3
1 Sholamon nho: yao: pho" kho:kham Davi wa Caung:pa" Yham jo, qo re nyhang" jaung: to" ra". Ai jo, qo wa Yebusi byu Arauna gaug nao: jao: khyo" kad' ra" jo, qo Davi re Asang na: qhu" ra" Yerusalem mae" Moria bam dao mae ngad: ra".
2 Kho:kham Sholamon wa yao: kho:kham kad' ru byid zin ein: zin lho" shid' khye' ein: khye' mae aire kad' qhid: ra".
3 Kho:kham Sholamon kad' ra" Caung:pa" Yham wa qhang phyao: khyaug' xe daung"- lu phyao: shid' xe daung" bo: ra".
4 Phaui: lhab' qe, wa lu phyao: Caung:pa" Yham nho" shid' xe daung" lu mung: myhao phyao: dayo: shid' xe daung" bo: ra". Akhug shad' re qhang gyang" yang thab' to" ra".
5 Qe, mo" qe, wa- shaug' the" yang mug: mung: qhang gyang" yang thab' pye' ra". Aijham re laso' gae lho we' jao co: taui: lho kyaung" tung" te' to" ako".
6 Kho:kham wa- Caung:pa" Yham re qu" yaung" sho' phug' de; ra" laug we' Parvaim mung" mae" vhao" yu: ra" qhang: yang shaung: to" ra".
7 Yao: wa qhang re Caung:pa" Yham khinqae jham- khyao jham- kham: dung: khyid nao: jao: we' kham: baung jham re thab' rumae ci: ra". Mau" zaui: mo, wa khinqae mae kherubin lho co' kyaung" te' ako".
8 Gyang" lho" thao" jo, qo ga: mhang" ra" kug qe, wa qhang phyao: lu phyao: shid' xe daung" daung" bo: ra". Aiwa Gyang" Lho" Thao" Jo, qo nho: khinqae re thab' nae" qhid' mae" qhang joe: datug: khyaug' taung jan" ci mung:- lu phyao: Caung:pa" Yham nho" yao: ngad: ra".
9 Ze,jin" kad' rumae qhang dakyin: ko re ci ra". Amung: tho' mae" qe, khinqae rere: qhang: yang thab' ra".
10 Kho:kham wa yao" mau" zaui: mo, re to' mae" kherubin kad' thug' yu mung: aire qhang: yang thab' yang: aire Gyang" Lho" Thao" Jo, qo mae to: genae" qhid' mae" amyin" re: byid' ra".
11-13 Aijham wa kham: dung: khyo myo, khung: qang yang: thoeshad' ceshad' mae ye; jo, ako". Daung shid' lam: lam: de, mung: ngo" daung" daung" qhang: ako". Ai: daung jham wa qe, agaung: mae yao: cao: jho' tin: nae" qhid' mae" phyid: to: mung: daung dashad' yang qe, dashad' mae" khinqae dao mae joe" sho' lae phyao: shid' xe daung" byang" sho' daung phyid: lhu: to" ra".
14 Gyang" Lho" Thao" Ra" Jo, qo nho: qe, kyo pin: lung: re wa- jid: mo" pin: we' mhai: nyhug- amo,- ane: yang xug' mung: kherubin: lho tung" te' to" ra" gatau: pin: jham: yang kad' ra".
Gyid: Bo" Zang Baung: Shid' Zang
(1 Kh 7.15-22)
15 Kho:kham wa sam xe: ngo" daung" daung" qhang: ra" zang baung: shid' zang kad' mung:- Caung:pa" Yham qhid' kheim: mae zhaug' to" ra". Zang baung: khao: ngo" nho: aau: mae ngo" daung" daung" bo: ra" daung" zang de; ako".
16 Zang au: mae wa jho" qo; to" ra" jao co: kheim" jham: yang shaung: te' to: mung:- gyid: khaung: shi: ce dayo: yang shaung: te' to" ra".
17 Ai: zang shid' zang re Caung:pa" Yham kham: dung: yae mae zhaug' to" ra". Ba vao shad' mae" zang re Yakhin ga: mhang" mung: mug: am: shad' mae" zang re Boa ga: mhang" ra".