CAUNG: KHIN" 76
Aung Doe; Ra" Mao"So
(Asab peim: ra" Nghaui"caung: dalam:)
1 Mao"So re Yuda mung" mae ba: ako".
Yao" mang re Israel mung" mae nga: yhe' byid' ako".
2 Yerusalem mae yao" yham qo" ra".
Yao: wa Ziun bam mae na: ra".
3 Ai: jo, qo mae yao: wa gyevo qenho: myo:khe' jham re khyug' pye' byid: va".
Yao: bam: go jham- shae pyang: jham ngad: ra" yao: bam: shae lhae alhab' re khyug' pye' byid: va".
4 O" Mao"So we"- nao wa khoqhi" kheim: so' qi" ra" i?
Ni" gyevo qere nao: yang aung: pye' ra" bam jham mae" nao dam: tug' lo: re khoqhi" qu" phug' qu" gyaug taung" khig: ra" i?
5 Yao: bam: lhe" ra" gyezo: qere yao: bam ci: ru alhab' phyo' shao: pye' byid: mung: ana" yao: bam wa ashid khyo" yab: jo; avako".
Yao: bam: qam: we' laba lajhao wa pe" phug' made, lo:.
6 O" Yaku nho: Mao"So we"- nao: yang yao: bam re kyaug' nhin" lao" myao: jham we'
myao: zaung mo, lang" gyoe; shid: lo" ako".
7 Ngadqere: Asang we"- nao re alhab' mo; yang ceim" gyaug: ako".
Nao nhag' yo: lao"- ni" qhid' kheim: mae khag' maqo" to" ye; jo, ngad: ako".
8-9 Nao wa ni" nho: dao: kho' rure mug: khaung mae" ba: ke' nhao: ra".
Myid gaung: dao mae deim" zag zo: qhug' mo, re khyad' yu nae" qhid' mae" dao: kho' rure ta" thug' ke' nae" ga: nao to" ye; li" re mug: myid wa gyaug: tae" byaug: ra".
10 Xao su byu qenho: nhag' yo: wa nao re je: caung:khin" byid: nae" za: boe" thug' nhao: ra".
Mang: zin" rumae" mashid na: dang mo, wa ni" nho: poe jham re xo' kad' li" genae".
11 Naonhaung" nho: Mao"So Asang re naonhaung" dao:so: byid' to" rure byid: ge,.
Avai: ayae mae" byumyu" alhab' mo, we"- yao: re jhaung qhu" jham cili" byid: ge,- Mao"So wa xao su byu qe:yang yao: re gyaug phug' genae" khyo: kad' ra".
12 Yao: wa ngad beim" ra" kho:kham nau" qere nyham: khyo" pye" mung:
qi" qhang: ra" kho:kham qere kyaug' nhin" ra".