CAUNG: KHIN" 89
Qug: Khai: Qhug' Au: Mae" Nghaui"caung: Dalam:
(Ezrahid byumyu" Ethan peim: ra" ji:)
1 O" Asang we"- ni" mabaui mabyo; ra" jhid'de; myid re ngo khonhae" re:
Nghaui"caung: caung: nae".
Ngo wa ni" jhaug' zaug: ra" khyo re apyad ato mae ta" hau: byid' na nae".
2 Ni" jhid'de; myid wa yo, khyin: khao: ngo" mae
gang" tang: jo, nae" rure-
ni" jhaug' zaug: ra" khyo re mug:gaung we' dakhyo:- mabaui mabyo, jo; rure ngo ba:.
3 Nao wa- ngo khyin: yu: ra" yaug we' ngo dao: thang" to: va"
nga" daui daui yaug Davi re dao:so: byid: va".
4 Ni" myid:zo: qemae" dayaug yaug wa khonhae" re: kho:kham boe" na nae".
Ni" kho:kham yham khaung re apyad ato mae ngo tang" to: byid: nae"- ga: ta" ra".
5 Mug: khaung mae" mo, wa nao kad' ra" mug' pho: mau" jham re nghaui"caung: byid' ako".
Asang we"- gyang" lho" mo, wa ni" jhaug' zaug: rure nghaui"caung: byid' ako".
6 Asang we"- nao we' dau: ru mug: khaung mae khag' dayaug re: mana.
Mug: khaung mae" mo, wa nao we' mai qi" ru khag' mana.
7 Nao re gyang" lho" mo; phaung qham mae phug' myao" ako".
Yao: bam alhab' mo, wa nao re gyaug phug' yang: ye; bam: ako".
8 Qam: so' bo: thao" ra" Asang we"- nao we' dakhyo: qam: bo: ru khag' mana.
O" Asang we"- khyo ja: khao: ngo" mae nao wa jhaug' zaug: ra".
9 Nao wa kheim: so' qi" yang: panglai: re eib: na: ra".
Nao wa ai: nho: nhag' yo" ra" bang: lhung" jham re tae" lo" nhao: ra".
10 Nao wa gug'nyhug' qi:- min: yui Rahab re khyoe' ke' mung: se' pye' ra".
Ni" qam: so' qi" yang ni" gyevo qere nao aung: pye' ra".
11 Mug: khaung wa ni" mae" ngad: ra".
Myid gaung re: ni" mae" ngad: ra". Mug: myid we' aimae bo: ru alhab' re nao kad' to" ra".
12 Nao wa mug: am: we' mug: thao re phan" to: mung:-
Tabo bam we' Hermon bam wa nao re ngaui bau: ngaui lho" nghaui"caung: byid' ako".
13 Nao wa khonho" kheim: so' qi" ra" i?
Ni" qam: wa khonho" qi" qhang: ra" i?
14 Ni" kho:kham mung"dan: wa- dangman" ru we' tarha" din" rumae aqao: te" to" ra".
Nao kad' ra" mau" zo" alhab' mae jhid'de; myid we' jhaug' zaug: rure qhu" byid' ra".
15 Nao re nghaui" caung: jham khyo" caung:pa" mo, wa khoqhi" ngaui bau: nga: lho" ako" i?
Ni" nhag' khyag' ra" bo" bao khug mae daui: na mo, wa khoqhi" nga: lho" ako" i?
16 Ni" mathao mae yao: bam wa ba geim" ngaui bau" na: ako".
Aimung: yao: bam wa ni" gai: ra" mathao mae nao re caung:khin" byid' ako".
17 Nao wa ngonhaung" re qi: sho' aung doe; khyo byid' ra".
Ni" jhid,de; myid khyo" yang nao wa ngonhaung" re caung: nhao: ra".
18 O" Asang we"- nao wa ngonhaung" re gug: gam byid: yaug re khyin: to: byid' ra".
Israel nho: Gyang" Lho" ra" Mao"So nao wa ngonhaung" re kho:kham byid: va".
Davi Re Byid' Ra" Mao"So: Nho: Dao:So:
19 Nao wa ni" nho: jhaug' zaug: ra" daui daui mo, re ganhae" gaco' mae" qhu" lho khyo" ta" va".
Ngo wa mang qi" ra" gyezo: dayaug re bao" thaug' byid: va". Nga" byumyu" qemae" ngo khyin: yu: to" ra" yaug re ngo: yang kho:kham zaung tao" byid: va".
20 Ngo wa gyang" lho" ra" xau gyad mung: nga" daui daui yaug
Davi re kho:kham boe" nhao va".
21 Nga" qam: wa khonhae" re: yao: we' daga" jo; jo, nae".
Nga" kheim: so' wa yao: re qam: bo nhao: li" nae".
22 Yao" gyevo qe wa khonhae" re: yao: re maqo" aung: pye' li" genae".
Nhag' lam: kaui: ra" makhyang: mashab mo, wa yao: re nghang: mo, yaug khao: ngo" re se' pye' byid: nae".
23 Yao" gyevo qere ngo: yang khyoe' pye' mung: yao: re
nghang: mo, yaug khao: ngo" re se' pye' byid: nae".
24 Ngo wa yao: re jhid'de; mung: yao" dao mae jhaug' zaug: na nae".
Ngo wa yao: re khonhae" re: aung doe, nhao nae".
25 Ngo wa yao" mung"dan: re- Mug:gaung: Pang:lai: mae"
Uphrad' qid gyaung: joe" sho' ce" laung: byid: nae".
26 Yao: wa ngore- nao wa nga" Pho" we' nga" Mao"So ngad: ra".
Ngo re gug: gam byid: yaug we' nga" khyad' yu: Asang ngad: ra"- ga: ta" ra".
27 Ngo wa yao: re yauggai zoqhid' boe" nhao mung:-
kho:kham alhab' tho' mae je yang: qi" qhang: thao" yaug boe" nhao nae".
28 Ngo wa yao: re byid' to" ra" dao:so: re
khonhae" re: zam" to: mung: yao: we' to" ra" nga" dao: thang" wa apyad ato mae gang" tang: jo, nae".
29 Yao" nho: kho:kham yham khaung nyaug wa- mug:gaung we' dakhyo: gang" tang: jo, nae".
Yao" myid:zo: qemae" dayaug yaug wa khonhae" re: kho:kham boe" na: li" nae".
30 Ngadqere: yao" myid:zo: qe wa nga" tarha" jham re
shad' mung: nga" amyin" jham we' dakhyo: maphug' cao" ko" ngad: re-
31 Ngo mho" shid' ra" khyo jham re yao: bam
pe" xan: masun: mung: nga" amyin" jham re maphug' cao" mazam: gengad: re
32 Ngo wa yao: bam: qobo: qhid' mae" yao: bam re qobo dae byid: nae".
Yao: bam: shad' ra" khyo jham: qhid' mae" yao: bam re dayin dayo: kyi: zo: nhao nae".
33 Ngadqere: ngo wa Davi re jhid'de; rure mathang: pye' nae".
Yao: re byid' to" ra" dao:so: rere: mabaui mabyo, nhao nae".
34 Yao: we' to" ra" nga" dao: thang" rere: maphyo' pye' nae".
Yao: re byid' to: va" dao:so: dalam: rere: madam: tug' yu: pye' byid: nae".
35 Ngo wa nga" gyang" lho" ra" mang-a mae dalhang: dae bin sho' dao:so: ke' to: va".
Ngo wa Davi re khonhae" re: mamhug' nae".
36 Yao: wa myid:zo: qe khonhae" re: aqo" na: li" nae".
Aimung: ba azho: na na wa yao" kho:kham mung"dan: re lhaug' qu" byid' na nae".
37 Ai: ru wa mug:gaung mae" sagse: boe" jo; ra".
lho" we' dakhyo: yo, byang" sho' ngad: jo, nae".
Kho:kham Gye Seim" Lo" Byaug: Rure Myid: Kaug' Ra" Ngug Ji:
38 Ngadqere: nao wa nao: yang khyin: to" ra"
kho:kham re nhag' yo: va". Nao wa yao: re
shapye' to: co' mung: ngag: lhaui" pye' va".
39 Nao wa ni" daui daui yaug we' dang: to" ra" dao:so: re phyo' pye' va".
Aimung: yao" ba maug: re tham: bab bam" mae shapye' khyo" pye' ava".
40 Nao wa yao" vomo" nho: vang jham re
phyo' khyo" pye' mung: yao" gyezaung jham re byo; qeim: jo, nhao: ra".
41 Ayae khyo" su" lai: lo" mo, alhab' wa-
yao" jo,nho" jham re khug' yu: lo" ako". Yao" yham kyo: cao: alhab' mo, wa yao: re ceim" qi: pye' ako".
42 Nao wa yao" gyevo qere aung doe, nhao: pye' ava".
Nao wa yao: bam alhab' re ngaui bau: nhao: ava".
43 Nao wa yao" gyezai shae lhae jham re pe" akyu" mabo lo: boe" nhao: pye' ava".
Aimung: yao: re gyekhe' jao: mae seim" nhao: pye' ava".
44 Nao wa yao" kho:kham zaung: bao" re yu: pye' byid' ava".
Aimung: yao" kho:kham zaung tao" re myid gaung khyo tau: lhang" khyo" pye' ava".
45 Nao wa yao: re yao" ayo, majoe" shi:re mao: nhao: ava".
Aimung: yao: re nga: yeim nhao: pye' ava".
Loe, Beim Nhao Nae" Qhid' Mae" Akyu" Mho' Dao:
46 Asang nao wa apyad ato mae vho' byaug naeva" i?
Ni" nhag' yo" ru wa khomyhao" myao" sho' myi: we' dakhyo: nga" na nae" i?
47 Nga" kao so' wa khonho" lang" rure myid: beim: wa,-
Shid: lo" ba: ra" mo, ngonhaung" alhab' mo, re nao: yang phan" to" rure myid: beim: byid: la,.
48 Mashid losho' khag' qo" daui: na nae" i?
Xao su byu wa lab bug khyo malo" nae"khyo: khoru: qo" kad' nae" i?
49 Asang we"- qhid' phyao: mae" ni" nho: jhid'de; ra" sagse: jham wa khai: lo" byaug va" i?
Nao: yang Davi re byid' to" ra" dao:so: jham wa khai: lo" byaug va" i?
50 Ni" daui daui yaug ngo khonho" roe" zo" ru qhug' na: rure dato" myhid' pye'- Mao"So re maba: ra"
taung bug qeyang ceim" nhang" ru alhab' re ngo khoru: phau: zo" lai: lo: rure dato" myhid' pye' byid:.
51 O" Asang we"- ni" gyevo qe wa nao: yang khyin: yu: ra" kho:kham Davi re ceim" roe" zo" ako".
Yao: khai: lo" khai: mae ceim" roe" zo" na: ako".
52 Asang re apyad ato mae- caung:khin" byid: ge, wo".