CAUNG: KHIN" 80
Byu Myu" Re Dam: Tau: To' Byid: Nae" Qhid' Mae" Akyu" Mho' Dao:
(Asab peim: ra" caung:khin"nghaui" caung:)
1 O" Israel re zaung" ra" yao zaung" yaug we"- ngonhaung" re tae" gyo: byid la,- ni" yao kyaung" nho: au: she yaug we"- ngonhaung" re
gyo: byid: la,- nao wa daung de; ra" gug'nyhug' dao mae" ni" zaung tao" mae zaung: jo, mung:-
2 Nao yao" gaung re Ephrim kaung Benyamin kaung we'
Manashe kaung re qhu" byid: wa,- ngonhaung" re ni" qam: qhu" byid: mung: ngonhaung" re li" khyad' yu la,.
3 O" Mao"So we"- ngonhaung" re dam: jhui" tug' yu la,
ngonhaung" re ni" nho: nhag' khyag' myid qhu" byid: mung: ngonhaung" wa khyad' yu: ru qhug' nae".
4 Qam: so' bo: thao" ra" Asang Mao"So we"- ni" byumyu" qenho: akyu" mho' dao: re
khomyhao" myao" sho' xo' mung: nhag' yo" na shi:nae" i?
5 Nao wa zo: nae" qhid' mae" nhag' kaug' ru- shaug' nae" qhid' mae"
ngug byid keim qi: ngonhaung" re byid: ra".
6 Nao wa avai: ayae mae" byumyu" qeyang ngonhaung" nho: mug: myid re khe' khyad' yu: pye' nhao: ra".
ngonhaung" nho: gyevo qe wa ngonhaung" re roe" zo" ako".
7 Qam: so' bo: thao" ra" Mao"So we"- ngonhaung" re
jhui" tug' yu la,. ngonhaung" re ni" nho: nhag' khyag' myid qhu" byid' ngad: re ngonhaung" wa khyad' yu: ru qhug' nae".
8 Nao wa Egutu mae" sabyi naui cilo: ra". Nao wa gaje: byumyu" qere khe' thug' pye' mung:
yao: bam: mug: myid mae ai: rure qho" to" ra".
9 Nao wa ai:ru yaug: qi" li" nae" qhid' mae" jo, qo dajo, qo re sho' pye' ra".
Ai: nho: agyi: jham wa gyai no; khyo cin" gyo" lo" ra". Aimung: sabyi naui wa damang: geim" nghoe' lo" ra".
10 Aiwa bug gaung jham re ba sham: nghoe' mung: ai: akaung jham wa gyai qi" ra" shaug' gae jham re
qab: nghoe' pye' ra".
11 Aiwa yao" akaung jham re Mug:gaung: panglai: khyo cin" ke' mung"
Uphrad qid gyaung: joe" sho' naui: bye; lo" ra".
12 Nao wa pe"mung: aire qae: kham" to" ra" khyae jin jham re phyo' pye' i?
Ana" wa ayae khyo" su" lai: lo" ra" yaug khao: ngo" yang ai: sabyi shi: jham re qo" khug' ako".
13 Vo, jaung jham wa aire zab: pye" pye' ako".
Aimung: seyo: gug'nyhug' lhe: jham re: aimae" zo" gyi" na: ako".
14 Qam: so' bo: thao" ra" Mao"So we"- ngonhaung" jhao" lhang: lo wa,.
mug:gaung dao mae" ngonhaung" re qu" khyo" ke' wa,- ni" byumyu" qere li" khyad' yu la,.
15 Nao qho" to" ra" sabyi naui re li" khyad' yu wa,
nao: yang yaug: qao" jo, nhao: to" ra" ce: naui re khyad' yu wa,
16 Ngonhaung" nho: gyevo qe wa aire myi: ngha" pye' mung: thau: lhang" pye' ako".
Yao: bam re nhag' yo" ru we' qu" mung: yao: bam re phyo' qheim" pye' wa,
17 Nao: yang khyin: to" ra" byumyu" re- nao: yang gyai qam: bo nhao: to" ra" byumyu" re-
lhaug' caung: to: mung: gug: gam byid: wa,
18 Ngonhaung" wa nao mae" khonhae" re: madam: phao: tug' lo" lo:nae".
Ngonhaung" re kao so' daui: na nhao la,. aire ngonhaung" nao re caung:khin" byid' na nae".
19 Qam: so' bo: thao" ra" Asang Mao"So we"- ngonhaung" re
dam: jhui" tug' yu la,- ngonhaung" re ni" nho: nhag' khyag' myid qhu" byid: la, aire ngonhaung" wa khyad' yu: ru qhug' nae".