CAUNG: KHIN" 5
Gug: Gam Byid: Nae" Akyu" Mho' Dao:
(Davi Peim: Ra" Nghaui"caung:)
1 O" Asang we"- nga" dao: thoe jham re tae" gyo: byid: mung:- ngo so' mo" she: rure gyo: byid: la,-
2 Nga" Mao"So we' nga" kho:kham we"- bao" yu nae" nga" ngug: yao thoe re tae" gyo: byid: la,-
O"- Asang we"- nao re ngo akyu" mho' ra" wo".
3 Nao wa ne, seim mae ngo akyu" mho' rure gyo: byid' ra".
Ba thug' so' re ngo wa xeim: ngaui" byid: mung: nao: yang tau: byid: nae" rure lao" na:.
4 Nao wa shad' nghung" rure myid: ngaui qu" o: ra" Mao"So mangad:-
nao wa ni" nho: qhid' kheim: mae makhyang: mashab: ru pe" ja: rere: akhang" mabyid: ngad: ra".
5 Nao wa ngad beim: mo, re manug: qu" ngad: ra:-
makhyang: mo, alhab' re nao nghang" ra".
6 Nao wa mhug' hab' qere alhab' phyo' qheim" pye' mung: aqan alan mo, we' mhug' pyag' mo, re ca' nghang" pye' ra".
7 Ngadqere: ni" nho: qi" qhang: ra" jhid'de; myid mathao mae ni" yham khyo ngo qo" vao li" ra".
Ngo wa ni" nho: Caung:pa" Yham mae qo" caung:pa" mung: nao re phug' myao" ru we' qo" goe; pa" ra".
8 Asang we"- ngo mae gyevo gyai myo" ra"- nao myid: o: rure ngo qo" kad'nae" qhid' mae" khyo shid' byid: la.
Ni" nho: khyo re ngo qo" cao" sho' ngore sho' sho' boe" qhu" byid: la,.
9 Nga" gyevo qe ta" rure magai: lam" ngad: ra".
Yao: bam wa phyo' qheim" nae" za: o: ako". Yao: bam: dao: thoe jham wa mhug' khin" ru we' no: gyo: yo: ra". Ngadqere: shid pho: mhug' pyag' ru byang" jo; ra".
10 O" Mao"So we"- yao: bam re dao: phyid' mung: qobo dae byid: wa,- yao: bam: mau" zo" jham wa yao: bam re byo; qeim nhao vashao:.
Yao: bam: myo" ra" qobo jham we' nao re yao: bam tau: lhan" ra" mathao mae ni" nho: qhid' kheim: mae" yao: bam re khe' thug' pye' wa,.
11 Ngadqere: nao mae gug: gam qo" yu mo, wa ngaui bau: ngaui lho" na genae". Yao: bam wa khonhae" re: ngaui bau: taung" nghaui"caung" li" genae".
Nao re jhid'de; mo, re gug: gam byid: wa,- ni" mathao mae yao: bam wa gai:gai: yao: ngaui bau" ako".
12 Asang we"- nao wa nao re phug' cao" mo, re shaman" byid' ra"- ni" jhid'de; myid wa
yao: bam re go we' dakhyo: gug: gam byid' ra".