CAUNG: KHIN" 32
Qobo Lhang: Yu: Ru We' Qobo Khyad' Byid' Ru
(Davi peim: ra" ji:)
1 Qobo khyad' pye' byid: qhug' mo, wa ngaui lho" ako".
Shad' nghung" rure qobo khyad' byid: qhug' mo, wa ngaui lho" ako".
2 Shad' nghung" ra" qobo re Asang: yang qobo zhaug' ru maqhug' mo, wa ngaui lho" ako".
Geim kad' ru alhab' mae" loe, mo, wa ngaui lho" ako".
3 Nga" qobo jham re ngo malhang: yu re ba geim" ngo ngug yang: pyaung" pyaung" mung: byaug va".
4 Asang we"- nao wa ngore myi" re: na" re: qobo dae byid' ra."
Byao gin ba so' yang ngaui" re lhe' ho: pye' ru we' dakhyo: nga" qam: bin sho' gan: byaug va".
5 Aimung: nga" qobo re nao jhao" pheim: qhu" mung:-
nga" nho: shad' nghung" ra" qobo jham re ngo mazug' to:- nao jhao" qobo phyid: qhu" mung: lhang: yu nae" ein: ngo myid: phyid' yang: nga" qobo alhab' re nao khyad' pye' byid: va".
6 Aimung: ni" jhaug' zaug: ra" byu alhab' mo, wa bao" yu ca" ra" ayo, re nao jhao" mho' yao ang: ako". Qug: khai: wa gyai thin: ra" qid bug re" ru: lo qere: yao: bam mae joe" nae" mangad:.
7 Nao wa ngo vho' na jo, qo ngad: ra".
Nao wa ngore qug: khai: mae" khyad' yu: li" nae"-
nao ngore gug: gam byid' ra" mathao mae ni" khyad' yu: ra" khyo re ngo thoe qi" yang nghaui"caung: ra".
8 Asang wa- nao ye" lo" ang: ra" khyo ngo nao re mho" byid: nae"- nao re ngo khyo shid' mung: pha,jhi" byid: nae".
9 Mho: ru gyo: sho' nhad' mae nhad' kho' ke' mung: nho yu taui: te' ca" ra" myao:- mangad: lao" loze re" ru: nhag' magyang: damung- ga: ta" ra".
10 Makhyang: mashab mo, wa dayin dayo: dae qhug' no li" genae"-
Asang re khug ngha mo, kam" wa yao" mabaui mabyo; ra" jhid'de; myid: yang gug: gam byid' ru qhug' genae".
11 Din:man: mo, we"- Asang kad' ra" mau" mathao mae ngaui ngaui bau: bau: na ge,-
Yao" mho dao: gyo: mo, we"- Ngaui bau: taung" zag: hug' ge,.