16
1 Yao: bam wa Dao: Thang" Ban" re Davi yang kad' to: byid' ra" zaung khyo cilo mung: ai: mae loke' to" ako". Ai: thao yao: bam wa ngaui" xeim: jham we' zam" khug: ra" ngaui" xeim: Mao"So re qhaug' byid' ako".
2 Davi wa ngaui" xeim: jham re bin: qhaug' byid: thao Asang: mang mae amyu" byu qere shaman" byid: mung:-
3 Yao: bam alhab' mo, re zo:ve gae byid' ra". Yao: wa Israel mung" mae" yauggai- myiqe: yaug khao: ngo" re mug dakhai"- shokyaug' daje, je, we' sabyi' shi: kyaug' dajhid' jhid' gae byid' ra".
4 Davi wa Dao: Thang" Ban" qhid' au: mae Nghaui"caung: mung: Mao"So re caung: khin" yang: Israel nho: Mao"So Asang re caung:pa" ru mae au: she genae" qhid' mae" Levi byu daqhae: re khyin: san: to" ra".
5 Asab re wa au: jhaung khyo"- Zekharia re wa yao" nho: bao" thaug' au: jhaung khyo" san: to" ra". Yeiela- Shemiramof- Yehie- Matithia- Eliab Benaia- Obed Edom- Yeiela bam re wa tang:be, mo, khyo" san: to" ra".
6 Asab wa jhe' cang" be, mung:- Benaia we' Yahazie khinjaung shid' yaug wa Dao: Thang" Ban" qhid' au: mae man: man: labo" mad genae" qhid' mae" san: to" ra".
7 Airu: Davi wa Asab we' yao" Levi mao:nhaung: qere Asang re Nghaui"caung: caung: khin" nae" qhid' mae" qo sao qhid' byid' qhid: ra".
Caung: Khin: nghaui" caung:
(Ckh 105.1-15; 96.1-13; 106.1,47,48)
8 Asang re jeju so: byid: ge,- yao" qi" qhang: ra" khyo re ta" hau: kyo: ge,.
Byumyu" qere yao: kad' ra" mau" zo" ta" kyo: ge,.
9 Asang re Nghaui"caung: ge,.
Yao: kad' ra" mug' pho: mau" zo" jham re ta" kyo: ge,.
10 Yao" yang ngonhaung" re sang: rumung: ngaui bau" na ge,.
Yao: re caung:pa" byid: mo, alhab' ngaui bai" ngaui lho" na ge,.
11 Bao" yu nae" qhid' mae" Asang jhao" locaung: pa" ge,.
12-13 Yao" daui daui yaug Abraham nho: myid:zo: qe we"-
Yao: khyin: yu: ra" yaug Yaku nho: myid:zo: qe we"-
Mao"So kad' qhu" lo: ra" mug' pho: mau" jham re beim: ge,.
Yao: byid' ra" dao: kho' khyo rere: beim: so: ge,.
14 Asang wa ngonhaung" Mao"So ngad: ra".
Yao" nho: amying" dao: jham wa mug: myid geim" qhid' mae" ngad: ra".
15-16 Apyad ato mae dang: jo, nae" qhid' mae" Abraham we' kad' to" ra" dao: thang"-
Isag' we' kad' to" ra" dao:so: ngad: ra" Mao"So: dao: thang" re khonhae" re: dato" myhid' ge,.
17 Asang wa Yaku we' dao: thang" to" ra".
Ai: dao: thang" wa apyad ato mae dang: jo; ra".
18 Yao: wa- ngo nao re Khanan mug: myid byid: nae"- ai wa ni" jo,nho" boe" jo, nae"- ga: ta" ra".
19 Mao"So byumyu" wa byu mamyo: ngad: ra".
Khanan mung" mae byubang" boe" na: ako".
20 Yao: bam wa damug: mae" damug:- Kho:kham damung"dan: mae" damung"dan: du" phao: lae" qin" ako".
21 Ngadqere: yao: bam re khag' yang deim" zag zo: nae" akhang" Mao"So mabyid: ngad: ra".
Yao: wa kho:kham qere ai bam re gug: gam byid: nae" qhid' mae" ta" peim" mung:-
22 Ngoyang khyin: to" ra" daui daui mo, re dae date' ge,.
Nga" lapa qere dathe' zao" ge, ga: ta" ra".
23 Mug: myid geim" mae" alhab' mo, we"- Asang re khin" caung: byid: ge,.
Yao" yang ngonhaung" re khyad' yu: ra" khyo ngaui bau" lau dao: re ba khao: ngo" ta" hau" na ge,.
24 Yao" nho: phungbao re byumyu" alhab' mo, re ta" hau" kyo: ge,-
byumyu" alhab' re yao" nho: qam: so' thin: ra" mau" zo" jham ta" hau" kyo: ge,.
25 Asang wa qi" qhang: rumung: gyai yao: caung: khin" byid: nae" man: qi" ra" so aho jham alhab' tho' mae je yang: yao: re nga: yhe' byid: ca" ra".
26 Gatau: byumyu" alhab' mo; nho: so jham wa sulho jham za: ngad: ako".
ngadqere: Asang wa mug: khaung jham re phan" to" ra".
27 Phungbao we' kho:kham aso' wa yao: re lhang" kham" to" ra".
Yao" nho: Caung:pa" Yham mae kheim: so' we' yaung" ru byang" jo; ra".
28 Myid gaung dao mae" byu qe we"- Asang re caung: khin" byid: ge,-
yao" nho: phungbao we' qam: o: re caung: khin" byid: ge,.
29 Asang: nho: phung bo: ra" mang a re caung: khin" byid: ge,- ngaui" xeim: ci mung: yao" Caung:pa" Yham khyo vao li" ge,.
Gyang" lho" yaug thug' li" re yao" qhid' kheim: mae goe; pa" ge,.
30 Yao" qhid' kheim: mae gyaug: nin" na ge,.
Myid gaung wa yao" jo, qo mae tang: jo, nhao mung: magai: qui: ngad: ra".
31 Myid gaung we' mug:gaung we"- ngaui bau: ge,- Asang wa kho:kham ngad: rure byumyu" mung"dan: jham re ta" kyo: ge,.
32 Pang:lai: we"- nao mae bo: ra" gug'nyhug' ja: khao: ngo" we"- hug' myang ge,- jao: gyu" jham we"- nao mae bo: ru alhab' we' daga" ngaui bau: ge,.
33 Seyo mae" sag' gae jham wa Asang gyo" li" mung: myid gaung re eib: ra" au: ngaui bau: ngaui lho" li" genae".
34 Asang re caung: khin" byid: ge,- Asang wa gai: rumung: yao: re jeju beim: so: byid: ge,. Yao" jhid' de; myid wa apyad ato mae ngad: ra".
35 Ngonhaung" Asang Mao"So we"- ngonhaung" nao re jeju qo" beim: so: mung:
ni" gyang" lho" mang re qo" caung: khin" nae" qhid' mae" ngonhaung" re khyad' yu mung:-
byumyu" mung: dan: jham: phaung mae" ngonhaung" re dam: jhui" tug' yu la,.
36 Israel nho: Mao"So Asang re caung: khin" ge,- ana" re: apyad ato mae re: yao: re caung: khin" ge,.
Ai: thao amyu" byu qe alhab' wa- Amen- ga: ta" mung: Asang re caung: khin" ako".
Yerusalem We' Gibeon Mae Caung:pa" Ra" Khyo
37 Kho:kham Davi wa Dao: Thang" Ban" to" ra" jo, qo mae kad' ra" caung:pa" mau" mae Asab we' yao" Levi mao:nhaung: qere khonhae" re:mau" zaui: nae" san: to" ra". Yao: bam wa yao: bam: mau" re ba khao: ngo" aimae zaui" ako".
38 Yeduthun nho: yauggai zo: Obed- Edom we' yao" kaung mae" byu khyaug' xe: she' yaug wa ai bam re bao" byid' ako". Hosa we' Obed- Edom wa kham: dung: re gug: gam au: jhaung qe ngad: ako".
39 Ngadqere: khinjaung Zadog we' yao" nho: khinjaung mao: nhaung: qe wa Gibeon mung" mae" caung:pa" jo, qo mae Asang re caung:pa" ra" mau" mae au: jhaung kad' mo, ngad: ako".
40 Yao: bam wa ba khao: ngo" ne,seim myi"thao Asang: yang Israel byu qere byid' to" ra" Tarha" mae tung" to" rure cao" mung: ngaui" xeim: jham re phan dao mae phad' ngaui" byid' ako".
41 Aimae Heman- Yeduthun we' gaje qe wa je yang: Asang: nho: apyad ato: jhid'de; myid qhid' mae" caung: khin" nghaui"caung: nae" khyin: san: to: qhug' ako".
42 Heman we' Yeduthun shid' yaug wa labo" mad jhe' cang" be,- gatau: ngaui" zai jham re caung: khin" Nghaui"caung: au: be; myhang" ru mae re: au: jhaung ngad: ako". Yeduthun nho: kaung qe wa kham: dung: gug: gam au: jhaung qe ngad: ako".
43 Ai thao yaug khao: ngo" wa yham phao: lo" ako". Davi re: yao" yham byu qe we' dayo, zo: lo" na nae" yham phao: lo" ra".