CAUNG: KHIN" 9
Mao"So: Tarha" Din: Nyang: Ra" Mathao Mae Yao: Re Jeju Beim: So" Ru
(Davi Peim: Ra" Nghaui"caung:)
1 Asang we"- ngo wa nga" nhag' lam: alhab' yang nao re jeju caung:khin" nae"-
ngo wa nao kad' ra" mug' pho: mau" zo" alhab' re ta" hau: nae".
2 Ni" mathao mae ngo wa ngaui bau: ngaui lho" nghaui"caung: nae"
Qam: so' qi" thao" ra" Mao"So we"- ngo wa nao re caung:khin" nae".
3 Nao thug' li" lao" nga" gyevo jham tug' phao: lo" ako".
Yao: bam shid: gyang: lang" lo" ako".
4 Nao wa ni" tarha" dao: kho' rumae din:man" mung: tarha" nyang: ra".
Aimung: nao wa nga" bo: de, yang: dao: kho' byid' ra".
5 Nao wa Mao"So re maba: ra" byu qere dao: phyid' mung: makhyang: mashab mo, re phyo' qheim" pye' ra".
Yao: bam re khonhae" re: mamyid: beim: lo:nae".
6 Ngonhaung" nho: gyevo qe wa apyad ato mae baui" byaug: avako".
Nao wa yao: bam: vogaung: mo" jham re phyo' qheim" pye' mung: yao: bam re bin sho' to" myhid' pye' ava".
7 Ngadqere: Asang wa apyad ato mae kho:kham ngad: jo; ra".
Yao: wa yao" zaung tao" re dao: kho' nae" qhid' mae" to" to" ava".
8 Yao: wa mug:myid re tarha" din:man" ra" khyo" eib: na: ra".
Yao: wa mung"dan: jham re tarha" din: nyang: ruyang dao: kho' ra".
9 Asang wa deim" zag zo: qhug' mo; nho: khug ngha jo, qo ngad: ra".
Qug: khai: qhug' ra" au: re gug: gam: na nae" jo, qo re: ngad: ra".
10 Asang we"- nao re ba mo, wa nao mae lam khug: na: li" genae".
Nao wa nao jhao" li" yaug khag' rere: mashapye' to: ngad: ra".
11 Ziun mae eib: na: ra" Asang re nghaui"caung: ge,-
yao: kad'va" ra" mau" re byumyu" cao jab re ta" kyo: ge,-
12 Mao"So wa qug: khai: phau: zo: mo, re myid: beim" ra".
Yao: wa yao: bam: hug' ngug thoe re mato" myhid' ngad: ra".
Aimung: yao: bam re shad' nghung: mo, re yao: qobo dae byid' ra".
13 O" Asang we"- ngore nhag' khyag' yu la,- nga" gyevo qeyang boe" nhao: ra" qug: khai: qug: khai: re myao byid: la,-
O" Asang we"- ngore shid: rumae" khyad' yu la,.
14 Aire ngo wa Yerusalem mae" mo,byu qe: qhid' kheim: mae qo" ye, mung: nao re ngo caung:khin" ra" khyo alhab' re yao: bam re qo" ta" kyo: nae" ngad: ra".
Nao: yang ngore khyad' yu yang: ngo ngaui bau: nae".
15 Mao"So re maba mo, wa dung:khung: dau: mung: gyo" vao lo" ako". Yao: bam wa yao: bam yao" lha" mae myi" ako".
16 Asang wa yao" tarha" din:man" ra" dao: kho' ruyang yao" gaung yao: qhu" byid' ava".
Aimung: makhyang: mashab mo, wa yao: bam yao" lo, mau" yang myi" ako".
17 Shid: ru wa makhyang: mashab mo, alhab' we' Mao"So re ngag: lhaui" pye' mo, alhab' nho: lo" thao" jao kham ngad: ra".
18 Myaung sho: mo, re khonhae" re: qu" lhaui" to: qhug' genae" mangad:- jo,nho" maqo" mo; nho: myid: lao" rure apyad ato mae khyoe' mhan" pye' nae" mangad:.
19 Asang we"- Li" ri:- byu qe:yang nao re dangag: ha: pye' nhao- Mao"So re maba: ra" byu qere ni" qhid' kheim: khyo jhui" yu mung: yao: bam: dao mae dao: kho' byid: wa,.
20 O" Asang we"- yao: bam re kyaug' wa- yao: bam wa
shid ba: ra" byu za: ngad: ra" khyo re yao: bam re ba nhao wa,.