CAUNG: KHIN" 91
Ngonhaung" Re Gug: Gam Byid" Ra" Mao"So
1 Gug: gam: ru qo" yu nae" qhid' mae" Asang jhao" ye: yaug khag' ngadqere:-
qam: so' bo: thao" ra" Asang khug mae gug: gam za: na: jo, yaug khag' ngadqere:-
2 Yao: re- nao wa ngore gug: gam byid' ru we' gye vha byid: yaug ngad: ra".
Nao wa nga" Mao"So ngad mung: nao mae ngo lam khug: na:- ga: qo" ta" ra".
3 Yao: wa nao re vho' jo; ra" gyaug ci" ja: alhab' mae" gug: gam byid: nae".
Shid nhao ba: ra" no phyo: alhab' mae" re: gug: gam byid: nae".
4 Yao: wa nao re yao" daung jham: yang nghoe' byid: nae".
Yao: qu" caung: ra" khug mae nao qo" gug: gam: na nae".
Yao" jhaug' zaug: ruyang nao re gug: gam byid: mung: gye vha byid: nae".
5 Nao wa myi" ayo, mae" gyaug ci" ja: re magyaug ca". Na" ayo, mae
nyag din taung" khe' zin" lo: rure re: magyaug ca".
6 Mug: cad' mae boe" ra" qam" no jham we' na" gaung: kao" mae khe' se'
lo: ra" makhyang: mashab: ru jham rere: magyaug ca".
7 Ni" nhae mae dataung yaug- ni" avai: ayae mae datug yaug
gyang: shid qere" nao re dae maqo" te' genae".
8 Nhag' lam: kaui: ra" makhyang: mashab mo, khoru:
qobo dae qhug' de, zo" rure nao the' qu" myao: li" nae".
9 Nao wa qam: so' qi" qhang: thao" ra" Asang re
ni" gug: gam byid: yaug khyo" boe" nhao: ava".
10 Aimung: nao re byo; qeim: ru pe" yang re: the' thaung" zao" nae" mangad:
ni" yham nhae khyo aqan alan: ru pe" joe" tin" li" nae" mangad:.
11 Nao khai: ye: qere: lhaug' zaung" gug: gam byid: nae" qhid' mae"
Asang wa yao" mug: lagyo: jham re jaung: to: byid: nae".
12 Laugbaui mae ni" khyid au: mathaung: shao: ga:
yao: bam: lo; yang ceim" vo; yu byid' li" genae".
13 Nao wa khangkhyi jham we' lhao maui jham re- gyai lhe" ra" khang khyi jham we'
daug bo: ra" lhao maui jham re qo" zab: pye" pye' li" nae".
14 Mao"So wa- ngore jhid'de; mo, re ngo khyad' yu nae"-
Ngo re Asang khyo" toe' mo, re ngo gug: gam byid: nae".
15 Yao: bam ngore khai: yao lao" ngo tau: byid: nae"
yao: bam qug: khai: qhug' na: au: yao: bam we' ngo daga" na nae". Yao: bam re ngo khyad' khyui: yu mung: nga: yhe' byid: nae".
16 Ngo yao: bam re kao qhang nhao: ruyang
aphug' jhaung qhu" byid: nae". Yao: bam re ngo khyad' yu nae"- ga: ta" ra".