7
Caung:pa" Yham Re Qhaug' Byid' Ra" Khyo
(1 Kh 8.62-66)
1 Kho:kham Sholamon yao: akyu" mho' ru bin lao"- mug: khaung mae" myi: gyo" li" mung:- qhaug' byid' to" ra" ngaui" xeim: jham nga" lo" byaug: ra". Asang: qhid' kheim: Zaung nho: bao qhui: ru wa Caung:pa" Yham mae byang" sheim: jo; ra".
2 Pe"mung:ga"re Caung:pa" Yham wa bao qhui: ra" bo" bao byang" sheim: jo; ruyang khinjaung qe wa ai: khyo maqo" vao ye: ko" ngad: ra".
3 Israel amyu" byu qe wa mug: khaung mae" myi: gyo" li" mung: bo" bao: yang Caung:pa" Yham mae li" byang" jo; rure the' myao gelao"- yao: bam wa myo, khung: ai: myid myhung: khyo goe; gyo" mung: Mao"So re caung:pa" yang: yao" gai shab: ru we' yao" apyad ato: jhid'de; myid qhid' mae" yao: re caung:khin" ako".
4 Ai: thao Sholamon we' amyu" byu qe alhab' wa Asang re ngaui" xeim: ngaui" byid' ako".
5 Yao: wa nung: 22,000 dau:- yao 120,000 dau: re zam" khug ngaui" xeim: khyo" ngaui" byid' ra". Airu: yao: we' amyu" byu qe alhab' mo, Caung:pa" Yham re qhaug' byid' ako".
6 Khinjaung qe wa yao: bam re jaung byid' ra" jo, qo mae ye; jo, mung: Levi byu qe wa khinjaung qe: shad' khyo myo, khung: qang yang: ye; jo; mung:- Davi yang byid' to" ra" be; myhang" nghaui" ja: zai jham yang Asang re caung:khin" zo" re"- yao: bam re Davi yang mau" byid' to" ru we' dakhyo: yao" jhid'de; myid wa apyad ato ngad: ra" wo"- ga: nghaui"caung" ako". Khinjaung qe wa amyu" byu qe alhab' mo, ye; jo; au: labo" jham mad: ako".
7 Sholamon wa Caung:pa" Yham qhid' kheim: vang" agaung: dau re qhaug' byid: mung: aitau mae dau: geim" phad' ngaui" byid' ra" ngaui" xeim:- cinman" ngaui" xeim:- zam" khug ngaui" xeim: jham mae" xau re yu yang: ngaui" xeim: ngaui" byid' ra". Yao: ceru: kad' ru wa yao: kad' to" ra" gyid: bo" phan wa ce: ngaui" xeim: jham qhid' mae" saung" ngai yang: kad' ru ngad: ra".
8 Sholamon we' Israel byumyu" qe alhab' wa Zaung poe re nhad' ba lam: lam: kad' ako". Aimae mug: am: shad' Hamad bam gyo: joe" sho'- mug: thao shad' Egutu mug: kyo: joe" sho' mae" mo, byu qe phung: mo" zang joe" na: bam: ako".
9 Yao: bam wa phan re qhaug' byid' rumae nhad' ba na: pye' ako". Ai: thao poe qhid' mae" nhad' ba na: jo; ashiko". Lo" thao ba mae yao: bam poe pin" pye' ako".
10 Thao: ba lho" nhad' khye' ein: khye' shid' xe: sam ba ein: ba mae Sholamon wa amyu" byu qere yham phao nhao: ke' ra". Yao: bam yao" byumyu" Israel rere: Davi rere: Sholamon rere: Asang byid' to: va" ra" Shaman" jeju alhab' mathao mae ngaui bau" ako".
Sholamon Jhao" Mao"So Dam: Li" Na: Qhu" Ru
(1 Kh 9.1-9)
11 Kho:kham Sholamon wa Caung:pa" Yham- Kho:kham kho" we' sin: yang: yao: yaung: to" ra" gu: alhab' re aung myaug: ra" khyo" pin" pye' thao re.
12 Asang wa myi" re yao: jhao" li" na: qhu" ra". Asang wa yao: re- ngo wa ni" akyu" mho' thoe re the' gyo: va". Amung: ngo wa ce: Caung:pa" Yham re ngore ngaui" xeim: ngaui" byid: nae" jo, qo khyo" khae: yu va".
13 Ngo wa mug: re tam" pye'- mangad: lao" gaug zo maui: lam: re zo" pye' nae" khyag' phaung" jham re nhao ke' ru mangad: lao" nga" byu qe: dao mae qam" gyo" nhao: ke' khao: ngo"-
14 Yao: bam ngore akyu" mho' mung: myid tha" lo yang: yao: bam kad' na ko" ra" makhyang: mashab: rumae" phaug' lo ko" ngad: re ngo wa yao: bam re mug: khaung mae" gyo: byid: mung: yao: bam: qobo jham re khyad' pye' byid: nae". Amung: yao: bam: mug:myid re dai kham jo,nho" dam: bo nhao nae".
15 Ngo wa ce: Caung:pa" Yham re lhaug' qu" na mung: cemae akyu" li" mho' ra" akyu" mho' dao: alhab' re tae" gyo: byid: nae" jin" jin" ngad nae".
16 Pe"mung:ga"re ngo wa aire khyin: to: mung: apyad ato mae ngore caung:pa" genae" ra" jo, qo khyo" aire ngo jaung: to: va" ruyang ngad: ra". Ngo wa aire lhaug' zaung" mung: apyad ato mae gug:gam byid: nae".
17 Ni" pho" Davi kad' ru we' dakhyo: ngore jhaug' zaug caung da" mung: nga" tarha" jham re phug' cao" mung: nao re ngoyang amyin" byid' to" ru ja: khao: ngo" re nao cao" kad' na: ngad: re-
18 Ngo ni" pho" Davi re- Israel re yao" myid:zo: qeyang khonhae" re: eib: li" genae" ein: ta" au:- ni" pho" Davi re ngo byid' to" ra" dao:so: re ngo zaui" pyang" nae".
19 Ngadqere: nao we' ni" byumyu" qe wa- tarha" jham re we' nao re byid' to" ra" amyin" jham re khonhae" re: maphug' cao" qu" lo:- so gatau jham re caung:pa" yang: ngad ko" re wa-
20 Ngoyang nao re byid' to" ra" mung" mae" nao re yu: pye' mung: ngore caung:pa" nae" jo, qo khyo" ngo jaung: to" ra" ce: Caung:pa" Yham re ngo shapye' nae" khyi" khao: ngo" mae" byu qe wa aire jung" qi mung: maphug' makhyad' kad' li" genae".
21 Ana" Caung:pa" Yham wa qi: sho' nga: yhe' byid' ru qhug' ngadqere: thao lao"- aikhyo" lai: lo" mo, yaug khao: ngo" wa mug' geyang: Asang wa ce: mung" re we' ce: Caung:pa" Yham re pe"mung: ceru: kad' laug i? ga: myid' li" genae".
22 Ailao" byu qe wa- yao: bam wa- yao: bam: phug' pho" qere Egutu mae" jhui" thug' lo: ra" yao: bam: Mao"So Asang re shapye' pye' geyang: ngad: ra". Yao: bam wa- yao: bam phug' myao" ra" khyo re so gatau khyo byid' pye' mung: aijham re caung:pa" ako". Ce: mathao mae Asang wa ce: kyi" khyag' ru yao: bam: dao mae joe" li" nhao: ru ngad: ra"- ga: tau" li" genae".