayaug yaug: yang magai kad' re- yao: re lage, dadam: phaug' ge,- Yaug khao: ngo" yang gai: ga" ra" mau" re qam: ke' kad' ge,.
18 Yaug khao: ngo" we' ngaui pyo: yaug yo za: qo" na nae" qhid' mae" naonhaung" shad' khyo" gai: boe" ra" gu: alhab' re kad' ge,.
19 Ba nam qe we"- Khonhae" re: lage, daphaug' ge,- ai: atha" Mao"So nhag' yo" ruyang lage, phaug' vashao:- pe"mung:ga"re jham: mugsug' mae Asang wa- ngo lage, phaug' nae"- ngo dam: tug' xe' nae"- ga: ta" ra".
20 Airumung: lage, phaug' nae" atha"- Jham: Mugsug' mae- Ni" nho: gyevo vae: moe' ngad: re- yao: re zo:ve byid: zho: wa,- yao: qid shab' ngad: re yao: re qid byid: jhaug' wa; Nao ceru: kad' lao"- yao: re nao gyai qho' nhao: li" nae"- ga: ta" to" ra".
21 Makhyang: mashab: ruyang nao re daaung: pye' nhao. Ai: atha" gai shab: ruyang makhyang: mashab: rure aung: pye' wa,.