18
Davi Nho: Gye We' Sin" Ra" Aung Doe; Khyo Jham
(2 Sa 8.1-8)
1 Dayo, kyo thao Davi wa Philisti byu qere gye dam: khe' zin: mung: aung: pye' ra". Yao: wa Gat vogaung: we' ai: lhang" gam: vogaung: jham re yao: bam: lo, mae" lhad' yu: ra".
2 Yao: wa Moba byu qere re: aung: pye' ra". Ai bam wa yao" qao: mae na mo, boe" mung: yao: re khang: ke' ako".
3 Ai: thao Davi wa Hamad mug: nhae mae" Zoba mug: mae" Suri kho:kham Hadareze re gye khe' ra". Pe"mung: gare yao: wa Uphrad gyaung: tho' dau mug: myid re eib nae" seim" na: ru yang ngad: ra".
4 Davi wa aiyaug nho: gye khe' myao: lhin" dataung- myao: jui: gyezo: nhad' taung- khyid su: gyezo: shid' tug' re taung" yu: ra". Yao: wa gye khe' myao: lhin" dayo lam" qhid' mae" za: myao: jham re taung" to: yang:dang: gu: alhab' re qhao" kao: gyi: zhe' pye' byid' ra".
5 Kho:kham Hadareze re bao" yu nae" qhid' mae" Damasku mae" Suri byu qe wa gye tab datab re nhao: ke' gelao"- Davi wa ai bam re ye khe' zin: mung: shid' tug: shid' taung yaug re se' pye' ra".
6 Ai: thao yao: wa yao: bam: mug: myid mae gyetab kad' ra". Yao: bam wa yao" qao: mae" bo mo, boe" lo mung: yao: re khang: ke' ako". Asang wa Davi re khyi" khao: ngo" mae aung doe; nhao: ra".
7 Davi wa Hadareze nho: zug: qe ci ko" ra" qhang go jham re sham" yu mung: Yerusalem khyo ci lo" ra".
8 Yao: wa Hadareze yang eib: ra" Tibhat we' Kun vogaung: mae" gyid: ne myo: sho' rere: yu: pye' ra". (Thao re Sholamon wa ce: gyid: ne jham re qid lhao:- zang baung: jham we' Caung:pa" Yham qhid' mae" gyid: ne zai jham kad' yu: ra".)
9 Hadareze nho: gye tab geim" Davi yang aung: pye' ra" khyo re Hamad kho:kham Toi the' gyo" ra".
10 Airumung: Toi yao: yao: myo: sho' lhang ye khe' zin" qu" ra" Hadareze re Davi aung: pye' ru qhid' mae" Davi re ye au" nae" we' nga: ye: yhe' byid: nae" yao: yauggai zo; Yoram re nhao: ke' ra". Yoram wa qhang- ngaui- gyid' yang kad' ra" jhaung qhu" jham Davi jhao" ci ye: byid' ra".
11 Kho:kham Davi wa ai jham re yao: khe' aung: yu: ra" Edom- Moba- Amon- Philisti- Amaleg byumyu" qe mae" sham" yu: ra" qhang- ngaui jham we' daga" caung:pa" ru mae ci nae" qhid' mae" qhaug' byid' ra".
12 Zeruia nho: yauggai zo: Abishai wa Edom byu qere xo: lao: khaung: mae khe' aung: pye' mung: datug: she' taung yaug re se' pye' ra".
13 Yao: wa Edom mung" jao: sho' mae gyetab kad' mung: aimae na ko" ra" mo, wa kho:kham Davi eib: ra" qao: mae na mo, boe" lo: ako". Asang wa Davi re khyi" khao: ngo" mae aung doe, nhao: ra".
14 Davi wa Israel mung" geim" re eib: mung: yao" mung" byu qere khonhae" re: tarha" din: nyang: ra" khyo" eib: khang" ra".
15 Abishai nho: yao: mao: Yoab wa gyezug: mo" ngad: ra". Ahiluda nho: yauggai zo: Yehoshaphad wa mhomyi: tung" xam: au: jhaung ngad: ra".
16 Ahitub nho: yauggai zo: Zadog- Abiatha nho: yauggai zo: Ahimeleg shid' yaug wa khinjaung qe Seraia wa kho:kham kho" mug sug' tung" yaug ngad: ra".
17 Yehoiada nho: yauggai zo: Benaia wa Davi nho: kao lhaug' au: jhaung ngad mung: Davi nho: yauggai zo: qe wa yao" mau" vin: ru mae myhao: ra" aya: jham re zaui" ci: ako".