CAUNG: KHIN" 7
Tarha" Din: Nyang: Ru Qhid' Mae" Akyu" Mho' Dao:
(Benyamin byumyu" Kusha nho: mathao mae Asang re Davi caung:khin" byid' ra" nghaui" caung:)
1 O" Asang nga" Mao"So we"- ngo wa gug:gam qhug' nae" qhid' mae" nao jhao" li" wo".
Ngo re khe' taung" na: ra" mo, alhab' mo; nho: lo, mae" ngore khyad' yu la,.
2 Ai mangad: re yao: bam wa khangkhyi ru: khag' yang maqo" khyad' yu: ra" jo, qo khyo ngore dao: phao: lo" li" genae".
Ai: jo, qo mae ngore aje, aman" phyo' cad' sin" pye' li" genae".
3-4 O" Asang nga" Mao"So we"- ngo: yang dayaug yaug re shad' re- ngo: yang ba nam dayaug yaug re ab: pye' ngad: re- mangad: lao"- nga" nho: gyevo re pe" si: mabo: rumae aqan alan kad' ngad: re-
5 nga" gyevo qe:yang ngore cao" khe' mung: qhug' taung" yu vageshao: Yao: bam: yang ngore zin: mung: se' pye' vageshao:.
Aimung: ngore myid gaung mae ashid to: co' vageshao:.
6 O" Asang we"- ni" nhag' yo" ruyang to" li" wa,- nga" gyevo qe: nhag' jam: yo" rure to" mung: ngag: tam" pye' wa,- naoyao" gaung re nhug' to" ke' mung: ngore bao" yu la,-
Nao o: ru wa tarha" din: nyang: ru ngad: ra".
7 Airu: mung: ni" lhang" gam: mae" byu alhab' re khai: zhang: to: yang:
yao: bam re mug:tho' mae" eib: na wa,.
8 Nao wa byumyu" alhab' nho: tarha" agyi ngad: ra".
O" Asang we"- nga" bo: de, mung: dao: kho' byid: la,.
Ngo qobo maqo" rure nao ba: ra".
9 Nao wa din:man" ra" Mao"So ngad mung: ngonhaung" myid: ru we' ngaui: rure dao: kho' byid' ra"
Makhyang: mashab mo; nho: kaui: ra" mau" zo" re tam" pye' wa,- aimung: gai shab mo, re aphug' jhaung qhu" byid: wa,.
10 Asang wa ngore gug: gam byid: yaug ngad: ra"-
yao: wa yao: re phug' cao" mo, re khyad' yu: ra".
11 Mao"So wa din:man" ra" tarha" agyi ngad: ra". Aimung: makhyang: mashab mo, re khonhae" re: dao: phyid' ra".
12 Yao: bam wa yao: bam yao" khyo jham re matha" pye' gere wa-
Mao"So wa yao" shae pyang: re saui" tho' li" nae"- yao: wa yao" lo, la: re thaung mung: aire nyhang" ci: ra".
13 Yao: wa yao" shid pho: shae lhae jham re yu mung: yao" myi: myo: jham re qang: ci: ra".
14 Byu jham khonho" makhyang: mashab: rure
myid: thug' na ko" rure myid: qu" wa,- yao: bam wa qug: khai: re yaung: to: mung: mhug' pyag' rure lo, joe" kad' na: ako".
15 Ngadqere: su gaje: qhid' mae" yao: bam thaung: to" ra" lha" mae yao: bam yao: myi" ako".
16 Aimung: yao: bam wa yao: bam yao" makhyang: mashab: mau" yang
qobo dae byid' ru qhug' mung: yao: bam yao" aqan alan: mau" yang dae de' ako".
17 Ngo wa Asang re yao" tarha" din: nyang: ru: mathao mae jeju beim: so" ra"-
Ngo wa Asang myhao: thao" ra" yaug re nghaui"caung: yang: caung:khin" ra".