CAUNG: KHIN" 24
Qi" Qhang: Ra" Kho:kham Mo"
(Davi peim: ra" Nghaui"caung:)
1 Mug:myid we' aimae bo: ra" ja: alhab' wa Asang: mae" ngad: ra"
myidgaung we' ai: dao mae na mo, alhab' wa yao" mae" ngad: ra".
2 Yao: wa aire myidgaung khug mae" qid dao mae zhaug' to" ra"- yao" apan aqao: re nammugdara tham: kao" mae kyae: to" ra".
3 Asang: bug gaung khyo do, lo" nae" akhang" khag' qo" i?
Yao" nho: gyang" lho" ra" Caung:pa" Yham khug khyo khag' qo" vao nae" i?
4 Nhag' lam: mae myid: ru we' lo, mau" mae jo mo,- so sulho jham re macaung:pa" mo,- mangad' ra" dao:so: mabyid: mo, qo" lo" genae".
5 Asang wa yao: bam re shaman" byid: mung: khyad' yu: li" nae".
Mao"So wa yao: bam re qobo maqo" mo, ga: ta" byid: nae".
6 Airu" mo, wa Mao"So jhao" li" ra" mo, ngad mung: Yaku' nho: Mao"So: qhid' kheim: khyo qo" li" ra" mo, ngad: ako".
7 Vang" kham: mo" jham re phung" sin" ke' ge,- ganhae" gaco' mae" kham: jham re phung" ge,- qi" qhang: ra" kho:kham pho" vao lo: li" nae".
8 Ce: qi" qhang: ra" kho:kham wa khag' ngad: ra" i? Yao: wa Asang ngad mung: qam: bo: ru we' boe" doe; ra". Asang wa mang: zin: jao: mae aung doe; ra".
9 Vogaung: kham: mo" jham re phung" sin" ke' ge,
Ganhae" gaco' mae" kham: jham re phung" ge,
qi" qhang: ra" kho:kham pho" vao lo: li" nae".
10 Ce: qi" qhang: ra" kho:kham wa khag' ngad: ra" i? Yao: wa aung doe; ra". Asang yao: wa qi" qhang: ra" kho:kham mo" ngad: ra".