11
Shemia Nho: Lapa Dao:
(1 Kh 12.21)
1 Rehoboam Yerusalem khyo joe" lo lao"- yao: wa Yuda we' Benyamin amyu" kaung mae" gai: thao" ra" gyezo: datug: she' taung yaug re khai: zhang" yu: ra". Yao: wa gyekhe' poe khyo ye: mung: mug: am: shad' mae" Israel amyu" kaung qere yao" yang dam: qo" eib nae" qhid' mae" yaung: to" ra".
2 Ngadqere: Asang wa lapa Shemaia re-
3 Kho:kham Rehoboam we' Yuda- Benyamin amyu" kaung mae" byu qere-
4 Naonhaung" mao:nhaung: qe ngad ko" ra" Israel byu qere gye dazin: ge,- naonhaung" alhab' yham phao: lo" ge,- boe" li" ra" khyo wa nga" myid o: ra" khyo ngad:- ga" ra" mungdao: re yeta" kyo: nae" ta" ra". Yao: bam alhab' mo, wa Asang: amyin" dao: jham re mho dao: gyo: mung: Yeroboam re gye maye: zin: ngad: ako".
Rehoboam Gyetab Vogaung: Jham Kad' Ra" Khyo
5 Rehoboam wa Yerusalem mae na: jo, mung: o mae tung" to" ra" Yuda we' Benyamin vogaung: jham re gyetab kad' pye' ra".
6 Ai: vogaung: jham wa- Betlehem- Etam- Tekoa-
7 Bedzu- Sokho- Adulam
8 Gat- Maresha- Zilpa-
9 Adoraim- Lakhi- Azeka-
10 Zoa- Aiyalon- Hebron- vogaung: jham ngad: ra".
11 Yao: wa ai: vogaung: jham re gyai tang sho' gyetab kad' mung: davogaung: mae zug: dayaug yaug san: to" ra". Vogaung: khao: ngo" re zokho zhanlun xau sabyi qang: to: jo, qo jaung: to: mung: go jham we' lhae tad' jham rere: jaung: to" ra".
12 Ceru: kad' yang: yao: wa Yuda we' Benyamin re yao: eib: ra" qao: mae to" to" ra".
13 Israel mung" alhab' mae" khinjaung qe we' Levi byu qe wa mug: thao shad' Yuda mung" khyo joe" li" ako".
14 Levi byu qe wa yao: bam: mhin: gyo, jao: jham re we' mug:myid gatau re shapye' to: co' mung: Yuda mung" we' Yerusalem khyo zaug byaung" lo: ako". Pe"mung:ga"re Israel kho:kham Yeroboam we' yao" khu mae xo' kad' ra" mo, wa yao: bam re Asang: khinjaung qekhyo" caung da" nae" akhang" mabyid: ko" ngad: ra".
15 Yeroboam wa yui jham re caung:pa" nae" yao" yang nung: jaung nau" lho kad' to" ra" solho jham re caung:pa" nae" qhid' mae" taung bug so qere caung:pa" ra" jo, qo mae caung da" byid: nae" yao: yao" khinjaung qere san: to" ra".
16 Yao: bam wa yao: bam: phug' pho" qenho: Mao"So Asang re ngaui" xeim: qo" ngaui" byid: nae" qhid' mae" Israel amyu" kaung alhab' mae" Asang re caung:pa" byid: nae" nhag' lam: gaigai: kao bau mo, wa Levi byu qe: thao Yerusalem khyo cao" ye" ako".
17 Ceru wa Yuda mung"dan: re qam: bo nhao mung: yao: bam sam zin lam: lam: Sholamon nho: yauggai zo: Rehoboam re bao" thaug' byid' ako". Amung: yao: bam wa kho:kham Davi we' kho:kham Sholamon eib: ra" qao: mae na: ruru: yao: bam qo" na: ako".
Rehoboam Nho: Yham Khaung
18 Rehoboam wa Mahalad re lo,xo' xo' yu: ra". Yao: pho" wa Davi nho: yauggai zo: Yerimod ngad: mung: yao: myhi" wa Eliab nho: myiqe: zo: Yese nho: yao: myid: Abihai ngad: ra".
19 Yao: tao wa Yeu- Shemaria- Zaham ga" ra" yauggai zo: sam yaug qo" ako".
20 Thao re yao: wa Absalom nho: myiqe: zo: Makha re lo,xo' yu: ra". Yao: tao wa Abiya- Atai- Ziza- Shelomid ga" ra" yauggai zo: byid yaug qo" ako".
21 Rehoboam wa alhab' re yham sang myhi" daxe: she' yaug qo" mung: myingai khyaug' xe yaug qo" ra". Yao: wa yauggai zo: shid' xe: she' yaug- myiqe: zo: khyaug' xe zo" nho: yao: pho" ngad: ra". Yao" yham sang myhi" we' myingai qe alhab' tho' mae Makha re je: jhid'de; ra".
22 Yao: wa Makha nho: yauggai zo: Abiya re yao" yao: zo: geje qe alhab' tho' mae je: jhid'de; ra". Yao" khu mae kho:kham xo' kad' nae" yaug khyo" aiyaug re khyin: yu: ra".
23 Rehoboam wa yao" yauggai zo: qere pha,jhi" bo bo za: mau" jaung byid' ra". Yao: bam re Yuda we' Benyamin jao: sho' mae jo; ra" gyetab vogaung: jham mae nha: to" ra". Yao: wa yao: bam re mabyag maqhag' lo: bao" thaug' byid: mung: yham sang myhi" myo: sho' rere: yao: bam re yu byid' ra".