9
Sheba Kho:kham Myhi" Lae" Li" Ra" Khyo
(1 Kh 10.1-13)
1 Sheba kho:kham myhi" wa Sholamon nho: lahau: qi" rure the' gyo: mung: qug' ra" dao: myid: jham: yang yao: re jham" qu" nae" qhid' mae" Yerusalem khyo gyaung: su" lo" ra".
2 Yao: wa yao: we' daga" byu myo: sho' we' zoxeim: sheim nae pyo: cid'- laugsin" jham- qhang myo: sho' tho: ra" gola:u jham re bojhui" ye" ra". Sholamon we' jho" qhug' lao"- yao: myid: ci: ra" dao: myid: alhab' Sholamon re myid' ra".
3 Sholamon wa alhab' re dao: phyid byid' ra". Aijham re ta" pheim: ta" sho' kyo: nae" yao" qhid' mae" gyai qug' ra" ja: mabo ngad: ra".
4 Sheba kho:kham myhi" wa Sholamon nho: pha,jhi" dao: re the' gyo: mung: yao: kad' to" ra" kho:kham kho" rere: the' myao: ra". Yao: wa Sholamon nho: zozo: jaung: mae jaung: to" ra" zo:ve jham- yao" zug: qe: na: yham jham- yao" kho:kham kho" mae" mau" zaui" ra" mo, we' yao: bam ve; ra" mai bau: khin- zo: shaug' poe mae yao: re caung da" byid: ko" ra" daui daui mo,- Caung:pa" Yham mae yao" yang ngaui" byid' ra" xeim: jham rere: the' myao: ra". Aijham wa yao: re so' maba: she lasho' mug' byaug nhao: ra".
5 Yao: wa- Sholamon kho:kham re- ngoyao" mung"dan: mae ni" khyo re ngo the' gyo: mung: nao pha,jhi" bo: ru wa dang nhaung-
6 Ngadqere: ngo joe" li" mung: ngo yao" myo; yang yao: aijham alhab' re mathe' myao myao wa ngo malam"- ngadqere: aire agaung: daqi" re lhao" re: ngo mathe' gyo: nhaung- ni" pha,jhi" we' jo,nho" wa ngo the' gyo" ra" nho" tho' je: myo" ra".
7 Ni" qhid' kheim: mae khonhae" re: na mung: ni" pha,jhi" dao: khyo: jham re the' gyo" yu nae" akho: akhang" qo" ko" ra" ni" daui daui mo, wa khoqhi" sho' zhau: vha: bo ko" ra" i?
8 Ni" Mao"So Asang re caung:khin" ra". Yao: wa nao re khoqhi" o ngaui: rure nao re Israel kho:kham kad' nhao: ra" khyo" yang qhu" byid' ava". Pe"mung:ga"re Israel qhid' mae" yao" jhid'de; myid wa apyad ato ngad: ra". Tarha" we' tarha" dangman" rure nao qo" zaui" ci nae" qhid' mae" yao: wa nao re yao: bam: kho:kham kad' nhao: ava"- ga: ta" ra".
9 Yao: wa Sholamon re yao: vin: li" ra" jhaung qhu" jham byid' ra". Qhang joe: sam taung- zoxeim: sheim nae cid' we' laugsin" jham myo: sho' ngad: ra". Sheba kho:kham myhi" yang byid' ra" nho" laug sho' zoxeim: nae pyo: cid' re yao: khonhae" re: maqo" khae: yu: qu" ngad: ra".
10 (Kho:kham Hiram we' kho:kham Sholamon nho: byu qe wa Ophi mae" qhang cilo: ako". Yao: bam wa algum sag' we' laugsin" myo: sho' rere: tho: lo: ako".
11 Sholamon wa ai: sag' jham re Caung:pa" Yham we' kho:kham kho" mae" zam thao kham mhai" kad' mung: ba: nghaui" mo; qhid' mae" she tang:- be, tang: kad' rumae ci: ra". Yuda mung" mae airu" ru qhid' phyao: khonhae" re: mamyao: qu" ngad: ako".)
12 Kho:kham Sholamon wa Sheba kho:kham myhi" mho' gu: ja: khao: ngo" re byid' ra" ceru wa yao: vin: li" ra" jhaung qhu" jho" tha" rumae laung: byid' ru ngad: ra". Ai: thao yao: we' yao" thao cao" mo, wa Sheba mung" khyo dam: phao: lo" ako".
Kho:kham Sholamon Nho: Jo, Nho"
(1 Kh 10.14-25)
13 Sholamon wa zin khao: ngo" qhang joe: datug: khyaug' taung re qo" yu: ra".
14 Aitho' mago" aung: zo: aung: shaug' mo, we' phaga: ga: mo; yang byid' ra" khang: re: bo: ra". Arabia kho:kham qe we' Israel mung" dau zug: qeyang re: ngaui we' qhang jham re cili" byid' ako".
15 Sholamon wa dalam: mae be; pye" to" ra" qhang ngo" joe" yang thab' ra" go qi: shid' yo kad' ra".
16 Amung: dalam: mae be; pye" to" ra" qhang sam joe: joe" yang thab' ra" go angai sam yo lam: rere: kad' ra". Yao: wa aijham alhab' re Lebanon sag' mo" yo: nho: Qe, mo" mae ke' to" ra".
17 Kho:kham wa kho:kham zaung tao" aqi: dalam: rere: kad' ra". Aimae" dadau re xao zaui: yang thab' mung: dang: ra" gu: re wa qhang gyang" yang thab' pye' ra".
18 Zaung tao" khyo do, ye: nae" khuxam khyaug' lam: de, mung: aimae qhang: yang thab' ra" khyid zab tao" te' to" ra". Zaung tao" shid' shad' mae lo, zaui: de; mung: shad' khao: ngo" mae khang khyi lho yhe' to" ra".
19 Khuxam jham mae khang khyi lho daxe: shid' lam: de, mung: khuxam khao: ngo" mae" athao thao mae khang khyi lho dalam: lam: de; ra". Gatau khomung" dan: mae re: ce: zaung tao" we' dau: ru khonhae" re: majo; qu" ngad: ra".
20 Kho:kham Sholamon nho: keim jham alhab' re qhang: yang kad' mung: Lebanon Sag' mo" yo: nho: Qe, mo" mae" keim kang: jham alhab' re qhang gyang" yang kad' to" ra". Sholamon nho: pyad mae ngaui re wa phug' de, ja: majho ko" ngad: ra".
21 Yao: wa kho:kham Hiram nho: qid sang pho jham we' daga" panglai: gau" ra" qid sang pho jham dajham qo" ra". Yao" nho: qid sang pho jham wa sam zin mae dalhang tug' lo mung: qhang- ngaui- xao zaui- myaug no,- myaug ne jham re tho: lo: ako".
22 Kho:kham Sholamon wa mug:myid dao mae" kho:kham gaje qe alhab' mo, tho' jo,nho" je: qo" mung: pha,jhi" je: bo yaug ngad: ra".
23 Yao: bam alhab' mo, wa Mao"So: yang yao: re byid' to" ra" pha,jhi" re tae" gyo: nae" qhid' mae" yao: we' jho" qham: ako".
24 Yao: bam mae" yaug khao: ngo" wa jhaung qhu" khyo" ngaui zai- qhang zai jham- bau: qhang jham- shae lhae jham- zoxeim: nae pyo: cid' jham- myao: jham- loze jham Sholamon re byid' ako". Ceru: zin khao: ngo" xo' yang: boe" ra".
25 Kho:kham Sholamon wa yao" myao: lhin" we' myao: jham: qhid' mae" myao: yham byid taung qo" ra". Amung: myao: jui: byu datug: shid' taung yaug qo" ra". Yao: wa aibam mae" daqhae: re Yerusalem mae to: mung: dang: ra" gu: re wa gatau vogaung: myo: sho' mae nha: to" ra".
26 Yao: wa Uphrad gyaung: mae" Philisti we' Egutu mug: kyo: joe" sho' mae" mug:myid mae eib: ra" kho:kham qe alhab' tho' mae" qi" thao" yaug ngad: ra".
27 Yao: eib: ra" ayo, gyo: mae ngaui wa Yerusalem mae jo; ra" laugbaui we' dakhyo:- shaug' the: wa Yuda bam khyid mae" yu" yu" pho' ham" gae we' dakhyo: magan: mago" boe" jo; ra".
28 Sholamon wa myao: jham re Musri mung" we' gatau: mung" khao: ngo" mae" keim" vhao" yu: ra".
Sholamon Eib: Ra" Khyo
(1 Kh 11.41-43)
29 Sholamon nho: mhomyi: aqhid mae" thao" sho' mae" dang: ra" gu: re lapa Nathan nho: mhomyi: paug' mae re:- Shilo mae" Ahiya nho: lapa dao: tung" xam: paug' mae re:- Israel kho:kham Yeroboam nho: akhyo bo: ra" lapa Ido nho: qhu" lho paug' tung" xam: mae re: tung" xam" to" ako".
30 Sholamon wa Yerusalem mae eib mung: Israel mung" geim" re zin lam: byid xe eib: ra".
31 Yao: wa shid: lo" mung: Davi nho: vogaung: mae nyhab' pye' ako". Yao" yauggai zo: Rehoboam wa yao" khu mae kho:kham xo' kad' ra".