CAUNG: KHIN" 52
Mao"So: Dao: Kho' Ru We' Nhag' Myan" Ra" Jeju
(Edom byumyu" Doeg wa Sholu jhao" ye: mung: Ahimeleg jhao" Davi ye" byaug va" rure ta" shid' thao Davi peim: ra" ji:)
1 Azhao" myhao: ra" byu we"- nao wa pe"mung: ni" nho: makhyang" rure-
phug: ta" na: i? Mao"So: dao: jhaug' zaug: ru wa
apyad ato ngad: ra".
2 Nao wa su gaje qe byo; qeim nae" khyo-
ni" sho wa tho' ra" shae tho: ru: ngad: ra".
Nao wa khonhae' re: mhug' ta" nae" ru za: myid: thug' na: ra".
3 Nao wa agai re tho' mae makhyang: mashab: rure
je: jhid'de; mung: din:man" rure tho' mae shad' rure je: jhid'de; ra".
4 Mhug' hab' nao we"- nao wa su gaje re
ni" dao: thoe: yang no nhao nae" taung" so' vao: ra".
5 Aimung: Mao"So wa- nao re apyad ato mae phyo' pye' li" nae"-
ni" yham mae" she: khyad' thug' lo" nae"-
yao: wa nao re daui: na mo; nho:
mug: mae" yu: pye' li" nae".
6 Din:man" ra" byu qe wa- cere myao mung: qu" gyaug: li" genae".
Aimung: yao: bam wa nao re qi: pye' mung:-
7 Qu" ge,- gug: gam nae" qhid mae" Mao"So re mangha lo:-
yao: yao" jo,nho" myo: sho' mae
myid: lam mung: makhyang: mashab: ra"
mau" mae gug: gam re qho: ra" yaug cemae ngad: ra"-
ga: ta" li" genae".
8 Ngadqere: ngo kam" wa- Asang: yham mae
yaug: jo; ra" zhanlun gae we' dakhyo: ngad:.
Ngo wa yao" mabaui mabyo; ra" jhid'de; myid mae
apyad ato khug ngha: na:.
9 Mao"So we"- nao kad' va" ra"
mau" mathao mae ngo nao re khonhae" re:
jeju beim: so: nae". Ni" byu qenho: qhid' kheim: mae
nao wa gai yaug ngad: rure ta" hau" kyo: nae".